Bantemu ba Yehowa mbena Kristo anyi?

Eyowa. Tudi bena Kristo bua malu aa:

• Tudi tudienzeja bua kulonda bimpebimpe malongesha a Yezu Kristo ne malu avuaye muenze.​—1 Petelo 2:21.

• Tudi tuitabuja ne: Yezu ke udi mua kutupetesha lupandu, bualu “kakuena dîna dikuabu muinshi mua diulu didibu bafile munkatshi mua bantu didi ne bua kutusungila to.”​—Bienzedi 4:12.

• Padi bantu balua Bantemu ba Yehowa, badi bababatiza mu dîna dia Yezu.​—Matayi 28:18, 19.

• Tutu tulomba Nzambi mu dîna dia Yezu.​—Yone 15:16.

• Tudi tuitabuja ne: Yezu ke udi Mutu, mmumue ne: muntu udibu bapeshe bukokeshi ku mutu kua muntu mulume yonso.​—1 Kolinto 11:3.

Kadi, mu malu a bungi, tudi bashilangane ne bena mu bitendelelu bikuabu bidibu babikila ne: mbia bena Kristo. Tshilejilu, tudi tuitabuja ne: Bible udi ulongesha ne: Yezu udi Muana wa Nzambi, kadi kena umue wa ku bantu badi benza Busatu bunsantu to. (Mâko 12:29) Katutu tuitaba ne: anyima katu ufua to, ne kakuena mvese nansha umue udi uleja ne: Nzambi utu ukengesha bantu mu inferno bua kashidi, anyi udi uleja ne: bantu badi balombola midimu ya mu tshitendelelu badi ne bua kuikala ne mianzu idi ibavuija bapite bakuabu to.​—Muambi 9:5; Yehezekele 18:4; Matayi 23:8-10.