Mvita ya mu Ukraine idi ivudija biyole bia nzala pa buloba bujima

Mu dia 19/5/2022, banene ba mbulamatadi bapite pa 75 bavua bamanyishe bena mu tshipangu tshia malu a bukubi tshia Bulongolodi bua matunga masanga (ONU) ne: “Dipangika dia biakudia pa buloba bujima (dimana kunekesha kudi tshipupu tshia korona ne dinyanguka dia mivu) didi dienda dikola kabidi bikole bua kubuejadi biyole bia nzala pa buloba bujima anu bua mvita idi mu Ukraine.” Ke tshikandakanda tshia The Economist kuluatshi kuamba patshi ne: “Mvita idi yenda ibueja kabidi midita ne midita ya bantu bakavua basuba ne ntatu ya bungi mu biyole bia nzala bipite bubi.” Bible ukavua muleje ne: biyole bia nzala bivua mua kuikalaku matuku atudi aa; kadi udi kabidi utuleja mua kupita nabi.

Bible ukavua mubimanyishe

•  Yezu wakadianjila kumanyisha ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala.”​—Matayi 24:7.

•  Mu Buakabuluibua, Bible udi umvuijamu malu a bendeshi ba tubalu banayi ba mu tshimfuanyi. Umue wa kudibu udi tshimfuanyi tshia mvita. Mukuabu udi umulondela udi tshimfuanyi tshia tshiyole tshia nzala, tuambe ne: ntshikondo tshivua bantu mua kuikala bapanyishangana biakudia anu bikese kadi ku mushinga mukole bua dipangika diabi. Badi bamba mu Bible ne: “Meme kumona kabalu kafiike. Uvua mubandepu uvua ne tshipiminu mu bianza. Meme kumvua bu diyi . . ., diamba ne: ‘Kilo umue wa ntete ya kuenza bukula, nansha kilo isatu ya ntete ya orje ikale [mushinga wa] difutu dia mudimu wa dituku dimue.’”​—Buakabuluibua 6:5, 6, Mukanda wa Mvidi Mukulu [wa Mishonyi].

Mêyi a buprofete a mu Bible adi akula bua biyole bia nzala aa adi enda akumbana lelu eu udi Bible ubikila ne: ‘Mmatuku a ku nshikidilu.’ (2 Timote 3:1) Wewe musue kumanya malu makuabu a “matuku a ku nshikidilu” ne malu a luendu lua bendeshi ba tubalu banayi abu, tangila filme wa Malu a panu mmashintuluke katshia ku 1914, ubale kabidi tshiena-bualu tshia “Bendeshi ba tubalu banayi mbanganyi?”

Mudi Bible mua kukuambuluisha

•  Mu Bible mudi mibelu mimpe idi ituleja mua kupita ne ntatu idi itukuata, too ne ya dibanda dia biakudia mushinga, nansha ya biyole bia nzala. Tangilabi mibelu idi mu tshiena-bualu tshia “Muudi mua kutula makuta makese audi nawu.”

•  Bible udi kabidi utupetesha ditekemena dia ne: nsombelu nealengele kumpala eku. Udi wakula bua tshikondo atshi ne: “Nekuikale ntete ya bungi pa buloba,” ne muntu yonso neadie yeye kutshionkomoka. (Misambu 72:16) Bua kumanya malu makuabu a ditekemena dia mu Bible bua matuku adi alua, ne tshiudi mua kuitabila malu adi Bible ulaya au, bala tshiena-bualu tshia “Ditekemena dilelela dia matuku atshilualua mimpe.”