Bantemu ba Yehowa batuku bitabuja Yezu anyi?

Eyowa. Tutu tuitabuja Yezu uvua muambe ne: “Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi.” (Yone 14:6) Tudi tuitabuja ne: Yezu uvua mumbuke mu diulu mulue pa buloba ne mufile muoyo wende mupuangane bu mulambu wa kupikula nawu bantu. (Matayi 20:28) Lufu luende ne dibika diende ku lufu mbienze bua bantu badi baleja ditabuja kudiye bapete muoyo wa tshiendelele. (Yone 3:16) Tudi kabidi tuitabuja ne: Yezu udi ukokesha mpindieu bu Mukalenge wa Bukalenge bua Nzambi mu diulu, buikale mua kufila ditalala pa buloba bujima mu katupa kîpi emu. (Buakabuluibua 11:15) Kadi, tudi tuangata mêyi a Yezu aa ne mushinga: “Tatu mmumpite meme bunene.” (Yone 14:28) Nunku, katutu tutendelela Yezu to, bualu tudi bamanye ne: yeye ki nNzambi Wa Bukole Buonso to.