Divula dia lutatu lua bunkaya​—Tshidi Bible wamba

Bilondeshile matshinka adibu benze matuku adi panshi aa,a mbaleje ne: muntu umue pa bantu banayi udi ne lutatu lua bunkaya.

• “Bantu ba bidimu bionso ne miaba yonso badi pamuapa bapangile ba kuyukila nabu anyi bantu ba kukuatshila malu abu.”​—Chido Mpemba, mulombodi wa Commission sur le lien social de l’Organisation mondiale de la santé.

Bantu ba bungi badi mua kuikala bela meji ne: anu bantu bakulakaje ke badi mua kupeta lutatu lua bunkaya. Kadi kabiena nanku to; nansha bansonga, bantu badi ne makanda a mubidi mimpe, bena kantu ku bianza, ne badi mu mabaka, badi mua kupeta pabu lutatu elu. Kuditola ne kudiumvua nkaya kudi mua kunyanga makanda a mubidi a muntu ne kumukebela masama.

• “Doktere Vivek Murthy wa mu États-Unis udi wamba ne: “Lutatu lua bunkaya ki nkudiumvua bibi patupu to.” Udi wamba kabidi ne: “Anu mudi njiwu ya kunua mitshi ya makanya 15 ku dituku ikebesha lufu, ke mudi njiwu ya dipangila muntu wa kuyukila nende anyi wa kukuatshila bualu ikebesha payi lufu.”

Tshidi Bible wamba

Mufuki wetu mmusue tuikale ne bantu ba kuyukila nabu. Dijinga dia Nzambi konso eku ndia ne: bantu bikale bimpe, ne bikale ne bantu bimpe ba kusomba nabu.

• Dîyi dinene dia mu Bible: “Nzambi wakamba ne: ‘Ki mbimpe bua muntu yeye ashale nkayende to.’”​—Genese 2:18.

Nzambi mmusue bua tudie nende bulunda. Udi ulaya bua kusemena pabuipi netu patudi tudienzeja bua kusemena pabuipi nende.​—Yakobo 4:8.

• Dîyi dinene dia mu Bible: “Badi bamanye ne: badi dijinga ne malu a mu nyuma mba diakalenga, bualu Bukalenge bua mu diulu mbuabu.”​—Matayi 5:3.

Nzambi mmusue bua tumutendelela pamue ne bakuabu. Tuetu tumutendelela mushindu eu, netuikale ne disanka.

• Dîyi dinene dia mu Bible: “Tuelelanganayi kabidi meji bua kusakangana ku dinanga ne ku bienzedi bimpe, . . . kadi tuikale tukankamijangana.”​—Ebelu 10:24, 25.

Bua kumanya malu makuabu a mudi kudienzeja bua kuepuka lutatu lua bunkaya ne mushinga, bala tshiena-bualu tshia “La solitude à l’ère de la communication.”