Uvua musankishibue bikole kudi Yehowa

“MUOYO, musankishibue bikole, Yehowa udi nebe.” Mmuoyo kayipu! Udi wakula apa mmuanjelo Gabriel. Udi wakula ne nsongakaji wa mutshima mudipuekeshi​—Mariya, muana wa bakaji wa muntu kampanda udi ubikidibua Eliya. Bivua mu tshidimu 3 K.B.B., ne muaba udi tshimenga tshia Nazarete.​—Luka 1:26-28, NW.

Mariya mmubangila kudi Yozefe muena mabaya. Bilondeshile mikenji ne bilele bia bena Yuda, uvua wangatshibua bu mukajende musela. (Matayo 1:18) Anu bu yeye, udi pende muena dîku dia bubanji bukese. Bu mudibi nunku, bua tshinyi muanjelo udi umuela muoyo bu udi musankishibue bikole?

Disanka diende dia mudimu dia mpatshi

Gabriel udi usakidila ne: “Mariya lekela kutshina; bualu [udi musankishibue bikole kudi Nzambi, NW]. Newimite, ulele muana wa balume, umuinyike dina ne nYezu. Neikale munene, bamubikile ne: mMuana wa Muena Kulu. [Yehowa Nzambi, NW] neamupe nkuasa wa tatuende Davide; neadie bukalenge bua nzubu wa Jakob kashidi; bumfumu buende kabuakuila ne ndekelu.”​—Lukas 1:29-33, Mukenji Mulenga.

Mariya wakakema ne wakapampakana, ne kuebejaye ne: “Abio nebienzeke munyi, bua pandi tshiyi mumanye mulume?” Muanjelo kumuandamuna ne: “Spiritu Munsanto neakutulukile, bukole bua Muena Kulu nebukubuikile ne mundidimbi wende. Pa nanku, munsanto waledibua kuudi, nebamubikile Muana wa [Nzambi, NW].” Bua kumbusha mpata yonso, muanjelo udi usakidila ne: “Mona, muanenu Elizabete wimitshi pende muana wa balume wa ku bukulakaje buende. Ngondo ewu ngwende muisambombo, yeye uvuabo bamba ne: nnkumba, bualu kakuena tshidi [Nzambi, NW] kayi mua kuenza.”​—Lukas 1:34-37, Mukenji Mulenga.

Diakamue Mariya wakitaba disanka dia mudimu dia mpatshi edi. Ne budisuile, kadi ne budipuekeshi, udi wandamuna ne: “Ke meme musadidi wa [Yehowa, NW] ewu, bingenzekele anu bu muudi muambe.” Ke Gabriel kushishaye kuya. Mariya udi uya ne lukasa luonso mu tshimenga kampanda tshivua mu tshitupa tshia mikuna tshia Yudeya. Pakafikaye ku mbelu kua muakuidi Zakariya ne mukajende, Elizabete, wakasangana malu anu bu muvua muanjelo mumvuije. Ndisanka kayipu didi diûle tente mu mutshima wa Mariya! Mishiku yende yakamba mêyi a disamuna nawu Yehowa.​—Lukas 1:38-55, Mukenji Mulenga.

Udi ulua mukaji wa Yozefe

Kamama kampanda kadi ne bua kulela mubidi wa bu muntu wa Yezu, bualu diledibua dia mushindu’eu bakavua badianjila kudimanyisha. (Yeshaya 7:14; Matayo 1:22, 23) Kadi bua tshinyi kamama kabangila kadi kakengedibua? Mbua kupetesha tatu mudishi udi mua kusambuluja kudi muana bukenji budi mu diumvuangana ne mikenji ku nkuasa wa bumfumu wa Davidi. Bubidi buabo Yozefe ne Mariya mbena tshisa tshia Yuda ne badi ndelanganyi ya Mukalenge Davidi. Nunku bumpiana bua Yezu nebuikale bujadika nseke yonso ibidi. (Matayo 1:2-16; Luka 3:23-33) Ke bua tshinyi muanjelo wakajadikila Yozefe kunyima ne: kavua ne bua kuelakana bua kuangata Mariya bu mukajende muanyisha kudi mikenji, nansha muvuaye muimite difu.​—Matayo 1:19-25.a

Mukenji wa bitadi muela kudi Auguste Sezare wakasaka Yozefe ne Mariya bua kuya kudifundisha mu mikanda ya mbulamatadi ku Beteleme. Patshivuabo kuinaku, wakalela muanabute wende wa balume. Balami bakalua kumona muana, ne bakasamuna Tatuende, Yehowa. Kunyima kua matuku 40 a didikezula bilondeshile Mikenji ya Mozese, Mariya wakaya ku ntempelo ku Yeruzaleme bua kufila mulambu bua dibuikidibua dia mpekatu yende. (Lewitiki 12:1-8; Luka 2:22-24) Eyowa, bu muvua dimitshibua diende kadiyi dipange katoba, ne nunku bu muvuadi kadiyi dipikula ku matompuela a mpekatu, dipanga kupuangana diende dia ku tshilelelu divua ne bua kubuikibua kudi milambu ya dibuikidila nayi mibi.​—Musambu wa 51:5.

Dîba divua Mariya ne Yozefe ku ntempelo, mukulakaje Simona ne muprofete mukaji mununu Ana bakapeta diakalenga dia kumona Muana wa Nzambi. Mariya kêna nshindamenu wa kuteyela ntema to. (Luka 2:25-38) Kunyima, bena lubuku lua mitoto kabakamunemekela to kadi bakanemekela Yezu.​—Matayo 2:1-12.

Kunyima kua bamane kunyema ku Ejipitu ne kusombelaku too ne pakafua muntu mubi Herode, baledi ba Yezu bakapingana ne bakasombela mu musoko mukese wa Nazarete. (Matayo 2:13-23; Luka 2:39) Kuinaku ke kuvua Yozefe ne Mariya bakoleshe Yezu mu nsombelu ya dîku ditshinyi dia Nzambi.

Mariya wakapeta bana bakuabo

Kunyima, Mariya ne Yozefe bakapetesha Yezu bakunyi ba bakaji ne ba balume ba ku tshilelelu. Dîba divua mudimu wa Yezu mumufikishe mu tshimenga tshia Nazarete muakaledibuaye, bamanyangana nende ba ku buana bakamujingulula. “Yeye kena muana wa muena mabaya, anyi?” ke muakebejabo. “Kabena babikila mamu’andi ne, Malia, anyi? Bana babo ba balume Yakobo ne Yosefe ne Simona ne Yuda; ne bana babo ba bakashi, kabena munkatshi muetu, buonso buabo, anyi?” (Matayo 13:55, 56) Bena Nazarete badi batuma meji abo ku dîku dia ku mubidi dia Yozefe ne Mariya, pa kusangisha ne bana bende ba balume ne ba bakaji bavuabo bamanye bu bana babo ne Yezu ba balume ne ba bakaji ba ku tshilelelu.

Bana ba balume ne ba bakaji aba ki mbana ba mamu mukuabo wa Yezu anyi mansebende to. Ki mbalongi bende to, ne ki mbana babo ba balume ne ba bakaji ba mu nyuma to, bualu Yone 2:12 [Muanda Mulenga Lelu] udi uleja patoke dishilangana didi pankatshi pa bisumbu bibidi ebi pa kuamba ne: “Yesu wakaya mu musoko wa Kapenuma ne mamuende, ne bana babo ba balume ne balongi bende.” Kunyima kua bidimu, mupostolo Paulo wakamona Sefase, anyi Petelo ku Yeruzaleme, ne kusakidila ne: “Tshivua mumone nansha umue wa ku bapostolo bakuabo, mvua mumone anu Yakobo, muanabo ne Mukalenge.” (Galatia 1:19, Bible de Jérusalem) Kusakidila apu, tshiambilu tshia se: Yozefe “kakamumanya [Mariya] tô ne hakaleleye muana mulume” tshidi tshileja ne: tatu mudishi wa Yezu wakasangila nende kunyima ne kulelaye nende bana bende bakuabo. (Matayo 1:25) Mu diumvuangana ne bualu ebu, Luka 2:7 udi ubikila Yezu bu “muanabute” wende wa balume.

Mamu mutshinyi wa Nzambi

Bu muvuaye mamu mutshinyi wa Nzambi, Mariya wakeleshangana diboko ne Yozefe mu dishidimuna bana bende mu buakane. (Nsumuinu 22:6) Tshijadiki tshia muvuaye mulongi wa tshitembu wa Mifundu tshidi tshimueneka mu tshiambilu tshiende tshia mushinga tshia mu nyuma pakamusekelela Elizabete. Tshikondo atshi mamuende wa Yezu udi wambulula nyanji idi mu kasala ka Hana ne uleja dimanya dia: misambu, mifundu ya kale ne ya bu-profete, ne mikanda ya Mozese. (Genese 30:13; 1 Samuele 2:1-10; Nsumuinu 31:28; Malaki 3:12; Luka 1:46-55) Mariya uvua mukuate ku muoyo malu ne mêyi bia bu-profete, ubiangata ne mushinga mukole mu mutshima wende, ne weleelapu meji mu tshieledi tshiende tshia lungenyi. Bua nunku uvua ne bidi bikengedibua bua kudifila mu dipetesha dishidimuna dia bu-muledi kudi nsongalume Yezu.​—Luka 2:19, 33.

Yezu, muana wa bidimu 12 mulongesha bimpe, udi uleja dimanya dia Mifundu didi dikemesha bamanyi bapiluke ba mukanda ku ntempelo. Bu muakaditapululaye ne baledi bende tshikondo tshia Pasaka, mamuende wakamba ne: “Muan’anyi wakatuenzela nunku tshinyi? Tatu webe ne meme kabidi tuakukukeba tunyingalala.” Yezu udi wandamuna ne: “Nuakadi nunkebela tshinyi? Kanuena bamanye ne, Bundi n’abu mbua kuikala mu [nzubu, NW] wa Tatu wanyi?” Bu muvuaye kayi mujingulule ngumvuilu wa diandamuna edi, Mariya wakadilama mu mutshima wende. Yezu, pakapinganaye ku Nazarete, wakatungunuka ne ‘kudiunda mu lungenyi ne mu kuleha ne mu [dianyishibua, NW] kudi Nzambi ne kudi bantu.’​—Luka 2:42-52.

Mariya bu mulongi wa Yezu

Mmushindu kayipu udibi bikumbanangane bua se: Mariya alue mulongi mudifile wa Yezu! Udi ne budipuekeshi ne kêna ne dijinga dia kudizangika nansha muvuaye muomekela kudi Nzambi mudimu wa pa buawu. Mariya mmumanye Mifundu. Biwenza makebulula wewe nkayebe, kuakumusangana mumvuija bu muambika lumu, musomba pa nkuasa wa bumfumu bu “mamu mukalenge-mukaji” ne mubuikila kudi butumbi bukenkesha kudi Yezu. Bishilangane, nenumusangane mufulame, kayi udizangika.​—Matayo 13:53-56; Yone 2:12.

Yezu wakakandika dikukuila kayi dionso dia Mariya munkatshi mua balondi bende. Musangu kampanda pavuaye wakula, “mukaji kampanda uvua munkatshi mua musumba wa bantu wakela lubila ne: ‘Munda muakakutuala ne mabele akakuamusha mbibeneshibue! ‘Bishilangane,’ wakandamuna ne: ‘badi babeneshibue mbadi bumvua dîyi dia Nzambi ne badilama.’” (Luka 11:27, 28, nkudimuinu wa New American Bible, mukudimuna kudi bena Catholic Biblical Association of America) Ku difesto kampanda dia dibaka, Yezu wakambila Mariya ne: “Mukashi, ndi n’ebe bualu kai? Dîba dianyi kadiena dianze kulua.” (Yone 2:4) Nkudimuinu mikuabo idi yamba ne: “Lekela bualu abu mu bianza bianyi.” (Nkudimuinu wa Weymouth) “Kutetshi bua kundudika to.” (Nkudimuinu wa An American Translation) Eyowa, Yezu uvua unemeka mamuende, kadi kavua umukukuila to.

Masanka a mudimu a kashidi

Mmasanka kayipu a mudimu akalabula Mariya! Wakalela Yezu. Pashishe wakakuata mudimu wa bu-mamu ne wakashidimuna nsonga eu. Ndekelu wa bionso, wakenza midimu ya ditabuja, pa kulua mulongi wa Kristo ne muanabo ne Kristo wa bakaji wa mu nyuma. Bua musangu wa ndekelu mu Mifundu, tudi tumona Mariya mu tshibambalu tshia kuulu mu Yeruzaleme. Udi kuinaku pamue ne balongi ba Yezu, bana bende bakuabo, ne bakaji bakuabo ba lulamatu​—buonso buabo batendeledi ba Yehowa.​—Bienzedi 1:13, 14.

Kunyima, Mariya wakafua ne mubidi wende wakapingana ku lupuishi. Anu bu balongi ba muanende munanga wa balume bakuabo bela manyi ba kumpala, wakalala mu lufu too ne pakakumbana tshikondo tshifunda kudi Nzambi bua kumubiisha ku lufu bu tshifukibua tshia mu nyuma ne muoyo ukena lufu mu diulu. (1 Kolinto 15:44, 50; 2 Timote 4:8) Ndisanka kayipu didi “musankishibue bikole” eu ne bua kuikala nadi mpindieu kumpala kua Yehowa Nzambi ne Yezu Kristo!

[Mêyi adi kuinshi]

[Tshimfuanyi mu dibeji 31]

Mariya wakasankishibua bikole bu mamuende wa Yezu