Nzambi utu ne dîna anyi?

Diandamuna dia mu Bible

Muntu yonso utu ne dîna diende. Nanku mbia meji bua Nzambi pende ikale ne dîna. Patu bantu badia bulunda bitu ne mushinga wa bungi bua bobu kubikilangana mu mêna abu. Ke mudibi kabidi padi muntu udia bulunda ne Nzambi.

Mu Bible, Nzambi udi wamba ne: “Meme ndi Yehowa. Adi ndîna dianyi.” (Yeshaya 42:8) Nansha mudiye kabidi ne mianzu ya bungi bu mudi “Nzambi Wa Bukole Buonso,” “Mukalenge Mutambe Bunene,” ne “Mufuki,” udi unemeka batendeledi bende padiye ubalomba bua bamubikile mu dîna diende dia nsungansunga.​—Genese 17:1; Bienzedi 4:24; 1 Petelo 4:19.

Mu nkudimuinu ya Bible ya bungi mudi dîna dia Nzambi dia nsungansunga mu Ekesode 6:3. Mvese au udi wamba ne: “Mvua mmuenekela Abalahama, Izaka, ne Yakoba bu Nzambi Wa Bukole Buonso, kadi tshivua mudimanyishe kudibu bua dîna dianyi dia Yehowa to.”

Mu Tshiluba Yehowa ke dîna dia Nzambi didi bantu batela kukadi bidimu nkama ne nkama. Bamanyi ba malu a mu Bible ba bungi batu banange kubikila “Yahweh,” kadi Yehowa ke dîna didi dimanyike bikole menemene pa buloba bujima. Bavua bafunde tshitupa tshia Bible tshia kumpala mu tshiena Ebelu. Tshiena Ebelu ntshishilangane ne Tshiluba bualu batu batshibala kumbukila ku dia balume batangile ku dia bakaji. Mu tshiena Ebelu, dîna dia Nzambi ndienza ne maleta matshintame anayi aa: יהוה. Maleta anayi au adibu bakudimuna ne: YHWH badi baabikila ne: Tetragrame.