Bible udi mua kumpetesha busambi anyi?
Diandamuna dia mu Bible
Eyowa. (Lomo 15:4) Mona mvese idi mikoleshe bantu ba bungi badi ne ntatu ne tunyinganyinga.
Mu tshiena-bualu etshi, netumone malu aa:
Ntatu
Misambu 23:4: “Nansha mundi ngendela mu tshibandabanda tshia mîdima mikole, tshiena ntshina bualu bubi, bualu wewe udi nanyi.”
Diumvuija: Paudi usambila, utumikila mibelu ya mu Bible Dîyi dia Nzambi, udi mua kutua ntatu tshiadi ne dikima.
Filipoyi 4:13: “Bua malu onso ndi ne bukole ku diambuluisha dia yeye udi umpesha bukole.”
Diumvuija: Nzambi udi mua kukupesha bukole bua kupita ne lutatu kayi luonso.
Difuisha muntu
Muambi 9:10: “Kakuena mudimu anyi kulongolola kua malu anyi dimanya peshi meji mu Lukita.”
Diumvuija: Bafue kabatu bakenga to; kabena mua kutuenzela bibi nansha. Ki mbamanye bualu nansha bumue to.
Bienzedi 24:15: “Nekuikale dibishibua dia bantu ku lufu.”
Diumvuija: Nzambi udi mua kubisha bantu batudi bafuishe ku lufu.
Kutamba kudipisha
Misambu 86:5: “Bualu wewe, Yehowa,a udi muimpe ne udi mudiakaje bua kubuikidilangana; udi muwule tente ne dinanga dia lulamatu kudi bonso badi bakubila.”
Diumvuija: Nzambi udi ubuikidila badi banyingalala bua bilema biabu bia kale ne badisuika bua kubenga kuenza kabidi bilema abi.
Misambu 103:12: “Anu bu mudi kudi dîba dipatukila kuikale kule menemene ne kudi dîba dibuelela, ke mudiye musemeje dishipa dietu dia mikenji kule menemene netu.”
Diumvuija: Patu Nzambi ubuikidilangana, mbienze anu bu ne: udi usemeja mpekatu yetu kule netu menemene. Kena utuvuluijayi njila ne njila bua kututandisha anyi kutunyoka to.
Dibungama
Misambu 31:7: “Udi mumone lutatu luanyi; udi mumanye dikenga dianyi dikole.”
Diumvuija: Nzambi mmumanye bimpe menemene bionso bidi bikukengesha. Mmumanye bimpe muudi umvua menemene, nansha bakuabu bobu kabayi bamanye to.
Misambu 34:18: “Yehowa udi pabuipi ne badi ne muoyo musunsuke; udi upandisha badi bazajibue mu lungenyi luabu.”
Diumvuija: Nzambi mmulaye bua kukuambuluisha paudi mubungame. Udi mua kukupesha bukole bua kupita ne kanyinganyinga kaudi naku.
Disama
Misambu 41:3: “Yehowa neamukuatshishe pa bulalu buende bua disama.”
Diumvuija: Nzambi udi mua kukuambuluisha bua kupita ne disama dikole, ukupesha ditalala mu muoyo pamue ne bukole, dinanukila, ne meji bua kuangata mapangadika mimpe.
Yeshaya 33:24: “Muntu nansha umue udi musombele mu ditunga kakuamba ne: ‘Ndi nsama.’”
Diumvuija: Nzambi mmulaye ne: dimue dituku bantu bonso nebikale ne makanda a mubidi tumatuma.
Kanyinganyinga
Misambu 94:19: “Pavua tunyinganyinga tumpite bukole, wewe wakansamba, wewe kumpesha ditalala.”
Diumvuija: Tuetu beyemene Nzambi patudi ne kanyinganyinga, udi mua kutuambuluisha bua kushala batukije.
1 Petelo 5:7: “[Numupuile] ntatu yenu yonso, bualu yeye udi unutabalela.”
Diumvuija: Nzambi udi ututabalela patudi tukenga. Udi utulomba bua tumuambile ntatu yetu mu disambila.
Mvita
Misambu 46:9: “Udi ujikija mvita pa buloba buonso bujima.”
Diumvuija: Bukalenge bua Nzambi nebujikije mvita yonso mu matuku makese emu.
Misambu 37:11, 29: “Bena bupuekele nebapiane buloba, nebikale ne disanka dipite bungi mu ditalala divule. . . . Bantu bakane nebapiane buloba, nebasombapu bua kashidi.”
Diumvuija: Badi benza malu mimpe nebasombe pa buloba mu ditalala bua kashidi.
Ditshina matuku atshilualua
Yelemiya 29:11: “‘Ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena.’”
Diumvuija: Nzambi mmulaye bantu bende matuku atshilualua mimpe.
Buakabuluibua 21:4: “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”
Diumvuija: Nzambi mmulaye bua kujikija malu mabi onso adi enzeka lelu.
a Yehowa ndîna menemene dia Nzambi. (Misambu 83:18) Bala tshiena-bualu tshia “Yehowa nnganyi?”