Mudi Bible mua kutuambuluisha bua kumvuilangana
“Bua kuikalaku ditalala pa buloba, bantu badi ne bua kumvuilangana.”—UNESCO, Déclaration de principes sur la tolérance, 1995.
Ku lukuabu luseke, dibenga kumvuilangana didi mua kusaka bantu ku dibenga kunemekangana anyi ku dikinangana. Padi bantu badiumvua nanku, badi mua kubanga kuakula mêyi a lukinu, kuikala ne kansungansunga, anyi kuenza malu a tshikisu.
Kadi bantu badi ne mmuenenu mishilangane pa tshidi kumvuilangana kumvuija. Bamue badi bela meji ne: bantu badi bumvuilangana badi ne bua kuitaba bionso bidi bakuabu benza. Bakuabu badi bamona ne: bantu badi bumvuilangana badi ne bua kunemeka bukenji bua muntu yonso bua kudisunguila malongesha anyi bikadilu biende, nansha bobu kabayi babinange. Ke tshidi Bible pende wamba.
Bible udi mua kuambuluisha bantu bua kumvuilangana lelu anyi?
Tshidi Bible wamba bua kumvuilangana
Bible udi utukankamija bua tuikale tumvuilangana. Udi wamba ne: “Enzayi bua bantu bonso bamanye munudi kanuyi bena malu makole.” (Filipoyi 4:5) Bible udi utukankamija bua kutabalela bakuabu, kubanemeka, anyi kubenzela malu makane. Pamuapa bantu badi batumikila mubelu au kabakuitaba anyi kulonda bikadilu bia muntu mukuabu to, kadi badi banyishila muntu au bua kudituala bilondeshile mapangadika ende.
Bible udi uleja ne: Nzambi mmuelele bantu mikenji. Udi wamba ne: “Wewe muntu, [Nzambi] mmukuambile tshidi tshimpe.” (Mika 6:8) Udi ne mibelu idi Nzambi mupeshe bantu bua bikale ne nsombelu mutambe buimpe.—Yeshaya 48:17, 18.
Nzambi ki mmutupeshe bukokeshi bua kulumbuluisha bakuabu to. Bible udi wamba ne: “Kudi anu muntu umue udi Muedi wa mikenji ne Mulumbuluishi . . . Wewe udi nganyi bua kulumbuluisha mukuebe?” (Yakobo 4:12) Nzambi mmupeshe yonso wa kutudi budikadidi bua kudisunguila malu ambuilaye bujitu buawu.—Dutelonome 30:19.
Tshidi Bible wamba bua kanemu
Bible udi utulomba ne: “Nunemeke bantu bonso.” (1 Petelo 2:17, Mukanda wa Nzambi) Nunku bantu badi basungula bua kulonda mikenji ya mu Bible badi banemeka bantu bonso, nansha bobu ne malongesha kayi anyi basungule bua kudituala mushindu kayi. (Luka 6:31) Kadi abi kabiena biumvuija ne: badi bitaba malongesha onso anyi mmuenenu yonso peshi mapangadika onso a bakuabu to. Tshidibi kabakupanga bukalanga anyi kanemu to, nebadienzeje ne muabu muonso bua kuidikija mushindu uvua Yezu wenzela bakuabu malu.
Tshilejilu, musangu mukuabu Yezu wakatuilangana ne mukaji uvua mu tshitendelelu tshivua Yezu kayi witaba to. Mukaji au uvua kabidi mubanjija kudi muntu uvua kayi bayende, ne Yezu kavua wanyisha ngenzelu wa malu wa nanku to. Nansha nanku, wakakula ne mukaji au ne kanemu.—Yone 4:9, 17-24.
Anu bu Yezu, bena Kristo mbadiakaje bua kumvuija bantu badi basue kubateleja malongesha abu, kadi badi benza nanku ne “kanemu kakole.” (1 Petelo 3:15) Bible udi uleja ne: bena Kristo kabena ne bua kuenzeja bakuabu bua bitabe mmuenenu wabu to. Udi wamba ne: muyidi wa Kristo “kena ne bua kuluangana to, kadi udi ne bua kuikala muena bupole kudi bantu bonso,” nansha kudi badi kabayi bitaba malongesha adiye kayi witaba to.—2 Timote 2:24.
Tshidi Bible wamba bua lukinu
Bible udi utuambila ne: “Tungunukayi ne kukeba ditalala ne bantu bonso.” (Ebelu 12:14) Muntu udi utungunuka ne kukeba ditalala udi ulekela lukinu. Udi uditatshisha bikole bua kuikala mu ditalala ne bakuabu, kadi kayi unyanga bikadilu biende to. (Matayi 5:9) Bible udi ukankamija too ne bena Kristo bua banange bena lukuna babu pa kuenzela badi babakengesha malu mimpe.—Matayi 5:44.
Tshia bushuwa Bible udi wamba ne: Nzambi ‘mmukine,’ anyi ‘katu wanyisha,’ bienzedi bidi bipuekeshisha bakuabu milongo peshi bibenzela bibi to. (Nsumuinu 6:16-19) Bible udi utela muaku “lukinu” mu mvese eu bua kumvuija dikina bienzedi bibi ne muoyo mujima. Udi uleja ne: Nzambi mmudiakaje bua kubuikidilangana ne mmusue kuambuluisha bonso badi basue kushintulula ngenzelu wabu wa malu ne kulonda mikenji yende.—Yeshaya 55:7.
Mvese idi yakula bua kanemu ne kumvuilangana
Tito 3:2: ‘Kanuikadi bena malu makole, nuikale ne bupole buonso kudi bantu bonso.’
Muntu udi kayi muena malu makole udi wandamuna ne bupole padi bakuabu bamba malu adi mashilangane ne ende, biambuluisha bantu bua kunemekangana.
Matayi 7:12: “Nunku, malu onso anudi basue bua bantu banuenzele, nudi ne bua kubenzelawu penu.”
Tuetu bonso tutu tuanyisha patu bakuabu batunemeka ne bitaba mmuenenu wetu ne mushindu ututu tudiumvua. Bua kumanya malu a bungi a mua kutumikila mukenji wa bikadilu udi mumanyike uvua Yezu mulongeshe eu, bala tshiena-bualu tshia “Qu’est-ce que la Règle d’or?”
Yoshua 24:15: “Nudisunguile unuenzela mudimu lelu.”
Patudi tunemeka bukenji bua bakuabu bua kudisunguilabu malu, tudi tukebesha ditalala.
Bienzedi 10:34: “Nzambi kena ne kansungansunga to.”
Nzambi kena usunguluja muntu bua bilele biabu, bua ditunga diabu, bua dikoba diende, bua muaba udiye mufume, anyi bualu mmulume peshi mukaji to. Bantu badi basue kuidikija Nzambi badi banemeka bantu bonso.
Habakuka 1:12, 13: “[Nzambi kena] mua kuitaba malu mabi.”
Lutulu lua Nzambi ludi ne ndekelu. Kakulekela bantu babi batungunuka kuenza malu mabi kashidi ne tshiendelele to. Bua kumanya malu a bungi, tangila filme wa Nzambi mmulekele makenga bua tshinyi?
Lomo 12:19: “Nushile tshiji [tshia Nzambi] muaba; bualu mbafunde ne: Yehowaa udi wamba ne: ‘Disombuela ndianyi; meme nemfute.’”
Yehowa Nzambi ki mmupeshe muntu bukokeshi bua kudisombuela to. Neatabalele bua buakane buenzeke tshikondo tshidiye muteke. Bua kumanya malu a bungi, bala tshiena-bualu tshia “Buakane nebuikalaku pa buloba dimue dituku anyi?”
a Yehowa ndîna menemene dia Nzambi. (Misambu 83:18) Bala tshiena-bualu tshia “Yehowa nnganyi?”