Kudi mushindu wa kuepuka mvita ya buloba bujima anyi?—Ntshinyi tshidi Bible wamba?

Mu bidimu 30 bishale ebi, bantu ba bungi bavua bamone ne: malanda adi pankatshi pa matunga avua makole ne avua mene enda alengela. Nansha nanku, malu adi menzeke matuku adi panshi aa adi aleja ne: pamuapa tshidibu bamba atshi ki ntshilelela to.

“Bantu badi basamisha mutu ne: mvita ya mu Gaza neyibuele mu matunga makuabu bu mudi Israël ne tshisumbu tshia Hezbollah batuadije kuluangena ku mikalu ya Liban.”—Reuters, mu dia 6/1/2024.
“Matunga adi Iran ulombola adi enda ela mvita miaba mishilashilangane ya pa buloba, Iran penda mmutuadije kuenza bingoma binene bia mpolondo. Bualu bukuabu, Russie ne Chine mbadisange mpindieu kudi Iran. Malu onso aa adi enza matunga a ku Mputu buôwa.”—The New York Times, mu dia 7/1/2024.
“Mvita idi pankatshi pa Russie ne Ukraine idi itungunuka ne kukebesha ntatu mikole.”—UN News, mu dia 11/1/2024.
“Divudija dia makuta ne dikolesha dia biluilu kudi ditunga dia Chine, dilubuluka dia malu mu ditunga dia Taïwan, malanda makole adi pankatshi pa Chine ne États-Unis bidi bikebesha malu adi mua kujudija tshimvundu.”—The Japan Times, mu dia 9/1/2024.

Bible mmuakulaku bua malu mabi atudi tumona enzeka lelu pa buloba anyi? Malu aa neatufikishe ku mvita ya buloba bujima anyi?

Bible ukavua muakule bua malu adi enzeka lelu

Bible kavua mudianjile kuakula bua mvita yonso idi yenzeka lelu to. Kadi, ukavua muakule bua mvita idi yenzeka matuku etu aa ne idi ‘yumbusha ditalala pa buloba.’—Buakabuluibua 6:4.

Mukanda wa Danyele ukavua mumanyishe ne: “Mu tshikondo tshia ku nshikidilu,” makokeshi a pa buloba neaditue mu ‘disakilangana’ peshi nealuangane bua kutshimunangana. Diluangana adi didi dilomba bia mvita bia bukole bua bungi ne ditula “biuma” anyi makuta mapite bungi.—Danyele 11:40, 42, 43.

Mvita yenzeka kumpala eku

Bible udi uleja ne: kumpala kua malu a pa buloba kuakanawu, neanji kunyanguka bibi menemene. Yezu ukavua mumanyishe ne: “Nekuikale dikenga dinene dia buena ditu kadiyi dianji kuenzeka katshia ku tshibangidilu tshia buloba.” (Matayi 24:21) “Dikenga dinene” adi nedifikishe ku mvita idibu babikila ne: Armagedone, idibu bumvuija kabidi ne: “Mvita ya dituku dinene dia Nzambi Wa Bukole Buonso.”—Buakabuluibua 16:14, 16.

Mvita ya Armagedone neyisungile bukua bantu, kadi kayakubabutula to. Ku diambuluisha dia mvita ayi, Nzambi neabutule makokeshi a bana ba bantu adi makebeshe mvita mipite bungi ya tshinyangu. Bua kumanya muikala mvita ya Armagedone mua kupetesha ditalala dia kashidi, bala tshiena-bualu tshia:

“Mvita ya Armagedone ntshinyi?”
“Armagedone ndumu luimpe!”