Bantu kabena beyemena bamfumu ba tshididi to​—Ntshinyi tshidi Bible wamba?

Mu tshidimu tshia 2024, nekuikale masungula mu matunga a bungi pa buloba bujima. Nansha nanku, bantu ba bungi kabatshiena beyemena bamfumu ba tshididi to.

• Matshinka a bungi adibu benze mu ditunga dia Amerique adi aleja ne: “bamfumu ba tshididi ba bungi badi bakokesha bua kudisankisha,” pamutu pa kukumbaja majinga a bantu badibu benzela mudimu.a​—Pew Research Center, 19/9/2023.

Bansonga ba bungi kabena pabu beyemena bamfumu ba tshididi to.

• “Bansonga lelu batu baditatshisha bua kujikija ntatu, kadi matshinka adi aleja ne: bamfumu bobu kabena baditatshisha bua bualu ebu to.”​—The New York Times, 29/1/2024.

• “Matshinka adi aleja ne: bansonga badi beyemena bantu batu bela filme mu Youtube kupita bamfumu ba tshididi.”​—The Korea Times, 22/1/2024.

Tudiku mua kutekemena ne: bamfumu ba tshididi nebatuenzele malu mimpe kumpala eku anyi? Nnganyi utudi mua kueyemena?

Ikala ne budimu bua muntu uudi weyemena

Mbimpe bua bantu bikale badimuke bua muntu udibu beyemena. Bible udi wamba ne: “Tshitaba mvinyingu udi witaba dîyi dionso, kadi muntu mudimuke udi welangana meji a tshidia tshionso tshidiye wela.”​—Nsumuinu 14:15.

• Bua kupeta mibelu mimpe ya mua kumanya ngumu milelela ne ya dishima, bala tshiena-bualu tshia “Dikuba ku ngumu ya dishima.”

Bualu bukuabu, too ne bamfumu ba tshididi badi ne bululame ne meji mimpe, kabena ne bukole bua kuenza malu adibu bajinga kuenza to. Ke bualu kayi Bible udi utudimuija ne:

• “Kanutekemenyi kudi baludiki ba matunga, badi amu bantu, kabena mua kunupandisha.”​—Misambu 146:3, Mukanda wa Mvidi Mukulu.

Mulombodi uudi mua kueyemena

Bible udi wamba ne: Nzambi ukadi musungule Yezu Kristo udi Mukalenge mukumbane ne wakueyemena. (Luka 1:32, 33) Yezu m’Mukalenge wa Bukalenge bua Nzambi, mbulamatadi udi ukokesha kumbukila mu diulu.​—Matayi 6:10.

• Mona bua tshinyi udi mua kueyemena Yezu ne malu enzaye bua kujikija ntatu itudi nayi lelu. Bala tshiena-bualu tshia “Nnganyi udi Mukalenge wa Bukalenge bua Nzambi?” ne tshia “Bukalenge bua Nzambi nebuenze malu kayi?”