Muntu mubanji ne Lazalo bavua banganyi?

Diandamuna dia mu Bible

Lusumuinu lua muntu mubanji ne Lazalo ludi mu muyuki kampanda wa Yezu. (Luka 16:19-31) Bantu abu badi baleja bisumbu bibidi bia bantu ebi: 1) bamfumu ba bitendelelu bena Yuda bavua ne lutambishi tshikondo tshia Yezu, 2) bantu bena bupuekele ne ba muoyo mutoke bavua bitabe mukenji wa Yezu.

Mu tshiena-bualu etshi netuandamune nkonko eyi:

• Yezu wakamba tshinyi bua muntu mubanji ne Lazalo?

• Mbualu bulelela buvua buenzeke anyi?

• Bualu ebu budi butujadikila ne: dilongesha dia inferno wa kapia ndilelela anyi?

• Lusumuinu lua muntu mubanji ne Lazalo ludi lumvuija tshinyi?

Yezu wakamba tshinyi bua muntu mubanji ne Lazalo?

Mu Luka nshapita wa 16, Yezu wakakula bua bantu babidi bavua bashintuluke bikole.

Mona mu tshikoso bualu buvua Yezu mulonde: Kuvua muntu mubanji mukuabu uvua ne nsombelu mulenga wa katshia. Bavua bateke mulombi wa ka pa luse mukuabu diende Lazalo ku tshiibi tshiende; uvua ujinga bua bamupeshe biakudia bivua bimata ku mêsa a muntu mubanji. Mu kupita kua matuku, Lazalo wakafua ne banjelu bakaya nende ku luseke lua Abalahama. Muntu mubanji wakafua pende ne bakamujiika. Mu lusumuinu elu, mbakule bu ne: bantu babidi abu bakadimanya panyima pa lufu luabu. Muntu mubanji ukavua mufue au uvua ukengakana mu kapia kadi kalakuka; yeye kulomba Abalahama bua atume Lazalo bua atue munu wende mu kamata ka mâyi bua kutalaja ludimi luende. Abalahama wakabenga dilomba dia muntu mubanji au, kulejaye ne: nsombelu wa bantu babidi abu uvua mushintuluke kashidi; kabidi ne: mbajadike lupongo lunene pankatshi pa bantu abu kakuyi mushindu wa kusambuka to.

Mbualu bulelela buvua buenzeke anyi?

Tòo. Ntshilejilu tshivua Yezu mufile bua kulongesha bualu kampanda. Nansha bamanyi ba malu a mu Bible badi bitaba pabu ne: tshivua tshilejilu. Tshilejilu, mu Bible mukuabu wa Luther wa mu 1912, mutu wa mukanda udi uleja ne: ndusumuinu. Mu Bible mukuabu wa bena Katolike, dimanyisha dia kuinshi kua dibeji didi dileja ne: ‘ndusumuinu, ki mbualu bulelela buvua buenzeke to.’​—Jerusalem Bible.

Yezu uvua usua kulongesha ne: bafue batu ne muoyo anyi? Uvua usua kuleja ne: bantu bakuabu batu bakengakana mu inferno wa kapia ne bantu bimpe bu mudi Abalahama ne Lazalo bakaya mu diulu anyi? Kudi bijadiki bia bungi bidi bileja ne: kabiena nanku to.

Tuakule bua malu asatu aa:

• Bu muntu mubanji yeye ukengakana mu kapia ketu kena dîna aka, kamata ka mâyi kavua ku lusongo lua munu wa Lazalo kakavua mua kuma musangu umue anyi?

• Kamata ka mâyi kamuepele kakena mua kujikija nyota ya muntu udi mu kapia ketu kena dîna aka to.

• Bu Abalahama muikale mu diulu, Yezu kavua mua kujadika patoke pavuaye pa buloba ne: kakuvua muntu ukavua mubande mu diulu to. (Yone 3:13)

Bualu ebu budi butujadikila ne: dilongesha dia inferno wa kapia ndilelela anyi?

Tòo. Nansha mudi bamue bamanye ne: bualu abu ki mbulelela, badi bamba mudibu bujadika anu ne: bantu bimpe badi baya mu diulu ne bantu babi badi baya mu inferno wa kapia.a

Kuamba nanku nkumana bualu anyi? Tòo.

Dilongesha dia inferno wa kapia kadiena dipetangana ne tshidi Bible ulongesha bua tshidi tshienzekela muntu padiye ufua to. Tshilejilu, Bible kena ulongesha ne: bantu bimpe badi basanka mu diulu anyi ne: badi bakengesha bantu babi mu inferno wa kapia to. Kadi udi wamba patoke ne: “Badi ne muoyo mbamanye ne: nebafue, kadi bafue ki mbamanye bualu nansha bumue.”​—Muambi 9:5.

Lusumuinu lua muntu mubanji ne Lazalo ludi lumvuija tshinyi?

Lusumuinu alu ludi lumvuija ne: nsombelu wa bisumbu bibidi bia bantu uvua ne bua kushintuluka bikole.

Bidi bimueneka ne: muntu mubanji uvua tshimfunyi tshia bamfumu ba bitendelelu bena Yuda, “bavua banangi ba makuta.” (Luka 16:14) Bavua muaba au pavua Yezu ulongesha, kadi kabakitaba mukenji wende to. Bavua bamona bantu bakuabu bashadile kudibu bikole. (Yone 7:49)

Lazalo uvua tshimfuanyi tshia bantu bavua bitabuje mukenji wa Yezu ne bavuabu bapepeja kudi banfumu ba bitendelelu bena Yuda.

Nsombelu wa tshisumbu tshionso uvua mushintuluke bikole.

• Bamfumu ba bitendelelu bena Yuda bavua bela meji ne: Nzambi uvua ubanyisha. Kadi bivua bienze anu bu ne: bavua bafue pavua Nzambi kayi ubanyisha bobu ne ntendelelu wabu bualu bavua babenge malongesha a Yezu. Nunku malongesha a Yezu ne bayidi bende bivua bibuosha bikole.​—Matayi 23:29, 30; Bienzedi 5:29-33.

• Bantu bavua bamfumu babu ba bitendelelu balengulule mukantshi mua bidimu bia bungi bakavua mpindieu mu nsombelu muimpe. Ba bungi bavua bitabe malongesha a Yezu, kubapeteshabi mushindu wa Nzambi kubabenesha bua kashidi.​—Yone 17:3.