Nkonko ya babadi
“Mukaji” udibu batele mu Yeshaya 60:1 nnganyi? Mmunyi mudiye ‘ujuka’ ne ‘ufila butoke’?
Yeshaya 60:1 udi wamba ne: “Juka, wewe mukaji, fila butoke, bualu butoke buebe mbulue. Butumbi bua Yehowa budi bukukenkesha.” Nshapita mikuabu idi ileja ne: “mukaji” au uvua Siona, anyi Yelushalema, tshimenga tshikulu tshia Yuda tshikondo atshi.a (Yesh. 60:14; 62:1, 2) Yelushalema udi uleja tshisamba tshia Isalele. Mvese eu udi ujula nkonko ibidi eyi: 1) Mmunyi muvua Yelushalema ‘mujuke’ ne mufile butoke? Bivua bienzeke tshikondo kayi? 2) Mvese eu udi kabidi ukumbana mu mushindu mualabale lelu anyi?
Mmunyi muvua Yelushalema ‘mujuke’ ne mufile butoke? Bivua bienzeke tshikondo kayi? Yelushalema ne ntempelo uvuamu biakashala bikulu bidimu bionso 70 bivua bena Yuda mu Babilona. Bena Medaya ne Pelasa bamane kutshimuna Babilona, bakanyishila bena Isalele bavua miaba yonso ya mu Babilona bua bapingane kuabu ne batuadije kabidi kutendelela Yehowa. (Eze. 1:1-4) Kutuadija mu 537 K.Y., bashadile bena Isalele bavua ne lulamatu ba mu bisa bionso 12 bakatuadija kupingana ku Yelushalema. (Yesh. 60:4) Bakatuadija kulambula Yehowa milambu, kuenza mafesto, ne kuibakulula ntempelo. (Eze. 3:1-4, 7-11; 6:16-22) Butumbi bua Yehowa buakatuadija kukenka pa Yelushalema, tuambe ne: pa bantu bende. Bakalua butoke kudi bisamba bivua kabiyi bimanye Yehowa.
Mêyi a buprofete a Yeshaya a dijadikulula tshiakabidi aa akakumbana mu tshitupa tshiawu tshia kumpala tshikondo atshi. Bena Isalele ba bungi kabakashala ne lulamatu to. (Neh. 13:27; Mal. 1:6-8; 2:13, 14; Mat. 15:7-9) Bakalua kubenga too ne Yezu Kristo uvua Masiya. (Mat. 27:1, 2) Mu 70 P.Y., bakabutula Yelushalema ne ntempelo uvuamu bua musangu muibidi.
Yehowa ukavua mumanyishe tshivua tshienzeke atshi. (Dan. 9:24-27) Mu kuamba kuimpe, kavua mulongolole malu bua tshimenga tshia Yelushalema atshi tshikumbaje bibadi bionso bia mêyi a buprofete a dijadikulula tshiakabidi adi mu Yeshaya nshapita wa 60 au to.
Mvese eu udi ukumbana kabidi mu mushindu mualabale lelu anyi? Eyowa, kadi udi ukumbanyina mukaji mukuabu wa mu tshimfuanyi, ke “Yelushalema wa muulu.” Mupostolo Paulo wakafunda bua mukaji au ne: “Yeye ke mamuetu.” (Gal. 4:26) Yelushalema wa muulu mbulongolodi bua Nzambi budi mu diulu budi buenza ne bifukibua bia mu nyuma bia lulamatu. Mu bana bende mudi Yezu ne bena Kristo bela manyi binunu 144 badi ne bua kuya mu diulu anu bu Paulo ukadimu. Bena Kristo bela manyi ke “tshisamba tshia tshijila,” anyi “Isalele wa Nzambi.”—1 Pet. 2:9; Gal. 6:16.
Mmunyi muvua Yelushalema wa muulu ‘mujuke’ ne ‘mufile butoke’? Wakenza nanku pa bidi bitangila bana bende bela manyi batshidi pa buloba. Mona mudi malu abu mafuanangane ne tshikavua Yeshaya nshapita wa 60 muambe.
Bivua bikengela bela manyi ‘bajuke’ bualu bavua babuele mu mîdima ya mu malu a Nzambi pavua lupela, tuambe ne: butontolodi butampakane mu tshisumbu panyima pa lufu lua bapostolo. (Mat. 13:37-43) Bavua ku bupika bua Babilona munene, nsangilu wa bitendelelu bia dishima. Bakashala ku bupika abu too ne “ku nshikidilu kua ndongoluelu wa malu,” nshikidilu wakalua mu 1914. (Mat. 13:39, 40) Bidimu bitanu pashishe, tuambe ne: mu 1919, bakabumbusha ku bupika abu, kutuadijabu diakamue kufila butoke bua mu nyuma pakadituabu mu mudimu wa diyisha.b Mu kupita kua bidimu, bantu ba bisamba bionso, too ne bashadile ba ku bena Isalele wa Nzambi badi Yeshaya 60:3 ubikila ne: “bakalenge,” mbabuele mu butoke abu.—Yesh. 60:3; Buak. 5:9, 10.
Kumpala eku, bena Kristo bela manyi nebafile butoke bua kudi Yehowa mu mushindu mualabale. Padibu bafua, badi baya mu diulu, benza “Yelushalema mupiamupia,” anyi mukaji wa Kristo wa mu tshimfuanyi udi muenza ne bantu binunu 144 bakokeshaye nabu ne benzaye nabu mudimu wa buakuidi.—Buak. 14:1; 21:1, 2, 24; 22:3-5.
Yelushalema mupiamupia neenze tshitupa tshinene mu dikumbana dia Yeshaya 60:1. (Fuanyikija ne Yeshaya 60:1, 1, 3, 5, 11, 19, 20 ne Buakabuluibua 21:2, 9-11, 22-26.) Anu muvua mbulamatadi wa Isalele wa kale muikale mu Yelushalema, Yelushalema mupiamupia ne Kristo ke bikala mbulamatadi wa ndongoluelu wa malu mupiamupia. Mmunyi mudi Yelushalema mupiamupia ‘upueka ufuma mu diulu kudi Nzambi’? Mpadiye utuma ntema yende kudi badi pa buloba. Bantu ba Nzambi ba mu bisamba bionso ‘nebende ku diambuluisha dia butoke buende.’ Kabakuenza kabidi mpekatu anyi kufua to. (Buak. 21:3, 4, 24) Ke dîba dienzeka “dijadikulula tshiakabidi bintu bionso” dikavuabu bamanyishe kudi Yeshaya ne baprofete bakuabu. (Bien. 3:21) Dijadikulula tshiakabidi dinene diakatuadija pavua Kristo mulue Mukalenge, nedijike ku ndekelu kua Bukokeshi buende bua bidimu tshinunu.
a Bible wa Nkudimuinu wa Bulongolodi bupiabupia mmutele muaku “mukaji” mu Yeshaya 60:1 pamutu pa kutela “Siona,” anyi “Yelushalema,” bualu miaku ya pa muanda ya mu tshiena-Ebelu idibu bakudimune ne: “Juka” ne “fila butoke” idi ku bakaji; nansha muaku “wewe” udi ku bakaji. Muaku “mukaji” udi utuambuluisha bua kujingulula ne: mukaji wa mu tshimfuanyi ke udibu bakuila.
b Dijadikulula tshiakabidi dia ntendelelu mulelela divua dienzeke mu 1919 ke didi Yehezekele 37:1-14 ne Buakabuluibua 11:7-12 biakuila. Yehezekele ukavua mumanyishe bua dijadikulula tshiakabidi dia mu nyuma dia bena Kristo bela manyi bonso panyima pa bidimu bia bungi bivuabu benze mu bupika. Mêyi a buprofete adi mu Buakabuluibua adi akula bua diledibua dia mu tshimfuanyi dia kasumbu kakese ka bela manyi bavua balombole midimu yetu panyima pa tshikondo tshîpi tshivuabu kabayi benzele Yehowa mudimu bua muvuabu babele mu buloko pabu kabayi ne bualu bubi buvuabu benze. Mu 1919, bakabateka “mupika wa lulamatu udi mudimuke.”—Mat. 24:45; tangila mukanda wa Ntendelelu mukezuke wa Yehowa mmujadikulula, dib. 118