Nkonko ya babadi
Pavua Yezu mubanjije Didia dia dilolo dia Mukalenge, nkuepi kuvua bayidi bende 70 bavuaye mutume kumpala bua kuyisha? Bavua bamulekele anyi?
Katuena ne bua kuela meji ne: bu muvua bayidi 70 kabayipu pavuaye mubanjije Didia dia dilolo dia Mukalenge, bidi biumvuija ne: kavua ubanyisha anyi ne: bobu bavua bamulekele to. Yezu uvua anu musue kuikala anu ne bapostolo bende ba dîba adi.
Uvua ubanyisha anu muvuaye wanyisha bapostolo 12 abu. Yezu wakanji kusungula bantu balume 12 munkatshi mua bayidi bende ba bungi, kubabikilaye ne: bapostolo. (Luka 6:12-16) Uvua mu Galela pavuaye ‘mubikile bapostolo 12, mubatume bua kuyisha Bukalenge bua Nzambi ne bua kuondopa.’ (Luka 9:1-6) Pashishe pakapueka Yezu mu Yudaya, “wakasungula bakuabu 70, kubatumaye ku babidi ku babidi.” (Luka 9:51; 10:1) Ke bualu kayi Yezu wakapeta bayidi miaba mishilashilangane ivuabu bayisha mukenji wende.
Bena Yuda bavua balue bayidi ba Yezu batshivua anu benza Pasaka tshidimu tshionso, pamuapa ne mêku abu. (Ekes. 12:6-11, 17-20) Yezu ne bayidi bende bakaya ku Yelushalema pakavua dîba dia lufu luende disemene. Kadi kakabikila bayidi bende bonso bavua mu Yudaya, mu Galela, ne Pelaya bua kulua kuenza tshibilu tshia Pasaka to. Mbimvuike bimpe ne: Yezu uvua musue kubanjija Didia dia dilolo adi anu ne bapostolo bende. Wakabambila ne: “Mvua mujinge bikole bua kudia nenu Pasaka eu kumpala kua meme kukenga.”—Luka 22:15.
Yezu uvua ne tshivuaye muenzele nanku. Ukavua pa kufua bu “Muana wa mukoko wa Nzambi udi umbusha mpekatu wa ba pa buloba.” (Yone 1:29) Uvua ne bua kufuila mu Yelushalema, muvuabu balambuila Nzambi milambu kukadi bidimu bia bungi. Lufu luende luvua lupeteshe bantu budikadidi kupita buvua mêku a bena Isalele bapete pavuabu badie muana wa mukoko butuku buvuabu bapatuke mu Ejipitu. (1 Kol. 5:7, 8) Tshivua Yezu muenze tshivua mua kuambuluisha bapostolo 12 bua kuenzabu pabu tshishimikidi tshia tshisumbu tshia bena Kristo. (Ef. 2:20-22) Tshimenga tshia tshijila tshia Yelushalema tshidi ne “mabue 12 a bishimikidi.” Mbafundapu “mêna 12 a bapostolo 12 ba Muana wa mukoko.” Bualu ebu budi bukoka ntema yetu. (Buak. 21:10-14) Bapostolo abu bavua pabu mua kuambuluisha bikole mu mudimu wa kukumbaja malu adi Nzambi mulongolole. Nunku tudi tumvua bua tshinyi Yezu uvua musue bua enze nabu Pasaka wa ndekelu ne Didia dia dilolo dia Mukalenge diakabanjijaye diakamue pashishe.
Bayidi 70 ne bakuabu kabidi kabavua mu Didia dia dilolo adi to; nansha nanku divua mua kuambuluisha bayidi bonso bavua bashala ne lulamatu. Bayidi bonso bavua balua bela manyi, bavua babuela mu tshipungidi tshia Bukalenge tshivua Yezu mutelele bapostolo butuku abu.—Luka 22:29, 30.