Ntshinyi tshidi Bible wamba bua diedibua dia mashi?

Diandamuna dia mu Bible

Bible mmukandike bua kudia mashi. Nanku katuena ne bua kuitaba mashi majima ne bujima buawu anyi bitupa biawu binene binayi bidi bienza mashi to. Katuena nansha mua kuitaba bobu batupeshabi bua kubidia anyi bua batuelabi to. Mona tshidi mvese idi ilonda eyi yamba:

• Genese 9:4. Panyima pa Mvula wa kabutu, Nzambi wakanyishila Noa ne dîku diende bua kubanga kudia munyinyi wa nyama, kadi kubelelaye mukenji bua kabadi mashi to. Wakambila Noa ne: “Kadi kanuena ne bua kudia munyinyi ne muoyo wawu, mmumue ne: mashi awu to.” Mukenji eu udi utangila bantu ba kubangila anu ku dîba adi too ne lelu bualu bobu bonso ndelanganyi ya Noa.

• Lewitiki 17:14. “Kanuena ne bua kudia mashi a tshintu kayi tshionso, bualu muoyo wa tshintu tshionso mmashi atshi. Muntu yonso udi uadia neumbushibue.” Ku mêsu kua Nzambi, anyima anyi muoyo udi mu mashi ne nguende yeye. Nansha mudibi ne: tshisamba tshia Isalele ke tshivuabu belele mukenji eu, udi uleja mudi kudia mashi kuikale bualu bubi butambe ku mêsu kua Nzambi.

• Bienzedi 15:20. “Badikande . . . ku mashi.” Nzambi wakelela bena Kristo mukenji wa muomumue ne uvuaye muelele Noa. Malu a kale adi aleja ne: bena Kristo ba kumpala bavua babenga bua kudia mashi anyi bua kuanua peshi nansha bua kubondopabu nawu.

Bua tshinyi Nzambi udi utuelela mukenji bua tudikande ku mashi?

Mu malu a luondapu, kudi malu a bungi adi enza bua tuepuke diedibua dia mashi. Kadi tshia mushinga ntshia ne: Nzambi mmutukandike mashi bualu tshidiwu aleja ntshia tshijila kudiye.​—Lewitiki 17:11; Kolosayi 1:20.