Mvita neyijike dîba kayi?​—Ntshinyi tshidi Bible wamba?

Mu Disambombo dia 13/4/2024 pavua ditunga dia Iran diele ditunga dia Israel mvita, António Guterres sekretere generale wa Bulongolodi bua matunga masanga uvua muambe ne: “Tudi tshikondo tshia kukeba ditalala ne kuimanyika mvita; tshikondo tshia kudikanda bikole.”

Mvita ya mu matunga a mu Moyen-Orient ntshilejilu tshimue tshia mvita idi yenzeka pa buloba bujima.

“Lelu pa buloba kudi mvita ya bungi kupita yikatu mienzeka katshia mvita mibidi ya buloba bujima yenzeka. Bantu miliyare ibidi badi bakenga bua mvita eyi, mmumue ne: muntu umue pa bantu banayi pa buloba bujima.”​—Conseil des Nations unies, 26/1/2023.

Mu matunga adi alonda aa mudi pamu mvita: Israel, Gaza, Syrie, Azerbaïdjan, Ukraine, Soudan, Etshiopi, Niger, Birmanie ne Haïti.a

Mvita neyijike dîba kayi? Bakokeshi ba panu nebateke ditalala anyi? Ntshinyi tshidi Bible wamba?

Buloba bua mvita

Bimvundu bidi bienzeka pa buloba lelu bidi bileja ne: mvita ikadi pa kujika mu matuku makese emu. Mvita yonso idi itua ipela eyi, idi ikumbaja milayi ya mu Bible idi yakula bua matuku atudi aa. Bible udi ubikila tshikondo tshitudi etshi ne: “Nshikidilu wa ndongoluelu wa malu eu.”​—Matayi 24:3.

• “Nenumvue bakula bua mvita ne ngumu ya mvita. . . . Tshisamba netshiluishe tshisamba tshikuabu, bukalenge nebuluishe bukalenge bukuabu.”​—Matayi 24:6, 7.

Bua kumanya mudi mvita idi yenzeka lelu eu ikumbaja mêyi a buprofete a mu Bible, bala tshiena-bualu tshia “Quel est le signe des ‘derniers jours’ ou ‘temps de la fin’?”

Mvita yajikija mvita yonso

Bible ukavua muambe ne: mvita neyijike. Neyijike mushindu kayi? Ki mbantu bayijikija to, kadi neyijike ku mvita ya Armagedone, “mvita ya dituku dinene dia Nzambi Wa Bukole Buonso.” (Buakabuluibua 16:14, 16) Panyima pa Armagedone, Nzambi neakumbaje malu onso adiye mulaye bukua bantu bua buikale mu ditalala dia kashidi.​—Misambu 37:10, 11, 29.

Bua kumanya malu makuabu adi atangila mvita ya Nzambi yajikija mvita mikuabu yonso eyi, bala tshiena-bualu tshia “Mvita ya Armagedone ntshinyi?”