Bible udiku mua kuambuluisha bantu badi ne masama a munanunanu anyi?

Diandamuna dia mu Bible

Eyowa. Nzambi utu utabalela batendeledi bende badi basama. Bible udi wamba bua muena lulamatu kampanda ne: “Yehowa neamukuatshishe pa bulalu buende bua disama.” (Misambu 41:3) Biwikala ne disama dia munanunanu, malu asatu adi alonda aa adi mua kukuambuluisha:

1. Lomba Nzambi bukole bua kunanukila. Udi mua kupeta “ditalala dia Nzambi didi dipite dijingulula dionso dia malu” didi mua kukukuatshisha ne kutekesha kanyinganyinga kebe.​—Filipoyi 4:6, 7.

2. Ikala umona malu mu buimpe. Bible udi wamba ne: “Disanka didi dipetesha muntu bukole bua mubidi, dibungama didi bu disama didi dimuzengula mifuba.” (Nsumuinu 17:22, Mukanda wa Mvidi Mukulu [wa Katolike]) Ikala welaku tubilele, bualu tudi mua kukupetesha disulakana dîba dia dibungama, kabidi kuenza nanku kudi kukulama ne bukole bua mubidi.

3. Kolesha ditekemena diebe dia malu atshilualua. Ditekemena dimpe dia malu malelela didi mua kukulama ne disanka nansha wewe ne disama dia munanunanu. (Lomo 12:12) Bible udi ulaya ne: kumpala eku “muntu nansha umue udi musombele mu ditunga kakuamba ne: ‘Ndi nsama’” to. (Yeshaya 33:24) Dîba adi Nzambi neondope masama onso a munanunanu adi bamanyi ba lelu bapangile mua kuondopa. Tshilejilu, nansha bukulakaje, Bible udi uleja muikalabu kabutshiyiku, wamba bua mukulakaje ne: “Musunyi wa pambidi pende ulue mupiamupia kupita wa ku buana; apingane ku matuku a makanda a ku bunsonga buende.”​—Yobo 33:25.

Dimanyisha: Nansha mudi Bantemu ba Yehowa batuishibue ne: Nzambi udi ubambuluisha, batu kabidi bakeba luondapu padibu basama masama a munanunanu. (Mâko 2:17) Kadi kabatu babela bantu ne: balonde anu luondapu lua mushindu kampanda anyi kansanga to. Badi bamona ne: disungula dia mushindu wa kuondopibua mbualu bua muntu nkayende.