Bua tshinyi dîna dia Yehowa didi ne mushinga kutudi?

1-2. Ntshinyi tshidi tshitujadikila ne: dîna dia Yehowa didi ne mushinga kudi Yezu?

DÎNA dia Yehowa ke divua ne mushinga wa bungi menemene kudi Yezu kupita bintu bikuabu bionso. Mu tshiena-bualu tshishale tuvua bamone ne: uvua muitabe too ne bua kufua bua kuleja mudi Yehowa muikale Nzambi wa tshijila ne mudi njila yende yonso miakane. (Mâko 14:36; Eb. 10:7-9) Ku ndekelu kua Bukokeshi buende bua bidimu tshinunu, neapingajile Yehowa bukokeshi buonso bua kujidila dîna diende. (1 Kol. 15:26-28) Malu onso avua Yezu muenze bua Yehowa adi aleja ne: uvua mumunange bikole menemene.

² Yezu wakalua pa buloba mu dîna dia Tatu wende. (Yone 5:43; 12:13) Wakadimanyisha bayidi bende. (Yone 17:6, 26) Uvua ulongesha bantu ne wenza bishima mu dîna adi. (Yone 10:25) Wakalomba kabidi Yehowa bua alame bayidi bende ‘bua dîna diende yeye’ adi. (Yone 17:11) Mbiumvuike bimpe ne: dîna dia Yehowa ke divua ne mushinga kudi Yezu kupita tshintu kayi tshikuabu tshionso. Nunku, mmunyi mudi muntu mua kuamba ne: mmuyidi mulelela wa Yezu kadi kayi mumanye dîna dia Yehowa ne kayi udiambila bantu?

3. Ntshinyi tshituamona mu tshiena-bualu etshi?

³ Bu mutudi bena Kristo, tudi tuangata dîna dia Yehowa ne mushinga wa bungi bua kuleja mutudi tudienzeja bua kuidikija Yezu. (1 Pet. 2:21) Mu tshiena-bualu etshi, netumone mudi dîna dia Yehowa disunguluja bantu badi bayisha “lumu luimpe lua Bukalenge.” (Mat. 24:14) Netumone kabidi mudi dîna dia Yehowa ne mushinga kudi yonso wa kutudi.

“TSHISAMBA BUA DÎNA DIENDE”

4. a) Mmudimu kayi uvua Yezu mupeshe bayidi bende kumpala kua kupinganaye mu diulu? b) Ndukonko kayi ludi lujuka bua mudimu au?

⁴ Pakavua Yezu pa kupingana mu diulu, wakambila bayidi bende ne: “Nenupete bukole panupuekela nyuma muimpe, ne nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8) Nunku bavua ne bua kuyisha lumu luimpe miaba yonso, ki nganu mu Isalele nkayamu to. Dîba adi bantu ba mu bisamba bionso bavua mua kupeta mpunga wa kulua bayidi ba Yezu. (Mat. 28:19, 20) Kadi Yezu wakamba ne: “Nenuikale bantemu banyi.” Bayidi bapiabapia aba bavua kabidi ne bua kumanya dîna dia Yehowa patupu anyi bavua ne bua kushala anu bantemu ba Yezu? Malu adi mu Bienzedi nshapita wa 15 neatuambuluishe bua kupeta diandamuna dia lukonko elu.

5. Mmunyi muvua bapostolo ne bakulu bavua mu Yelushalema baleje ne: bivua bikengela bua bantu bonso bamanye dîna dia Yehowa? (Tangila kabidi tshimfuanyi.)

⁵ Mu 49 P.Y., bapostolo ne bakulu bavua mu Yelushalema bakadisanga bua kuyukila bua tshivua bantu ba bisamba bia bende bavua kabayi batengula ne bua kuenza bua kubitababu bu bena Kristo. Yakobo muanabu ne Yezu wakajikija tshisangilu atshi ne mêyi aa: “[Petelo] mmulonde bimpe menemene muvua Nzambi mutume ntema yende kudi bisamba bikuabu bua musangu wa kumpala bua kupatulamu tshisamba bua dîna diende.” Yakobo uvua wakula bua dîna dia nganyi? Wakatela mêyi a muprofete Amosa, wamba ne: ‘Bantu badi bashale bakebe Yehowa ne muoyo mujima, pamue ne bantu ba bisamba bionso, bantu badi babikidibua ku dîna dianyi, ke mudi Yehowa wamba.’ (Bien. 15:14-18) Bayidi bapiabapia kabavua anu ne bua kumanya malu a Yehowa patupu to, kadi bavua kabidi ne bua ‘kubikidibua ku dîna diende.’ Abi bidi biumvuija ne: bavua ne bua kubamanyina ku dîna adi ne bobu bine bavua ne bua kudimanyisha bantu.

6-7. a) Bua tshinyi Yezu uvua mulue pa buloba? b) Mbualu kayi bukuabu bua mushinga mukole buvua Yezu muluile pa buloba?

⁶ Dîna Yezu didi diumvuija ne: “Yehowa udi lupandu.” Yehowa wakatuma Yezu bua kupandisha bantu bonso bavua bamuitabuja yeye ne muanende. Yezu wakalua pa buloba bua kufuila bukua bantu. (Mat. 20:28) Nunku mmuambuluishe bantu bua bapete lupandu ne muoyo wa tshiendelele.​—Yone 3:16.

⁷ Kadi bua tshinyi bantu bavua dijinga ne tshia kubapikula natshi? Bualu anu mutuvua bamone mu tshiena-bualu tshishale, baledi betu ba kumpala, Adama ne Eva, bakatombokela Yehowa mu budimu bua Edene. Nunku bakajimija diakalenga dia kusomba ne muoyo kashidi. (Gen. 3:6, 24) Kadi pa kumbusha bualu bua kupandisha bena mibi, kuvua bualu bua mushinga mukole buvua Yezu muluile pa buloba. Satana uvua mushiminyine Yehowa malu bibi menemene. (Gen. 3:4, 5) Ke bualu kayi bivua bikengela bantu bamanye ne: Yehowa kavua muenze bualu bubi nansha bumue to, ne bamanye kabidi ne: dîna diende ndia tshijila. Bu muvua Yezu muleji mpala wa Yehowa, wakenza mudimu bikole menemene bua kuvuija dîna dia Yehowa dia tshijila.

8. Ntshinyi tshivua bayidi ba Yezu bonso ne bua kumanya?

⁸ Bantu bonso bavua ne bua kuitabuja Yezu, nansha bobu bena Yuda anyi bantu ba bisamba bikuabu, bavua ne bua kumanya muntu uvua mubapandishe, tuambe ne: Yehowa Nzambi tatuende wa Yezu. (Yone 17:3) Bualu bukuabu, bavua ne bua kubamanyina ku dîna dia Yehowa anu bu Yezu. Bivua bikengela bamanye kabidi muvuabi ne mushinga bua kujidila dîna dia Yehowa. Dîba adi, bavua mua kupeta mushindu wa kupanduka. (Bien. 2:21, 22) Nunku bayidi ba Yezu bonso ba lulamatu bavua ne bua kumanya Yehowa ne Yezu. Ke bualu kayi Yezu wakajikija disambila diende didi mu Yone nshapita wa 17 ne mêyi aa: “Ndi mubamanyishe dîna diebe, ne nendimanyishe, bua dinanga diuvua munnange nadi dikale munda muabu ne meme mu buobumue nabu.”​—Yone 17:26.

“NUDI BANTEMU BANYI”

9. Mmunyi mutudi mua kuleja ne: dîna dia Yehowa didi ne mushinga kutudi?

⁹ Bilondeshile bitudi balonge, mbimvuike bimpe ne: bayidi balelela ba Yezu badi ne bua kujidila dîna dia Yehowa. (Mat. 6:9, 10) Tudi ne bua kuangata dîna dia Yehowa ne mushinga wa bungi. Tudi ne bua kuleja ku bienzedi bietu ne: dîna dia Yehowa didi ne mushinga wa bungi menemene. Kadi ntshinyi tshitudi mua kuenza bua kujidila dîna dia Yehowa ne kuleja ne: malu avua Satana muambe bua Yehowa nga dishima?

10. Mbualu kayi budibu bakuila mu Yeshaya nshapita wa 42-44? (Yeshaya 43:9; 44:7-9) (Tangila kabidi tshimfuanyi.)

¹⁰ Yeshaya nshapita wa 42-44 udi uleja tshitudi ne bua kuenza bua kujidila dîna dia Yehowa. Mu nshapita eyi, Yehowa udi ulomba bantu badi kabayi bamutendelela bua bajadike mudi Nzambi yabu milelela. Udi ulomba bua ntemu alue kujadika mudiye muena dishima, anu mutubi bienzeka ku tubadi. Kadi ntemu udi aku anyi udi kunu!​—Bala Yeshaya 43:9; 44:7-9.

11. Ntshinyi tshidi Yehowa wambila bantu bende mu Yeshaya 43:10-12?

¹¹ Bala Yeshaya 43:10-12. Yehowa udi wamba bua bantu bende ne: ‘Nudi bantemu banyi, ne meme ndi Nzambi.’ Yehowa udi ubalomba bua kuandamuna lukonko elu: “Kudiku Nzambi mukuabu pa kumbusha meme anyi?” (Yesh. 44:8) Nunku tuetu tudi ne diakalenga dia kuluandamuna. Tudi tuleja ku mêyi ne ku bienzedi bietu ne: Yehowa ke Nzambi umuepele mulelela. Dîna diende didi ku mutu kua mêna makuabu onso. Tudi tuleja mutudi bamunange bikole ne bamulamate, nansha Satana yeye utuluisha. Eu ke mushindu utudi tujidila dîna dia Yehowa.

12. Dîyi dia buprofete didi mu Yeshaya 40:3, 5 diakakumbana mushindu kayi?

¹² Patudi tutamba kuakula bua dîna dia Yehowa, tuamba mudiye Nzambi muimpe, tudi tuidikija Yezu Kristo. Yeshaya ukavua muambe ne: kuvua muntu uvua ne bua ‘kutokesha [anyi ‘kulongolola,’ dim.] njila wa Yehowa.’ (Yesh. 40:3) Dîyi edi diakakumbana mushindu kayi? Yone mubatiji wakalongoluela Yezu njila, kadi mu bulelela, njila au uvua wa Yehowa bualu Yezu uvua mulue mu dîna dia Yehowa ne wakakula kabidi mu dîna dia Yehowa. (Mat. 3:3; Mâko 1:2-4; Luka 3:3-6) Dîyi dia buprofete divua diamba kabidi ne: “Butumbi bua Yehowa nebusokolodibue.” (Yesh. 40:5) Buakasokolodibua mushindu kayi? Pavua Yezu mulue pa buloba bu muleji mpala wa Yehowa, wakenza malu mu mushindu mupuangane, bienze anu bu ne: Yehowa nkayende uvua mulue pa buloba.​—Yone 12:45.

13. Tudi mua kuidikija Yezu mushindu kayi?

¹³ Tudi bantemu ba Yehowa anu bu Yezu. Tudi tubikidibua ku dîna dia Yehowa ne tudi tuambila bantu malu a dikema adiye muenze. Kadi bua kubambilawu mu mushindu muimpe menemene, tudi kabidi ne bua kubaleja mudimu munene udi nawu Yezu wa kujidila dîna dia Yehowa. (Bien. 1:8) Yezu ke Ntemu munene wa Yehowa ne tudi tulonda buludiki buende. (Buak. 1:5) Kadi dîna dia Yehowa didi ne bua kuikala ne mushinga kayi kudi yonso wa kutudi?

DÎNA DIA YEHOWA DIDI NE MUSHINGA KUTUDI

14. Bilondeshile Misambu 105:3, mmunyi mutudi tumvua bua dîna dia Yehowa?

¹⁴ Tudi tudiumvua bua dîna dia Yehowa. (Bala Misambu 105:3.) Yehowa udi usanka bikole patudi tuditumbisha bua dîna diende. (Yel. 9:23, 24; 1 Kol. 1:31; 2 Kol. 10:17) ‘Kuditumbishila mu Yehowa’ kudi kumvuija kudiumvua bua Yehowa Nzambi wetu. Tudi ne diakalenga dinene dia kuambila bantu bakuabu ne: Yehowa ngua tshijila ne malu onso atuye wenza mmakane. Katumvu bundu nansha kakese bua kuambila bena mudimu netu, balongi betu, bena mutumba netu ne bantu bakuabu ne: tudi Bantemu ba Yehowa to. Diabolo ki mmusue bua tutungunuke ne kuambila bakuabu bualu bua dîna dia Yehowa to. (Yel. 11:21; Buak. 12:17) Yeye ne baprofete bende ba dishima mbasue bua bantu bapue dîna dia Yehowa muoyo. (Yel. 23:26, 27) Mushindu utudi banange dîna dia Yehowa udi utusaka bua kusankila mu dîna adi “dituku dijima.”​—Mis. 5:11; 89:16.

15. Kubila dîna dia Yehowa kudi kumvuija tshinyi?

¹⁵ Tudi tutungunuka ne kubila dîna dia Yehowa. (Yoe. 2:32; Lomo 10:13, 14) Kubila dîna dia Yehowa kakuena kumvuija anu kudimanya ne kuditela to. Kadi kudi kumvuija kumanya Nzambi, kumumona bu muntu mulelela, kumueyemena ne kuikala kumulomba diambuluisha ne buludiki. (Mis. 20:7; 99:6; 116:4; 145:18) Kudi kumvuija kabidi kuambila bantu dîna diende, kubalongesha ngikadilu yende, kubasengelela bua banyingalale bua mpekatu yabu ne bua bakebe tshia kuenza bua Yehowa abanyishe.​—Yesh. 12:4; Bien. 2:21, 38.

16. Ntshinyi tshitudi mua kuenza bua kuleja ne: Satana mmuena dishima?

¹⁶ Tudi tuitaba bua kukenga bua dîna dia Yehowa. (Yak. 5:10, 11) Patudi tushala ne lulamatu kudi Yehowa mu ntatu tudi tuleja mudi Satana muena dishima. Mu tshikondo tshia Yobo, Satana wakamba bua bantu badi batendelela Yehowa ne: “Muntu neafile bionso bidiye nabi bua muoyo wende.” (Yobo 2:4) Satana wakamba mudi bantu benzela Yehowa mudimu anu padi malu abu enda bimpe. Kadi padi ntatu ibakuata badi bamulekela. Muena lulamatu Yobo wakaleja muvua tshivuaye muambe atshi tshia dishima. Tuetu petu tudi ne diakalenga dia kuleja ne: nansha Satana mutumueneshe kasuba, katuakuela Yehowa nyima to. Tudi batuishibue ne muoyo mujima ne: Yehowa neatungunuke ne kututabalela bua bualu bua dîna diende.​—Yone 17:11.

17. Bilondeshile 1 Petelo 2:12, mmushindu kayi mukuabu utudi mua kutumbisha dîna dia Yehowa?

¹⁷ Tudi tunemeka dîna dia Yehowa. (Nsu. 30:9; Yel. 7:8-11) Bu mutudi baleji mpala ba Yehowa ne tubikidibua ku dîna diende, malu atudi tuenza adi mua kutumbishisha dîna dia Yehowa anyi kudipendeshisha. (Bala 1 Petelo 2:12.) Nunku mbimpe tuenze muetu muonso mua kuenza bua bitudi tuamba ne bitudi tuenza bitumbishishe Yehowa. Dîba adi tudi tutumbishisha dîna dia Yehowa nansha mutudi bantu bapange bupuangane.

18. Mmushindu kayi mukuabu utudi mua kuleja ne: dîna dia Yehowa didi ne mushinga kutudi? (Tangila kabidi dimanyisha dia kuinshi kua dibeji.)

¹⁸ Tudi tuditatshisha bikole bua dîna dia Yehowa kupita mutudi tuditatshisha bua lumu luetu. (Mis. 138:2) Bua tshinyi bualu ebu budi ne mushinga? Bualu patudi tuenza malu adi asankisha Yehowa, misangu ya bungi bidi mua kupanga kusankisha bantu, batuadija ne kutuamba.a Yezu wakitaba bua kufua lufu lua bundu bu muenzavi munene anu bua kutumbisha dîna dia Yehowa. Wakalengulula bundu mu ngumvuilu wa ne: kavua usamisha mutu bikole bua bivua bantu bakuabu bamuamba to. (Eb. 12:2-4) Meji ende avua anu matuma ku dienza disua dia Nzambi.​—Mat. 26:39.

19. Utu umvua bishi bua dîna dia Yehowa?

¹⁹ Tudi tudiumvua bua dîna dia Yehowa ne tudi tudiumvua kabidi ne bunême padibu batubikila ne: Bantemu ba Yehowa. Ke bualu kayi tudi tunanukila nansha batupenda mushindu kayi. Dîna dia Yehowa didi ne mushinga wa bungi kutudi kupita lumu luetu. Nunku tudisuikayi bua kutumbisha dîna dia Yehowa nansha Satana yeye muenze tshinyi bua kututekesha mu mikolo. Dîba adi netuleje ne: dîna dia Yehowa ke didi ne mushinga wa bungi menemene kutudi kupita bintu bikuabu bionso anu muvuadi ne mushinga kudi Yezu Kristo.