Biyole bia nzala pa buloba bujima bikebesha kudi mvita ne dinyanguka dia malu a mivu—Ntshinyi tshidi Bible wamba?

Mvita ya mu Ukraine pamue ne ntatu idi ifumina ku dinyanguka dia malu a mivu bidi bitungunuka ne kukebesha biyole bia nzala pa buloba bujima. Bidi nanku nangananga mu matunga mapele mudi ba bungi batata bua kupeta biakudia bikumbane.

“Mvita, dinyanguka dia malu a mivu, dibanda dia kasolonyi ne bikuabu bidi bipangishangana bua kudima biakudia anyi kubipeta.”—António Guterres, mulombodi wa Bulongolodi bua matunga masanga, 17/7/ 2023.
“Bamanyi bapiluke badi bela meji ne: dipatuka dia ditunga dia Russie mu diumvuangana dia kupana biakudia mu matunga makuabu nedivudije biyole bia nzala pa buloba bujima ne nedibandishe biakudia mushinga bikole mu matunga mapele, nangananga mu Afrike wa ku nord anyi mu Azi.”—Atalayar.com, 23/7/2023.

Mona tshidi Bible wamba bua biyole bia nzala ne bua matuku atshilualua.

Bible ukavua mumanyishe biyole bia nzala

Yezu wakamanyisha ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala.”—Matayi 24:7.
Mukanda wa Buakabuluibua udi wakula bua bendeshi ba tubalu banayi ba mu tshimfuanyi. Umue wa kudibu udi uleja mvita. Bamulondela kudi mukuabu udi uleja biyole bia nzala, mmumue ne: tshikondo tshivua biakudia ne bua kuikala anu bikese kadi babipanyisha ku mushinga mukole. “Meme kumona kabalu kafiike. Uvua mubandepu uvua ne tshipininu mu bianza. Meme kumvua bu diyi . . . diamba ne: ‘Kilo umue wa ntete ya kuenza bukula, nansha kilo isatu ya ntete ya orje ikale difutu dia mudimu wa dituku dimue.’”—Buakabuluibua 6:5, 6, Mukanda wa Mvidi Mukulu (Mishonyi).

Mêyi a buprofete a mu Bible adi akula bua biyole bia nzala aa adi enda akumbana lelu eu mu tshikondo tshidi Bible ubikila ne: ‘Mmatuku a ku nshikidilu.’ (2 Timote 3:1) Bua kumanya bia bungi pa bidi bitangila “matuku a ku nshikidilu” ne luendu lua bendeshi ba tubalu tua mu Buakabuluibua, tangila filme wa Malu a panu mmashintuluke katshia ku 1914 anyi bala tshiena-bualu tshia “Bendeshi ba tubalu banayi mbanganyi?”

Mudi Bible mua kukuambuluisha

Mu Bible mudi mibelu mimpe idi ituleja mua kupita ne ntatu mikole idi itukuata, too ne ya dibanda dia biakudia mushinga, nansha ya biyole bia nzala. Bala mibelu idi mu tshiena-bualu tshia “Muudi mua kutula makuta makese audi nawu.”
Bible udi kabidi utupetesha ditekemena dia ne: nsombelu nealengele kumpala eku. Udi wakula bua tshikondo atshi ne: “Nekuikale ntete ya bungi pa buloba,” muntu yonso neadie yeye kutshionkomoka. (Misambu 72:16) Bua kumanya bia bungi pa bidi bitangila ditekemena dia mu Bible bua matuku adi alua, ne tshiudi mua kuitabila malu adi Bible ulaya au, bala tshiena-bualu tshia “Ditekemena dilelela dia matuku atshilualua mimpe.”