Tshiudi mua kuenza bua wewe kumvua Bible

Diandamuna dia mu Bible

Bible nkayende udi uleja malu a bungi a kuenza bua wewe kumvua malu adimu. Nansha wewe mukolele muaba kayi, mukenji wa Nzambi udi mu Bible ki ‘mmupite bukole anyi muikale kule nebe’ bua wewe kuwumvua to.’​—Dutelonome 30:11.

Malu a kuenza bua kumvua Bible

1. Ikala ne mmuenenu muimpe wa malu. Itaba ne: Bible n’Dîyi dia Nzambi. Ikala ne budipuekeshi, bualu Nzambi katu wanyisha badibandishi to. (1 Tesalonike 2:13; Yakobo 4:6) Kadi kuikadi witabakana malu tshianana tshianana to. Nzambi mmusue bua ukuate mudimu ne ‘tshieledi tshiebe tshia meji.’​—Lomo 12:1, 2.

2. Lomba Nzambi meji. Bible udi wamba mu Nsumuinu 3:5 ne: “Kueyemenyi dijingulula diebe dia malu.” Mbimpe ‘utungunuke ne kulomba Nzambi’ meji bua umvue Bible.​—Yakobo 1:5.

3. Ikala umulonga pa tshibidilu. Bua dilonga dia Bible kukuambuluishadi bikole, ikala umulonga mulamakaje, kuikadi umulonga wenda utupisha to.​—Yoshua 1:8.

4. Ikala umulonga ku tshiena-bualu. Longa tshidi Bible wamba bua tshiena-bualu anyi bua bualu kampanda. Wewe wenza nanku nebikuambuluishe bikole bua kumvua tshidiye ulongesha. Banga ne “malongesha a ntuadijilu,” pashishe uye ku malongesha ‘makole.’ (Ebelu 6:1, 2) Neumone ne: udi mua kufuanyikija mvese ne mvese mukuabu ne neumone kabidi ne: mvese ya bungi ya mu Bible idi yumvuijangana yoyi nkayayi, yumvuija nansha idi ‘mikole bua kumvua.’​—2 Petelo 3:16.

5. Itaba bantu bakuabu bakuambuluishe. Bible udi utukankamija bua kuitaba diambuluisha didi bantu badi bumvua Bible bimpe batupesha. (Bienzedi 8:30, 31) Bantemu ba Yehowa batu balomba bantu bua kulonga nabu Bible kakuyi difuta makuta. Anu bu bena Kristo ba kumpala, batu babadila bantu Mifundu bua kubambuluisha bua bajingulule tshidi Bible ulongesha menemene.​—Bienzedi 17:2, 3.

Kabiena bilomba bua

1. Wikale muntu wa meji a bungi anyi mulonge bikole to. Bapostolo ba Yezu 12 bavua bumvua Mifundu ne bayilongesha bantu, nansha muvua bantu bakuabu babamona bobu ne: “kabavua balonge.”​—Bienzedi 4:13.

2. Wikale ne makuta to. Udi mua kulonga malu adi Bible ulongesha kuyi ufila tshintu to. Yezu wakambila bayidi bende ne: “Nuvua bapete tshianana, nufile tshianana.”​—Matayi 10:8.