Ikala mutuishibue ne: Yehowa mmukunange

1. Bua tshinyi uvua mudilambule kudi Yehowa? (Tangila kabidi tshimfuanyi.)

UDI uvuluka dîba diuvua mudilambule kudi Yehowa anyi? Uvua mudilambule kudiye bualu uvua mufike ku dimumanya ne ku dimunanga. Uvua mumulaye ne: kumuenzela mudimu nekuikale pa muaba wa kumpala mu nsombelu webe, kabidi ne: neutungunuke ne kumunanga ne muoyo webe wonso ne anyima webe yonso ne lungenyi luebe luonso ne bukole buebe buonso. (Mâko 12:30) Katshia anu ku tshikondo atshi, udi mulue kumunanga bikole menemene. Mpindieu newandamune tshinyi muntu yeye mukuebeje ne: “Udi munange Yehowa menemene anyi?” Neumuandamune kuyi welakana ne: “Ndi mumunange kupita mundi munange muntu anyi tshintu kayi tshionso!”

2-3. Ndishindika kayi didi Yehowa musue ne: wikale nadi? Ntshinyi tshitualonga mu tshiena-bualu etshi? (Yelemiya 31:3)

² Nansha muudi mumanye ne: Yehowa mmukunange bikole, pamuapa udi mua kuikala kuyi mutuishibue ne: mmukunange, wela meji ne: kuena mukumbane bua yeye kukunanga to. Muanetu wa bakaji kampanda uvua mukole mu lutatu, wakamba ne: “Ndi mutuishibue ne: ndi munange Yehowa. Kadi ndi ndiebeja bikalaye munnange panyi.” Nunku ntshinyi tshidi mua kukuambuluisha bua kumanya mudi Yehowa umvua menemene bua bualu buebe?

³ Yehowa mmusue bua wikale mushindike ne: mmukunange. (Bala Yelemiya 31:3.) Bulelela budi ne: Yehowa ke uvua mujinge bua ulue mulunda wende. Pawakadilambula kudiye, wewe kubatijibua, wakakunanga bikole menemene, nunku kena mua kukulekela to. Bu mudiye ne dinanga dia lulamatu kudi batendeledi bende ba lulamatu, udi ubangata bu ‘tshintu tshiende tshia mushinga mukole.’ (Mal. 3:17, dim.) Yehowa mmusue bua wikale ne dishindika divua nadi mupostolo Paulo, wakamba ne: “Ndi mutuishibue ne: ni ndufu, ni mmuoyo, ni mbanjelu, ni mmbulamatadi, ni mmalu a mpindieu, ni mmalu atshilualua, ni mmakokeshi, ni mbutumbuke, ni nndondo, ni ntshifukibua kayi tshikuabu tshionso, kabiena mua kutupandulula ku dinanga dia Nzambi” to. (Lomo 8:38, 39) Mu tshiena-bualu etshi, netumone mudibi ne mushinga bua kuikala ne dishindika dikole dia ne: Yehowa mmutunange, ne tshitudi mua kuenza bua kuikala nadi.

BUA TSHINYI MBIMPE TUIKALE BATUISHIBUE NE: YEHOWA MMUTUNANGE?

4. Mmunyi mutudi mua kukandamena bienzedi bia budimu bia Satana?

⁴ Tuetu batuishibue ne: Yehowa mmutunange, netukandamene tshimue tshia ku “bienzedi bia budimu” bia Satana. (Ef. 6:11) Satana neenze muende muonso bua tulekele kuenzela Yehowa mudimu. Tshimue tshia ku bienzedi biende ebi ntshiotshi etshi: mmusue kutufikisha ku diela meji ne: Yehowa ki mmutunange to; kadi ndishima dibi be! Bible utu umufuanyikija ne ntambue. (1 Pet. 5:8, 9) Ntambue itu misue kuluisha nyama itu kayiyi ne bukole, idi kayiyi mua kudisungila. Bia muomumue, misangu ya bungi Satana utu utubunda patudi batekete, batshioke anyi patudi babungame bua malu avua matufikile kale, bua ntatu itudi nayi mpindieu anyi patudi ne buôwa bua tshiatufikila malaba. (Nsu. 24:10) Mmumanye ne: udi mua kututekesha bikole bua tupange kuenzela Yehowa mudimu. Kadi tudienzejayi bua kuikala batuishibue ne: Yehowa mmutunange, dîba adi tudi mua ‘kukandamena Diabolo’ ne malu ende mabi adiye utuluisha nawu.​—Yak. 4:7.

5. Bua tshinyi mbimpe wikale mutuishibue ne: Yehowa mmukunange ne udi ukuangata ne mushinga wa bungi?

⁵ Wewe mutuishibue ne: Yehowa mmukunange, bulunda buenu nende nebusheme. Mona tshidi tshitusaka bua kuamba nanku. Yehowa mmutufuke mu mushindu wa kunanga bakuabu ne kudiumvua banangibue kudibu. Padi muntu uleja mudiye mutunange, bidi bitusaka bua kumunanga petu. Nunku wewe mutuishibue ne: Yehowa mmukunange ne udi ukuangata ne mushinga wa bungi, newumunange pebe bikole. (1 Yone 4:19) Tuetu bamunange bikole, neatunange pende bikole. Bible udi wamba ne: “Semenayi pabuipi ne Nzambi ne yeye neasemene pabuipi nenu.” (Yak. 4:8) Kadi ntshinyi tshitudi mua kuenza bua kuikala batuishibue ne muoyo mujima ne: Yehowa mmutunange?

NTSHINYI TSHIDI TSHIA MUA KUKUSHINDIKILA NE: YEHOWA MMUKUNANGE?

6. Wewe kuyi mutuishibue ne: Yehowa mmukunange, ntshinyi tshiudi mua kuenza?

⁶ Tungunuka ne kusambila Yehowa bua ufike ku dimanya tshidiye mukunangile. (Luka 18:1; Lomo 12:12) Kuoku mushindu, sambila misangu ya bungi dituku dionso, ulomba Yehowa bua akuambuluishe bua ujingulule mudiye ukumona. Misangu mikuabu udi mua kudipisha, bikupangisha bua kumona ne: mmukunange. Kadi vuluka ne: yeye mmunene kupita muoyo webe. (1 Yone 3:19, 20) Udi umona ngikadilu mimpe iudi nayi nansha muudi wewe pamuapa kuyi mumanye ne: udi nayi to. (1 Sam. 16:7; 2 Kul. 6:30) Nunku muambile iudi nayi munda, umulomba bua akuambuluishe bua ufike ku dituishibua ne: mmukunange. (Mis. 62:8) Wewe mumane kusambila, enza malu adi alonda aa.

7-8. Mmunyi mudi mukanda wa Misambu utujadikila ne: Yehowa mmutunange?

⁷ Itaba tshidi Yehowa wamba. Malu avua bafundi ba Bible bafunde bua Yehowa mmalelela bualu bavua baafunde ku bukole bua nyuma wende. Mona mêyi mimpe avua Davidi muambe bua kuleja mudi Yehowa ututabalela: “Yehowa udi pabuipi ne badi ne muoyo musunsuke; udi upandisha badi batekeshibue mu maboko.” (Mis. 34:18, dim.) Wewe ne dibungama dia bungi, udi mufuane kuela meji ne: kakuena muntu udi umvua lutatu luebe anyi udi mua kukuambuluisha to. Kadi Yehowa udi ukulaya ne: neikale nebe pabuipi bualu mmumanye ne: dîba dia buena adi, udi dijinga ne diambuluisha diende. Davidi wakamba kabidi ne: “Kelekeja binsonji bianyi mu kalondo kebe ka tshiseba.” (Mis. 56:8) Yehowa udi umona dibungama diudi nadi. Udi ukutabalela ne udi uditeka pa muaba webe. Mbienze anu bu ne: udi ukelekeja binsonji biebe ne ubiangata ne mushinga wa bungi anu mutu muntu udi wenza luendu wangata mâyi ende a kunua adi mu mulangi ne mushinga wa bungi, kayi witaba bua nansha makese aye panshi to. Misambu 139:3 udi wamba ne: ‘Wewe, Yehowa, udi mumanye njila yanyi yonso bimpe.’ Yehowa udi umona malu onso audi wenza, kadi udi wimanyina anu pa adi mimpe. (Eb. 6:10) Bua tshinyi? Bualu udi wangata bionso biudi wenza bua kumusankisha ne mushinga wa bungi.a

⁸ Yehowa udi ukuambila mêyi a mu Bible adi akolesha aa bua kukujadikila ne: udi ukutabalela ne mmukunange bikole. Kadi anu mutudi bamone, Satana mmusue bua witabe ne: Yehowa ki mmukunange to. Biobi bikufikile bua kumona ne: Yehowa ki mmukunange, anji imana, udiebeje ne: ‘Ngitabe tshia nganyi? Tshia “tatu wa dishima” anyi tshia “Nzambi wa bulelela”?’​—Yone 8:44; Mis. 31:5.

9. Ntshinyi tshidi Yehowa ujadikila bantu badi bamunange? (Ekesode 20:5, 6)

⁹ Elangana meji a mudi Yehowa umvua bua bantu badi bamunange. Mona tshivuaye muambile Mose ne bena Isalele. (Bala Ekesode 20:5, 6.) Yehowa mmulaye ne: neatungunuke ne kuleja bantu badi bamunange dinanga dia lulamatu. Mêyi aa adi atujadikila ne: bu mudiye Nzambi wa lulamatu, kakupanga kunanga muntu udi mumunange nansha. (Neh. 1:5) Wewe wela meji imue misangu ne: ki mmukunange, anji imana, udiebeje ne: ‘Meme ndi mumunange anyi?’ Biwikala mumunange ne udienzeja bua kumusankisha, manya ne: mmukunange pende bikole. (Dan. 9:4; 1 Kol. 8:3) Mu mêyi makuabu, wewe mutuishibue ne: Yehowa mmukunange, kuakuikala ne dielakana bua bualu abu to. Ikala mutuishibue ne: mmukunange ne kena mua kukulekela nansha kakese.

10-11. Ntshinyi tshidi Yehowa musue ne: uvuluke bua tshia kupikulangana natshi? (Galatiya 2:20)

¹⁰ Elangana meji a tshia kupikulangana natshi. Mulambu wa Yezu Kristo wa tshia kupikulangana natshi ndipa ditambe bunene didi Yehowa mupeshe bantu. (Yone 3:16) Kadi mmutshifile buebe wewe pebe anyi? Eyowa! Tuakulabi bua mupostolo Paulo. Kumpala kua kuluaye muena Kristo, uvua muenze mpekatu minene, kadi uvua ne bua kutungunuka ne kuluangana ne butekete buende. (Lomo 7:24, 25; 1 Tim. 1:12-14) Nansha nanku, wakalua kutuishibua ne: Yehowa uvua mufile tshia kupikulangana natshi buende yeye. (Bala Galatiya 2:20.) Manya ne: Yehowa ke uvua musake Paulo bua kufunda mêyi au. Malu onso adi mu Bible mbaafunde bua kutulongesha. (Lomo 15:4) Mêyi a Paulo adi aleja ne: Yehowa mmusue bua wewe umone tshia kupikulangana natshi bu dipa didiye mufile bua bualu buebe. Wewe utshimona mushindu au, nebikushindikile ne: Yehowa mmukunange.

¹¹ Tudi tuela Yehowa tuasakidila bua muvuaye mutume Yezu pa buloba bua kutufuila ne bua kulongesha bantu malu malelela adi amutangila. (Yone 18:37) Mu malu malelela au mudi bualu bua ne: Yehowa mmunange bana bende.

YEZU UDI UKUJADIKILA NE: YEHOWA MMUKUNANGE

12. Bua tshinyi tudi tuitaba malu avua Yezu muambe bua Yehowa?

¹² Pavua Yezu pa buloba, uvua musue kumanyisha bantu tshivua Yehowa menemene. (Luka 10:22) Tudi tuitaba malu onso avua Yezu muambe bua Yehowa, bualu uvua musombe ne Tatu wende mu diulu bikole. (Kolos. 1:15) Yezu mmumanye mudi Tatu wende mumunange bikole. Mmumanye kabidi mudiye munange banjelu ba lulamatu ne bantu bonso ba lulamatu badi pa buloba. Mmushindu kayi udi Yezu wambuluisha bakuabu bua bafike ku dituishibua ne: Nzambi mmubanange?

13. Ntshinyi tshidi Yezu musue tumanye bua Yehowa?

¹³ Yezu mmusue tumanye mudi Yehowa umvua bua bualu buetu. Yezu mmubikile Yehowa mu Evanjeliyo ne: “Tatu” misangu mipite pa 160. Pavuaye uyukila ne bayidi bende uvua wamba ne: “Tatu wenu” anyi ne: “Tatu wenu udi mu diulu.” (Mat. 5:16; 6:26) Kumpala kua kuluaye pa buloba, batendeledi ba Nzambi ba lulamatu bavua babikila Yehowa mu mianzu eyi: ‘Wa Bukole Buonso,’ ‘Mutambe Bunene,’ ‘Mufuki Munene,’ ne mu mianzu mikuabu kabidi. Mbiumvuike bimpe ne: Yezu mmusue bua tumone Yehowa mudiye umumona, tuambe ne: tumumone bu Tatu muimpe udi munange bana bende bikole. Uvua mutele muaku “Tatu” mu bilejilu bibidi bivuaye mufile. Tubikonkononayi.

14. Mmunyi muvua Yezu muleje ne: yonso wa kutudi udi ne mushinga wa bungi ku mêsu kua Tatu wetu wa mu diulu? (Matayi 10:29-31) (Tangila kabidi tshimfuanyi.)

¹⁴ Tukonkononayi tshilejilu tshia kumpala tshidi mu Matayi 10:29-31. (Bala.) Mishamisha ntunyunyi tukese tudi katuyi mua kunanga Yehowa anyi kumutendelela. Kadi Tatu wetu udi wangata mushamusha wonso ne mushinga wa bungi, ke bualu kayi nansha padiwu umata panshi mmumanye. Abi bitujadikila ne: bu mudiye wangata tunyunyi tukese etu ne mushinga wa bungi, udi utabalela yonso wa kutudi bualu tudi bamunange ne tumutendelela. Yezu wakamba kabidi ne: Tatu wetu mmumanye bungi bua nsuki ya ku mutu kuetu. Bu mudi Yehowa mumanye too ne tuntu tukese tua pambidi petu, bidi bitujadikila ne: udi ututabalela bikole menemene. Bulelela, Yezu mmusue bua tuikale batuishibue ne: yonso wa kutudi udi ne mushinga wa bungi ku mêsu kua Tatu wetu wa mu diulu.

15. Mêyi a Yezu adi mu Yone 6:44 adi atuambila tshinyi bua Tatu wetu wa mu diulu?

¹⁵ Tukonkononayi tshilejilu tshibidi tshia muvua Yezu mutele muaku “Tatu.” (Bala Yone 6:44.) Tatu webe wa mu diulu mmukukoke, mukubueje mu bulelela. Bua tshinyi? Bualu uvua mumone ne: uvua ne ngikadilu mimpe. (Bien. 13:48) Pavua Yezu muambe mêyi adi mu Yone 6:44 au, pamuapa uvua mutume meji ku mêyi a Yehowa adi mu Yelemiya 31:3 a ne: “Ndi mukukoke kundi ne dinanga dia lulamatu.” (Yel. 31:3; fuanyikija ne Hoshea 11:4.) Tudi ne dianyisha dia bungi bua bualu abu. Tatu wetu wa mu diulu mmutunange bikole, udi umona ngikadilu yetu mimpe itudi pamuapa katuyi nansha bamanye ne: tudi nayi to.

16. a) Ntshinyi tshidi Yezu mukulongeshe? Bua tshinyi udi utshitaba? b) Ntshinyi tshidi mua kutamba kukujadikila ne: Yehowa udi Tatu mutambe buimpe buebe wewe? (Tangila kazubu ka “Tatu utudi bonso nende dijinga.”)

¹⁶ Yezu mmukulongeshe ne: Yehowa udi Tatu wende ne Tatu webe pebe. Mmusue wikale mutuishibue ne: Yehowa mmukunange ne udi ukutabalela bikole. Nunku biwikala imue misangu umona bu ne: Yehowa ki mmukunange, vuluka tshivua Yezu muambe bua Tatu wende ne utshitabe, bualu utu anu wamba bulelela ne yeye ke udi mumanye Tatu wetu bimpe menemene.​—1 Pet. 2:22.

DIENZEJA BUA KUSHALA ANU MUTUISHIBUE NE: YEHOWA MMUKUNANGE

17. Bua tshinyi tudi ne bua kuikala anu batuishibue ne: Yehowa mmutunange?

¹⁷ Mbimpe tuenze muetu muonso bua kuikala anu batuishibue ne: Yehowa mmutunange. Tudi balonge ne: Satana mmuimanyine kuulu, ukeba anu ne: tulekele kuenzela Yehowa mudimu. Mmusue kututekesha. Ke bualu kayi neatungunuke anu ne kuenza tshionso tshia kuenza bua kutufikisha ku dimona ne: Yehowa ki mmutunange to. Tuenzayi bua ele bua tshiombe musabu!​—Yobo 27:5.

18. Ntshinyi tshiudi mua kuenza bua wikale anu mutuishibue ne: Yehowa mmukunange?

¹⁸ Tudi balonge mu tshiena-bualu etshi ne: bua wewe kuikala mutuishibue ne: Yehowa mmukunange, ikala usambila, umulomba bua akufikishe ku dijingulula ngikadilu mimpe idiye umona kuudi. Ikala welangana meji a mvese idi yumvuija mudi Yehowa munange bikole bantu badi bamunange. Ikala muvuluke ne: Yehowa neatungunuke anu ne kunanga muntu udi mumunange. Ikala kabidi muvuluke ne: Yehowa wakafila tshia kupikulangana natshi bua bualu buebe. Itaba tshivua Yezu muambe, tshia ne: Yehowa udi Tatu webe. Dîba adi muntu yeye mukuebeje bua kumanya ni udi mutuishibue ne: mmukunange, neumuandamune ne dishindika dionso ne: “Eyowa, mmunnange! Meme panyi ndi ndienzeja dituku dionso edi bua kuleja ne: ndi mumunange!”