Udi ne bua kusambila Yezu anyi?

BAMUE bantu batu bamona ne: kusambila Yezu nkuakane. Mu Allemagne, bavule mbalongesha patshivuabu bana ne: kumpala kua didia diabo badi ne bua kuvunga bianza ne kuela Yezu Kristo tuasakidila.

Bilondeshile Bible, Yezu udi bushuwa ne muanzu mubandile mu diulu. Kadi, bidi biumvuija ne: tudi ne bua kumusambila anyi? Udi pamu’apa mua kuikala munkatshi mua aba, basaka kudi dinanga bua Yezu, benza masambila kudiye, kadi ntshinyi tshidi Yezu yeye nkayende wela meji pa bidi bitangila masambila a mushindu’eu?

Diambedi, bua tshinyi nkonko eyi itu ijuka? Bualu Bible udi wamba ne: Yehowa Nzambi “mMuteleji wa masambila.” Nunku, kabiena bikemesha to, muvua basadidi ba Nzambi ba kale, bu mudi bena Izalele, basambila anu Yehowa Nzambi, Wa-Bukole-Buonso.​—Musambu wa 5:1, 2; 65:2.

Malu akashintuluka pakalua Yezu, Muana wa Nzambi, pa buloba bua kupikula bukua-bantu ku mpekatu ne lufu anyi? Tòo, masambila avua anu atumibua kudi Yehowa. Patshivuaye pa buloba, Yezu yeye nkayende uvua pa tshibidilu usambila Tatuende wa mu diulu, ne wakalongesha bakuabo bua kuenza bia muomumue. Anjibi kuela meji ku disambila dia tshitembelu, didi imue misangu dibikidibua bu Disambila dia Mukalenge anyi dia Tatu wetu, didi dimue dia ku masambila mamanyike bikole bitambe pa buloba bujima. Yezu ki mmutulongeshe bua kumusambila to; wakatupesha tshitembelu etshi: “Tatu wetu udi mu diulu, dina diebe ditumbe.”​—Mateus 6:6, 9 Mukenji Mulenga; 26:39, 42.

Mpindieu tuanjibi kutabalela tshiena-bualu etshi mu buondoke buonso pa kukonkonona tshidi disambila diumvuija menemene.

Disambila ntshinyi?

Disambila dionso mmushindu kampanda wa ntendelelu. Mukanda wa The World Book Encyclopedia udi ujadika bualu ebu, pa kuamba ne: “Disambila mmushindu kampanda wa ntendelelu udi muntu kansanga mua kuleja didifila, kuela tuasakidila, kutonda mibi, anyi kusengelela kudi Nzambi.”

Tshikondo kampanda Yezu wakamba ne: “Mbafunde ne: ‘n’Yehowa Nzambi webe ûdi ne bua kutendelela, ne anu kudiye ke kûdi ne bua kufila mudimu wa tshijila.’” Yezu uvua mulamate ku bulelela bua nshindamenu bua se: ntendelelu​—ne masambila kabidi—​udi ne bua kuenjibua anu bua Tatuende, Yehowa Nzambi.​—Luka 4:8, NW; 6:12.

Muaba wa Yezu mu masambila etu

Yezu wakafua bu mulambu wa tshia-bupikudi bua bukua-bantu, wakabiishibua ku lufu kudi Nzambi, ne wakabandishibua pa muanzu munene. Anu bu muudi mua kufuanyikija, bionso ebi biakatuala dishintuluka pa bidi bitangila masambila manyisha. Mmu mushindu kayi?

Mupostolo Paulo udi umvuija buenzeji bunene budi nabu muanzu wa Yezu pa masambila nunku’eu: “Ne bua bualu ebu Nzambi wakamubandisha kulu kulê, wakamuha dina didi ha mutu ha dina dionso; ne bua mu dina dia Yesu binu bionso bitue hanshi, ne bia bintu bia mu diulu ne bintu bia ha buloba ne bintu bia munshi mua buloba, ne ndimi yonso yambe hatoke ne Yesu Kilisto udi Mukelenge, tô ne ku butumbi bua Nzambi Tatu.”​—Filipoi 2:9-11.

Miaku “mu dina dia Yesu binu bionso bitue hanshi” idi yumvuija ne: tudi ne bua kumusambila anyi? Tòo. Tshiambilu tshia tshiena-Greke tshidibu batumike natshi apa “tshidi tshiumvuija dîna didi disangisha aba badi batua binu panshi, mu dîna mudi basangisha buonso (πᾶν γόνυ) batendelela. Dîna didi Yezu mupete didi disaka buonso ku ditendelela mu buobumue.” (Mukanda wa A Grammar of the Idiom of the New Testament, mufunda kudi G. B. Winer) Eyowa, bua disambila kuanyishibuadi, didi ne bua kuenjibua “mu dîna dia Yezu,” kadi, ndituma kudi Yehowa Nzambi ne didi diambuluisha bua butumbi buende. Bua kabingila aka, Paulo udi wamba ne: “Mu malu onso ku ditendelela ne ku disengelela numanyishe Nzambi bua milombo yenu ne disakidila.”​—Filipoi 4:6.

Anu bu mutu luponda lufikisha ku muaba kampanda, mmudi Yezu “njila” udi ufikisha kudi Nzambi Wa-Bukole-Buonso. “Ndi bianyi nshila ne bulelela ne muoyo; kakuena muntu udi ulua kudi Tatu, kai muanze kulua kundi diambedi,” ke muvua Yezu mulongeshe bapostolo. (Yone 14:6) Nunku, tudi ne bua kuenza masambila etu kudi Nzambi ku butuangaji bua Yezu ki mbuludiludi kudi Yezu nkayende nansha.a

‘Kadi,’ bamue badi mua kuebeja: ‘Bible kêna umanyisha ne: mulongi Stefane ne mupostolo Yone bakakula ne Yezu mu diulu anyi?’ Mbilelela. Kadi, malu aa, kaavua umvuija masambila to, bu muvua Stefane ne Yone buonso buabo bamone Yezu mu tshikena-kumona ne kuakula nende buludiludi. (Bienzedi 7:56, 59; Buakabuluibua 1:17-19; 22:20) Vuluka ne: kuakula patupu nansha ne Nzambi kakuena nkayaku kumvuija kusambila to. Adama ne Eve bakakula ne Nzambi, badibingisha bua mpekatu wabo munene, pakabalumbuluishaye kunyima kua mpekatu wabo mu Edene. Diyukidilangana diabo nende mu mushindu awu kadivua disambila to. (Genese 3:8-19) Nunku, nkutupakana pa kutela diyukidilangana dia Stefane ne Yone ne Yezu bu tshijadiki tshia se: tudi bushuwa ne bua kumusambila.

Mmunyi mudi dîna dia Yezu ‘dibidibua’?

Udiku ne mpata ya munanunanu, kabidi mutungunuke ne kumona ne: mbiakane bua kusambila Yezu anyi? Mukaji kampanda wakafundila biro bia filiale wa Société Watch Tower ne: “Diakabi, too ne mpindieu tshiena muanji kutuishibua ne: bena nkristo ba kumpala kabavua basambila Yezu to.” Uvua utuma meji ku miaku ya Paulo idi mu 1 Kolinto 1:2 [NW], mudiye mutela ne: “buonso badi miaba yonso babila dîna dia Mukalenge wetu, Yezu Kristo.” Kadi, tudi ne bua kumanya ne: mu muakulu wakafundabu [Bible] ku ntuadijilu, muaku “kubila” udi mua kumvuija malu makuabo mashilangane ne disambila.

Mmunyi muvua dîna dia Yezu ‘dibidibua’ miaba yonso? Umue mushindu uvua se: balondi ba Yezu wa mu Nazarete bakatonda patoke muvuaye ne bua kuikala Masiya ne “Musungidi wa ba ha buloba,” pa kuenza bishima bivule mu dîna diende. (1 Yone 4:14; Bienzedi 3:6; 19:5) Ke bualu kayi, nkudimuinu wa Interpreter’s Bible udi wamba ne: tshiambilu “kubila dîna dia Mukelenge wetu . . . tshidi tshiumvuija kutonda bumfumu buende pamutu pa kumusambila.”

Kuanyisha Kristo ne kuenza midimu ya ditabuja mu mashi ende mitshikija, adi apetesha mpekatu mushindu wa kulekedibuayi, kudi pako kumvuija “kubila dîna dia Mukelenge wetu, Yesu Kristo.” (Fuanyikija Bienzedi 10:43 ne 22:16.) Ne ku muaku ku muaku, tutu tutela dîna dia Yezu dîba kayi dionso ditutu tusambila Nzambi ku butuangaji buende. Nunku, nansha mudi Bible uleja ne: tudi mua kubila dîna dia Yezu, kêna uleja ne: tudi ne bua kumusambila to.​—Efeso 5:20; Kolosai 3:17.

Tshidi Yezu mua kutuenzela

Yezu wakalaya patoke balongi bende ne: “Binualomba bualu buonso mu dina dianyi, nembuenze.” Ebi bidi bilomba bua kumusambila anyi? Tòo. Dilomba ndituma kudi Yehowa Nzambi​—kadi mu dîna dia Yezu. (Yone 14:13, 14; 15:16) Tudi tulomba Nzambi bua se: Muanende, Yezu, atumike ne bukole ne bumfumu biende buetu.

Mmunyi mudi Yezu umvuangana ne balondi bende balelela lelu’eu? Diumvuija dia Paulo dia tshisumbu tshia bena nkristo bela manyi didi mua kutuambuluisha bu tshifuanyikijilu. Wakatshifuanyikija ne mubidi ne Yezu Kristo bu mutu. “Mutu” udi ukumbaja bidi bidimba bia mu nyuma bikengela ku butuangaji bua “manungu ne bituangaji bia manungu,” anyi mishindu ne ndongoluelu bua kupetesha tshisumbu tshiende biakudia ne bulombodi bia mu nyuma. (Kolosai 2:19) Mu mushindu wa muomumue, Yezu udi lelu’eu utumika ne “mapa a bantu,” anyi bantu bakumbana tshishiki, bua kuikala ba-ntunga-mulongo mu tshisumbu, bafila nansha dinyoka padibi bikengedibua. Kakuena dilongolola kampanda bua bena tshisumbu kumvuanganabo buludiludi ne Yezu anyi kumusambila to, kadi badi ne bua​—eyowa, badi ne tshia—​kusambila Tatuende wa Yezu, Yehowa Nzambi.​—Efeso 4:8-12, NW.

Mmunyi muutu unemekela Yezu?

Pa bidi bitangila lupandu lua bantu, mmudimu kayipu bunene udi Yezu nawu! Mupostolo Petelo wakamba ne: “Mu munga muntu yonso kamuena luhandu, bualu kakuena dinga dina muinshi mua diulu, diha bantu, didi dimanye mua kutusungila.” (Bienzedi 4:12) Udiku mumanye mushinga udi nawu dîna dia Yezu anyi?

Pa kubenga kuenza masambila kudi Yezu nkayende, katuena tupuekesha muanzu wende to. Bishilangane, Yezu mmunemekibua patudi tusambila mu dîna diende. Ne anu bu mutu bana banemeka baledi babo pa kuikala ne butumike, tudi petu tunemeka Yezu Kristo pa kutumikila mêyi-matuma ende, nangananga dîyi-dituma dipiadipia dia kunangangana umue ne mukuabo.​—Yone 5:23; 13:34.

Masambila adi manyishibua

Udiku musue kuenza masambila adi manyishibua anyi? Nenku, wuenze kudi Yehowa Nzambi, ne enza nunku mu dîna dia Muanende, Yezu. Fika ku dimanya disua dia Nzambi, ne masambila ebe aleje bujinguludi abu. (1 Yone 3:21, 22; 5:14) Keba bukole mu mêyi a Musambu wa 66:20: “Nzambi avudishibue disanka, udi kayi musesuishe mei a kulomba kuanyi, udi kayi mungumushile luse luandi lujalame!”

Anu bu mutuamonyi, masambila ng’umue mushindu wa ntendelelu wakuenzela anu Nzambi Wa-Bukole-Buonso. Pa kutuma masambila etu wonso kudi Yehowa Nzambi, tudi tuleja ne: tudi tuangata ne mushinga mubelu wa Yezu bua kusambila ne: “Tatu wetu udi mu diulu.”​—Matayo 6:9.

[Mêyi adi kuinshi]