NUSHALE BATABALE!

Diasangana pa buloba bujima—Ntshinyi tshidi Bible wamba?

MAPIAMAPIA: 27/4/2023

Diasangana dibi menemene didi ditungunuka ne kukebesha lufu lua bantu ba bungi pa buloba bujima. Mona bilejilu ndambu bia matuku adi panshi aa.

“Mu États-Unis, tshidimu tshionso etshi badi bashipa bantu ba bungi bikole, mmumue ne: muntu umue lumingu luonso elu.”—21/4/2023, The Guardian.
“Mu Afrique du Sud, bavua base bantu 10 ba mu dîku dimue kuabu, kuvua bantu bakaji 7 ne muana wa balume umue wa bidimu 13.”—21/4/2023, AP News.
“Mu Allemagne (Hambourg), muabilayi mukuabu uvua muase bantu 6 muaba wa ntendelelu wa Bantemu ba Yehowa kumpala kua kudishipaye.”—10/3/2023, Reuters.

Bible udi ukolesha bantu badi bakenga bua malu a kanyawu a buena aa. Bua kumona tshilejilu tshia bualu bulelela buvua buenzeke, tangila filme wa DeJanerio Brown: Tudi batshibuila panshi kadi katuena babutula.

Bible udi utuambuluisha kabidi bua kumvua bua tshinyi malu a kanyawu a nunku adi enzeka. Bua kumanya malu a bungi adi atangila tshiena-bualu etshi, tangila filme wa Nzambi mmulekele makenga bua tshinyi?

Mu ngondo wa 7/2022, bantu mbasangane pa buloba bujima:

“Dishipibua dia muena tshididi kampanda muende lumu wa mu ditunga dia Japon [uvua kumpala kavula mbedi diende Shinzo Abe] divua ditonde bena mu ditunga adi ne bantu bonso ba pa buloba, bualu mu ditunga adi kamutu muenzeka malu a tshikisu to, ne mbelamu mikenji mishile idi itangila bingoma.”—10/7/2022, The Japan Times.
“Mbipitshile bena mu ditunga dia Danemark bikole bua kumona muabilayi mukuabu muambule tshingoma mpila muonji ushipa bantu basatu muaba wa dipanyina bintu mu Copenhague, tshimenga tshikulu tshia ditunga edi.”—4/7/2022, Reuters.
“Mbase bantu 15 mu nganda wa mu Soweto mu ditunga dia Afrique du Sud.”—10/7/2022, The Guardian.
“Mbase bantu bapite pa 220 mu États-Unis mu matuku a dikisha dia 4/7/2022.”—5/7/2022, CBS News.

Malu a tshikisu a nunku neajikaku dimue dituku anyi? Ntshinyi tshidi Bible wamba?

Dijika dia tshikisu

Bible udi ubikila matuku etu aa ne: “matuku a ku nshikidilu,” tshikondo tshidi bantu ne bua kuikala bena luonji, benzelangana malu mabi a tshikisu. (2 Timote 3:1, 3) Malu a tshikisu a nunku adi ashiya bantu ne buôwa. (Luka 21:11) Bible mmulaye ne: nekuikale tshikondo tshiajika malu a tshikisu, ne “bantu . . . nebasombele muaba udi ditalala dia kashidi, mu miaba ya kusombela ya bukubi ne mu miaba ya kuikishila ya bupole.” (Yeshaya 32:18) Kadi tshikisu netshijike mushindu kayi?

Nzambi neumbushe bantu babi ne neabutule bia mvita bionso.

“Kadi bantu babi, nebumbushibue pa buloba.”—Nsumuinu 2:22.
“[Nzambi] udi ujikija mvita pa buloba buonso bujima. Udi utshibula buta bua mikete ne usunsula difuma; udi wosha matempu a basalayi ne kapia.”—Misambu 46:9.

Nzambi neajikije tshikebeshi tshia malu a tshikisu palongeshaye bantu bua kusomba mu ditalala.

“Kabiakuenzelangana bibi anyi kukebesha tshinyangu mu mukuna wanyi wonso wa tshijila to, bualu buloba nebuwule tente bushuwa ne dimanya dia Yehowa bu mudi mâyi abuikila mbuu.”—Yeshaya 11:9.
Nansha mpindieu, Nzambi ukadi ulongesha bantu pa buloba bujima bua kulekela dienzelangana malu a tshikisu ne diasangana, bua ‘bafule miele yabu ya mvita bayivuije nkasu ya kudima nayi ne mafuma abu baavuije miele ya kusonza nayi mitshi.’—Mika 4:3.

Bua kumanya malu a bungi a mudi Bible mulaye ne: bantu nebasombe kabayi batshina tshintu, bala tshiena-bualu tshia ne: “Affranchis de la peur: est-ce possible?”

Bua kumanya tshienzeka bua tshikisu tshijike bua kashidi, bala tshiena-bualu tshia ne: “Enfin la paix sur la terre!”