Mua kuikala ne ditalala nansha mudiku mvita
Gary uvua musalayi kumpala udi wamba ne: “Pamvua tshiyi muanji kulonga Bible, tshivua mumanye tshivua tshikebesha tshikisu, kansungansunga ne ndululu pa buloba to. Kadi mpindieu ndi ne ditalala mu muoyo. Ndi mumanye ne: Yehowa Nzambi neavuije buloba muaba muimpe wa ditalala.”
Pa kumbusha Gary, Bible mmuambuluishe bantu bakuabu bua kupeta ditalala.
BIBLE UDI WAMBA NE: “Wewe, Yehowa, udi muimpe ne udi mudiakaje bua kubuikidilangana.”—Misambu 86:5.
MUDI MVESE EU MUAMBULUISHANGANE: “Mvese eu mmunjadikile ne: Yehowa utu ne luse. Ndi mumanye ne: Yehowa mmusue kumbuikidila bua malu onso amvua muenze kale mu mvita pamvua musalayi.”—Wilmar wa mu Colombie.
BIBLE UDI WAMBA NE: “Ndi mfuka diulu dipiadipia ne buloba bupiabupia; ne malu a kale kaakubavuila kabidi mu lungenyi, anyi kubabanda kabidi ku muoyo to.”—Yeshaya 65:17.
MUDI MVESE EU MUAMBULUISHANGANE: “Malu avua manfikile pamvua musalayi mmanshiye ne disama dia mutu, ne mvua mushale kabungame. Kadi mvese eu utu umvuluija ne: mu katupa kîpi emu Yehowa neenze bua mpue malu mabi onso au muoyo bua kashidi. Tshiakuavuluka kabidi nansha. Ebu mbualu buimpe be!”—Zafirah wa mu États-Unis.
BIBLE UDI WAMBA NE: “Mu matuku ende muntu muakane neatante, ne ditalala nedivulangane too ne pikala ngondo katshiyiku kabidi.”—Misambu 72:7.
MUDI MVESE EU MUAMBULUISHANGANE: “Ntu ngelangana meji a mêyi adi mu mvese eu. Mu katupa kîpi emu, mvita ne malu mabi adiyi mikebeshe nebijike; katuakusamisha kabidi mutu bua bukubi bua balela betu to.”—Oleksandra wa mu Ukraine.
BIBLE UDI WAMBA NE: ‘Bafue bebe nebikale ne muoyo. Tabalayi ne elayi mbila ne disanka, nuenu badi basombele mu lupuishi!’—Yeshaya 26:19.
MUDI MVESE EU MUAMBULUISHANGANE: “Bakashipa bena mu dîku dietu pa kuamba bonso tshikondo tshivuabu benda bakeba bua kushipa bena mu tshisa tshia Tutsi bonso. Kadi mvese eu udi unjadikila ne: nemmonangane kabidi nabu. Ndi muindile ne muoyo kuulu kuulu bua kumvua muikalabu bakula ne disanka pababishabu ku lufu!”—Marie wa mu Rwanda.
BIBLE UDI WAMBA NE: ‘Mu katupa kîpi patupu, bantu babi kabakuikalaku kabidi to; kadi bena bupuekele nebapiane buloba, nebikale ne disanka dipite bungi mu ditalala divule.’—Misambu 37:10, 11.
MUDI MVESE EU MUAMBULUISHANGANE: “Nansha mudi mvita mijike, kutshidi anu kansungansunga ne malu mabi. Mvese eyi mingambuluisha bikole menemene. Yehowa mmumone malu onso ne mmumanye nsombelu wanyi. Mmulaye ne: mu katupa kîpi emu makenga onso neajike ne tshiakuavuluka to.”—Daler wa mu Tadjikistan.
Kudi Bantemu ba Yehowa miliyo ne miliyo badi Bible muambuluishe bua kupeta ditalala. Bena mêyi adibu batele mu tshibejibeji etshi badi pabu mu Bantemu abu. Mbalonge mua kuepuka kansungansunga ka makoba, ka matunga, ne lukinu. (Efeso 4:31, 32) Bantemu ba Yehowa kabatu babuelakana mu malu a tshididi ne mu ndululu to.—Yone 18:36.
Bantemu ba Yehowa ba pa buloba bujima batu kabidi bambuluishangana anu bu bana ba muntu badi banangangane. (Yone 13:35) Tshilejilu, Oleksandra utukavua batele wakanyemena mu ditunga dikuabu ne muanabu wa bakaji bua mvita. Udi wamba ne: “Patuakasambuka mikalu, diakamue tuakamona Bantemu ba mu ditunga adi balue kutuakidila. Bakatuambuluisha bua tuibidilangane ne nsombelu wa mu ditunga adi.”
Tudi tukubikila mu bisangilu bietu ne disanka dionso. Batu batulongeshamu malu a mu Bible adi afila ditalala ne mua kuatumikila. Buela mu site wa jw.org bua upete muaba udibi bienzekela pabuipi nebe anyi lomba bua Ntemu wa Yehowa alue kukulongesha Bible ku diambuluisha dia mukanda wa Shala ne muoyo kashidi! kuyi ufuta tshintu.