Lukonko lupepele ludi muntu yonso mua kuela

Mary ne bayende Johna mbasombele mu ditunga mudi bantu ba bungi ba mu Philippines balue kusombela ne benzela mudimu. Batu ne disanka dia kuyisha bantu aba lumu luimpe. Mu tshipupu tshia korona (COVID-19), Mary wakatuadija kulonga Bible ne bantu mu ditunga adi ne mu matunga makuabu kabidi. Mmunyi muvuaye mufike ku dienza nanku?

Mary uvua webeja balongi bende ba Bible ne: “Udiku mumanye muntu mukuabu udi musue pende kulonga Bible anyi?” Pavua mulongi wandamuna ne: eyowa, uvua umulomba bua amutuangaje nende. Kuela anu kalukonko kapepele aka kutu anu kupatula bipeta bimpe. Bua tshinyi? Bualu bantu batu banange Dîyi dia Nzambi batu basue kuambila bena mu mêku abu ne balunda babu malu adibu balonga. Ntshinyi tshivua balongi ba Mary benza pavuaye ubela lukonko alu?

Mary uvua ne mulongi wende, diende Jasmin. Jasmin wakamutuangaja ne bantu bakuabu banayi. Umue wa ku bantu abu, diende Kristine, wakananga dilonga bikole, kulombaye Mary bua ikale umulongesha misangu ibidi ku lumingu. Pavua Mary muebeje Kristine ni uvua mumanye bantu bavua mua kuitaba bua kulonga pabu Bible, wakamuandamuna ne: “Eyowa, nenkutuangaje ne balunda banyi ba bakaji.” Mu mbingu mikese, Kristine watuangaja Mary ne balunda bende banayi bavua pabu basue kulonga Bible. Panyima pa matuku, Kristine wakamutuangaja kabidi ne balunda bende bakuabu ba bakaji. Bamue ba ku balunda bende abu bakamutuangaja pabu ne bantu bakuabu bavua mua kuitaba bua kulonga Bible.

Kristine wakajinga kabidi bua bena mu dîku diabu bavua mu Philippines balonge pabu Bible. Ke yeye kuyukila ne muanende wa bakaji, diende Andrea. Kumpala, Andrea uvua wela meji ne: ‘Tshitendelelu tshia Bantemu ntshitendelelu tshidi katshiyi ne kuditshi. Kabatu bitabuja Yezu, ne batu babala bobu anu Dipungila dikulukulu.’ Kadi anu musangu wa kumpala wakalongaye, wakamona ne: bionso bivuaye wela meji abi bivua bia tshianana. Pavuaye upeta bualu kampanda bupiabupia misangu yonso ivuabu balonga, uvua wamba ne: “Bu mudibi ne: budi bufimina mu Bible, budi anu ne bua kuikala bulelela!”

Panyima pa matuku, Andrea wakatuangaja Mary ne balunda bende ba bakaji babidi ne muena mudimu wabu mukuabu ukavua yeye mutuadije kulonga Bible. Bualu bukuabu, Mary kavua mumanye ne: Angela, tatuende mukaji wa Andrea uvua umvua bivuabu balonga to. Tatuende mukaji au uvua mpofo. Dimue dituku, Angela wakambila Andrea bua amutuangaje ne Mary bua atuadije kumulongesha pende Bible. Angela uvua munange malu avuaye ulonga. Mu ngondo umue tshianana, ukavua mukuate mvese ya bungi mu mutu ne uvua musue bua bikale bamulongesha misangu inayi ku lumingu! Andrea uvua umuambuluisha bua ikale ulondela bisangilu ku biamu.

Pakamanya Mary ne: Joshua, bayende wa Kristine uvua usomba panyima apu ne uteleja bivuabu balonga, wakamulomba bua atuadije kulonga pende. Joshua wakamuambila ne: “Nengikale anu nnuteleja patupu, kungedi lukonko nansha lumue to, tshianana ndi njuka, nya.” Mu minite itanu patupu, Joshua wakela nkonko ya bungi kupita ne Kristine. Yeye kuitaba bua kulonga Bible.

Lukonko lupepele luvua Mary wela bantu luakenza bua apete bantu ba bungi ba kulonga nabu Bible. Wakafila ba bungi ba kudibu kudi bamanyishi bakuabu bua bikale babalongesha. Mary wakatuadija kulombola malonga a Bible 28 mu matunga anayi mashilangane.

Jasmin, muntu wa kumpala uvuaye mutuadije kulonga nende Bible wa kabatijibua mu ngondo 4/2021. Kristine wakabatijibua mu ngondo 5/2022, yeye kupingana mu dîku diabu mu Philippines. Balongi bakuabu babidi bavua Kristine mutuangaje ne Mary bakabatijibua pabu. Angela wakabatijibua pende ngondo mikese pashishe ne ukadi mpindieu mpanda-njila wa pa tshibidilu. Joshua bayende wa Kristine ne muanende wa bakaji Andrea ne bantu bakuabu bavua Mary ulonga nabu badi balubuluka bimpe.

Bantu ba mu bidimu lukama bia kumpala bavua bambila balela babu ne balunda babu malu avuabu balonga bua Yezu. (Yone 1:41, 42a; Bien. 10:24, 27, 48; 16:25-33) Ebeja balongi bebe ba Bible ne bantu bakuabu badi basue kumvua lumu luimpe ne: “Udiku mumanye muntu mukuabu udi musue kulonga Bible anyi?” Wewe muele anu lukonko lupepele elu, pamuapa udi mua kupeta bantu ba bungi badi basue kulonga Bible.