Bena tshididi badi bamba mukadi mvita ya Armagedone pa kuenzeka​—Ntshinyi tshidi Bible wamba?

Mu Dimue dia 10/10/2022 mu dinda, tshiluilu tshia Russie tshivua tshikupe bingoma bia mbutula mu bimenga bia mu ditunga dia Ukraine bua tshiji tshivuabu natshi bualu matuku abidi kumpala, midilu ivua mituke ku tshilamba tshinene tshidi tshituangaja buloba bua Crimée ne ditunga dia Russie mitshinyange. Mutantshi mukese kumpala kua bualu ebu kuenzeka, bena tshididi bakavua bambe ne: pamuapa mvita ya Armagedone ikadi pa kuenzeka.

• Mu dia 6/10/2022, Joe Biden, mfumu wa ditunga dia États-Unis uvua muambe ne: “Katutu banji kumona kabidi malu adi mua kufisha ku Armagedone katshia ku tshikondo tshia John Kennedy [mfumu wa ditunga dia États-Unis], dîba divua ditunga dia États-Unis dikeba kubutulangana ne dia Union soviétique ne bingoma binene bia mbutula. . . . Ndi ngela meji ne: katuena mua kuluangana mvita ya bingoma binene bia mbutula bia mushindu eu kabiyi bifikisha ku Armagedone to.”

• Pavua bena ku tudiomba tua BBC News bebeje Volodymyr Zelensky (mfumu wa ditunga dia Ukraine) mu dia 8/10/2022 bua tshivua mvita ya bingoma bia mbutula eyi ne bua kukebesha, wakamba ne: “Ndi ngela meji ne: etshi netshikale anu Armagedone, ne bantu ba pa buloba bujima badi mu njiwu.”

Mvita ya bingoma bia mbutula neyifikishe ku Armagedone anyi? Ntshinyi tshidi Bible wamba?

Mvita ya bingoma bia mbutula neyikebeshe Armagedone anyi?

Tòo. Mu Buakabuluibua 16:16 ke muaba umuepele udibu bakule bua muaku Armagedone mu Bible. Armagedone kena umvuija mvita ya matunga aluishangana nkayawu to, kadi mmvita ya Nzambi ne “bakalenge ba pa buloba bujima budi bantu basombele.” (Buakabuluibua 16:14) Nzambi neabutule makalenge a bana ba bantu ku mvita ya Armagedone.​—Danyele 2:44.

Bua kumanya malu makuabu a tshikale mvita ya Armagedone mua kuenzela buloba, bala tshiena-bualu tshia: Mvita ya Armagedone ntshinyi?

Mvita ya bingoma bia mbutula neyibutule buloba ne bantu bonso anyi?

Tòo. Bakalenge ba panu badi mua kuluangana mvita ya bingoma bia mbutula kumpala eku, kadi Nzambi kakuitaba bua babutule buloba to. Bible udi wamba ne:

• “Buloba budi bushalaku kashidi.”​—Muambi 1:4.

• “Bantu bakane nebapiane buloba, nebasombapu bua kashidi.”​—Misambu 37:29.

Nansha nanku, mêyi a buprofete a mu Bible ne malu adi enzeka lelu adi aleja ne: mu katupa kîpi emu, malu neashintuluke bikole pa buloba. (Matayi 24:3-7; 2 Timote 3:1-5) Mona tshidi Bible wamba bua matuku atshilualua ku diambuluisha dia Dilonga dia Bible dia nuenda nuyukila kuyi ufuta makuta.