Mua kufila mibelu

1. Nnganyi udi ne bua kupeshangana mibelu? Umvuija.

UTU musue kupesha bakuabu mibelu anyi? Bua bamue bantu, kuyipeshangana kutu kupepele. Kadi bakuabu batu batshina bua kuyipeshangana, bamona ne: kabakukumbana to. Nansha nanku, kudi misangu itudi tuetu bonso benzejibue bua kupesha bakuabu mibelu. Bua tshinyi? Bualu Yezu wakamba ne: dinanga ke tshimanyinu tshia bayidi bende balelela. (Yone 13:35) Nunku patudi tupesha bena Kristo netu mibelu ne muoyo mujima padibi bikengela, bidi bileja mutudi babanange. Bible udi uleja ne: patudi tubapeshayi nanku, bulunda buetu nabu budi bushêma.​—Nsu. 27:9.

2. Ntshinyi tshidi bakulu ne bua kuikala bamanye? Bua tshinyi? (Tangila kabidi kazubu ka “Mibelu ya mu Tshisangilu tshia munkatshi mua lumingu.”)

² Bakulu badi ne bua kuikala bamanye mua kupesha bantu mibelu mimpe. Yehowa ne Yezu mbapeshe bakulu mudimu wa kutabalela bena mu tshisumbu. (1 Pet. 5:2, 3) Badi babatabalela nanku ku diambuluisha dia mibelu ya mu Bible itubu babapesha mu miyuki itubu benza mu tshisumbu. Batu kabidi bayipesha muntu yonso udi nayi dijinga ne babela badi bapambuke bua kupingana kudi Yehowa. Mmunyi mudi bakulu ne tuetu bonso mua kupesha bakuabu mibelu mimpe?

3. a) Mmushindu kayi utudi mua kulua bafidi bimpe ba mibelu? (Yeshaya 9:6; tangila kabidi kazubu ka “Idikija Yezu paudi ufila mibelu.”) b) Ntshinyi tshituakuila mu tshiena-bualu etshi?

³ Tuetu bakonkonone bilejilu bia bantu badibu batele mu Bible, nangananga tshia Yezu, nebituambuluishe bua kulua bafidi bimpe ba mibelu. Umue wa ku mianzu yende ngowu eu: “Mufidi wa Mibelu wa Dikema.” (Bala Yeshaya 9:6.) Mu tshiena-bualu etshi, netumone tshitudi mua kuenza padi muntu utulomba mubelu ne tshitudi mua kuenza patudi tujinga kupesha muntu mubelu padiye kayi mutulombawu. Netumone kabidi ne: mbimpe kupesha muntu mubelu mu tshikondo tshiakanyine ne mu mushindu muimpe.

PADI MUNTU UTULOMBA MUBELU

4-5. Muntu yeye mutulombe mubelu, ndukonko kayi lutudi ne bua kuanji kudiela? Fila tshilejilu.

⁴ Muntu yeye mukulombe mubelu, udi mua kumvua disanka, umona ne: mmukueyemene. Dîba adi muoyo udi mua kukusaka bua kumuambuluisha diakamue. Kadi mbimpe wanji kudiebeja ne: ‘Ndi mukumbane bua kumupesha mubelu mu bualu ebu anyi?’ Imue misangu, mushindu mutambe buimpe wa kumuambuluisha ngua kumuambila bua aye kudi muntu udi mua kumupesha mibelu mimpe bua bualu buende abu.

⁵ Tuangate tshilejilu. Tutekabi ne: mulunda webe wa pa muoyo udi usama bikole. Udi ukuambila ne: udi wenda ukeba ngondapilu mishilashilangane idiku bua disama diende, pashishe udi ukuebeja bua umuambile ngondapilu uudi wewe umona ne: mmuimpe. Nansha muudi mua kuikala munange ngondapilu kampanda, manya ne: kuena munganga ne kuena mulonge malu a disama diende adi to. Mushindu mutambe buimpe wa kumuambuluisha ngua kumuambila bua aye kudi muntu udi mulonge malu a disama diende adi.

6. Ntshinyi tshitudi ne bua kuenza kumpala kua kupesha muntu mubelu?

⁶ Nansha tuetu tudimona bakumbane bua kupesha muntu mubelu mu bualu kampanda, mbimpe tulekele matuku ndambu apite pashishe tulua kumupeshawu. Bua tshinyi? Nsumuinu 15:28 udi wamba ne: “Muntu muakane udi welangana meji kumpala kua kuandamuna.” Kadi netuenze tshinyi bituikala bamanye tshia kumuambila? Mbimpe kuanji kuenza makebulula, kusambila, ne kuelangana meji. Dîba adi netuikale batuishibue ne: mubelu utuamupesha newikale mu diumvuangana ne tshivua Yehowa musue bua tumuambile. Tuakulayi bua muprofete Natana.

7. Tshilejilu tshia muprofete Natana tshidi tshitulongesha tshinyi?

⁷ Mukalenge Davidi wakambila muprofete Natana ne: uvua musue kuibakila Yehowa ntempelo. Natana wakamukankamija diakamue bua kumuibaka. Pabi bivua bikengela ne: anji kuebeja Yehowa. Bua tshinyi? Bualu Yehowa kavua musue bua Davidi ibake ntempelo to. (1 Kul. 17:1-4) Tshilejilu etshi tshidi tshitulongesha ne: padi muntu utulomba mubelu, mbimpe tuikale ne “lujoko ku diakula.”​—Yak. 1:19.

8. Mbualu kayi bukuabu budi ne bua kutusaka bua kuela meji bimpe bimpe kumpala kua kupesha muntu mubelu?

⁸ Bualu bukuabu budi ne bua kutusaka bua kuela meji bimpe bimpe kumpala kua kupesha muntu mubelu mbuobu ebu: bualu bubi bobu bufikile muntu bua mubelu utuvua bamupeshe, nebatuele petu tshilumbu pambidi. Ke bualu kayi mbimpe tuele meji bimpe bimpe kumpala kua kupesha muntu mubelu.

PADI MUNTU KAYI MUTULOMBE MUBELU

9. Kumpala kua kupesha muntu mibelu, ntshinyi tshidi bakulu ne bua kuikala bajadike? (Galatiya 6:1)

⁹ Kudi misangu idi bakulu ne bua kubela muena Kristo udi ‘musesuke mu njila.’ (Bala Galatiya 6:1.) Muntu udi pamuapa mua kuangata mapangadika adi mua kulua kumufikisha ku dienza mpekatu. Nunku tshipatshila tshia bakulu ntshia kumuambuluisha bua ashale mu njila udi ufikisha ku muoyo wa tshiendelele. (Yak. 5:19, 20) Bua mibelu yikalabu mua kumupesha kumuambuluishayi, mbimpe bikale bajadike ne: uvua bushuwa musesuke mu njila. Yehowa mmuanyishile muntu yonso bua kudiangatshila mapangadika bilondeshile kondo kende ka muoyo. (Lomo 14:1-4) Kadi bakulu bobu bamone ne: muena Kristo mmuenze bualu budi mua kunyanga malanda ende ne Yehowa, mmushindu kayi udibu mua kumupesha mibelu?

10-12. Ntshinyi tshidi bakulu ne bua kuenza padibu bapesha muntu mibelu idiye kayi mulombe? Fila tshilejilu. (Tangila kabidi bimfuanyi.)

¹⁰ Kabitu bipepele bua bakulu kupesha muntu mibelu padiye kayi muyilombe to. Bua tshinyi? Mupostolo Paulo wakamba ne: pamuapa bualu muntu udi mua kuikala kayi mumanye ne: mmuenze bualu budibu mua kumupeshila mibelu to. Ke bualu kayi bakulu badi ne bua kuanji kulongolola lungenyi lua muntu bua amone mua kuyitaba.

¹¹ Kupesha muntu mibelu padiye kayi mutulombayi kudi anu bu kukuna mamiinu pa buloba bume. Kumpala kua tshidime kuakuna, udi wanji kusekuna buloba; pashishe ulua kuakuna. Ndekelu wa bionso, udi uamiamina mâyi bua amone mua kukola. Bia muomumue, mukulu udi ne bua kulongolola lungenyi lua muntu udi kayi mulombe mibelu kumpala kua yeye kumubela. Tshilejilu, mbimpe ayukile nende mu tshikondo tshiakanyine, amuambile ne: utu umutabalela ne mmusue kumuleja bualu kampanda. Muntu utu ubelangana yeye mumanyike bu muntu utu munange bakuabu ne ubenzela malu mimpe, nebikale bipepele bua kuitababu mibelu yende.

¹² Pakadi mukulu wenda ubela muena Kristo, mbimpe amuvuluije ne: tuetu bonso tutu tuenza bilema ne tutu dijinga ne mibelu. Dîba adi nebikale kabidi bipepele bua yeye kuitaba mibelu. (Lomo 3:23) Mbimpe amuleje kayi udia tshibanga ne: bilondeshile Bible, mmuenze bualu bubi; kadi umuleja nanku ne kanemu ka bungi ne dîyi dimpe. Padi muanetu au witaba ne: mmuenze tshilema, mukulu udi “ukuna mamiinu” padiye umumvuija mu mêyi mapepele malu adiye ne bua kuakaja. Pashishe, udi “umiamina mâyi” padiye umuela kalumbandi ne muoyo mujima bua malu mimpe adiye wenza ne usambila nende.​—Yak. 5:15.

13. Ntshinyi tshidi bakulu mua kuenza bua kuikala batuishibue ne: muntu mmumvue mibelu?

¹³ Misangu mikuabu muntu udi ubelangana udi mua kuamba bualu, kadi udiye ubela udi mua kumvua yeye tshikuabu. Ntshinyi tshidi bakulu mua kuenza bua bualu bua nanku kabuenzeki padibu bapesha muntu mibelu? Badi mua kumuela nkonko mu mushindu muimpe bua kumanya bikalaye mumvue mibelu ne mumanye tshidiye mua kuenza bua kuyitumikila.​—Muam. 12:11.

KUFILA MIBELU MU TSHIKONDO TSHIAKANYINE NE MU MUSHINDU MUIMPE

14. Bua tshinyi ki mbimpe kupesha muntu mibelu patudi ne tshiji?

¹⁴ Bu mutudi bapange bupuangane, tudi mua kuamba anyi kuenza malu adi mua kunyingalaja bakuabu. (Kolos. 3:13) Nansha Bible udi uleja ne: kudi misangu itudi mene mua kufiikishangana munda. (Ef. 4:26) Katupeshanganyi mibelu patudi ne tshiji to, bualu Bible udi wamba ne: “Tshiji tshia muntu katshiena tshikebesha buakane bua Nzambi to.” (Yak. 1:20) Tuetu tubelangana patudi ne tshiji, malu adi mua kuya kubi. Abi kabiena biumvuija ne: mbibi bua kuleja muntu udi mutufiikishe munda mutudi tumvua to. Kadi bua tuetu kuyukila nende bimpe, tuindile tshiji tshietu tshijike bua kushisha kuyukila nende. Elihu mmutushile tshilejilu tshimpe bua mushindu uvuaye mupeshe Yobo mibelu.

15. Tshilejilu tshia Elihu tshidi tshitulongesha tshinyi? (Tangila kabidi tshimfuanyi.)

¹⁵ Pavua Yobo wakula, udibingisha munda mua matuku ndambu, Elihu uvua mushale anu muteleje. Wakamumvuila luse. Kadi wakafiika munda pakumvuaye Yobo ushiminyina Yehowa malu, udiamba muvuaye kayi ne kalema. Nansha nanku, Elihu wakindila too pakakumbana tshiende tshikondo tshia kuakula; yeye kuakula ne dîyi dipole ne kanemu ka bungi. (Yobo 32:2; 33:1-7) Tshilejilu tshia Elihu tshidi tshitulongesha bualu bua mushinga ebu: mbimpe kupesha muntu mibelu patudi katuyi ne tshiji, tumupeshayi ne kanemu ne dinanga.​—Muam. 3:1, 7.

TUNGUNUKA NE KUPESHA BAKUABU MIBELU NE KUYITABA PEBE

16. Misambu 32:8 udi utulongesha tshinyi?

¹⁶ Mvese wa nshindamenu udi wamba ne: ‘Yehowa udi utupesha mibelu ne dîsu diende kutudi.’ (Bala Misambu 32:8.) Mêyi aa adi aleja ne: Yehowa udi utungunuka ne kutuambuluisha. Udi utupesha mibelu ne utuleja mua kuyitumikila. Mmutushile tshilejilu tshimpe be! Patudi tupesha muntu mibelu, mbimpe tutungunuke ne kumukankamija ne kumuambuluisha bua angata mapangadika mimpe.

17. Tudi mua kufuanyikija bakulu badi bafila mibelu miangatshila mu Bible ne tshinyi? (Yeshaya 32:1, 2)

¹⁷ Tudi mu tshikondo tshia tuetu kupesha bakuabu mibelu mimpe ne kuyitaba petu padibu batupeshayi. (2 Tim. 3:1) Tudi mua kufuanyikija bakulu badi bafila mibelu miangatshila mu Bible ne “tusulu tua mâyi mu buloba budi kabuyi ne mâyi.” (Bala Yeshaya 32:1, 2.) Tudi ne dianyisha kudi bena Kristo netu badi kabayi belakana bua kutupesha mibelu idi ikengela. Mêyi adibu batuambila adi anu bu “bimuma bia pome bia or mu bitekelu bia arjan.” (Nsu. 25:11) Tutungunukayi ne kulonga mua kupesha bakuabu mibelu mimpe ne mua kuyitaba petu padibu batupeshayi.