Bua tshinyi Bantemu ba Yehowa batu babenga diedibua dia mashi?

Malu a dishima adi ba bungi bamba

Dishima: Bantemu ba Yehowa kabatu bitaba bua babondape ne manga to.

Bulelela: Tutu tukeba ngondapilu udi muimpe menemene buetu tuetu ne bua bena mu mêku etu. Patutu tusama, tutu tuya kua munganga udi mumanye mua kuondopa anyi mua kupanda kayi welangana mashi. Tudi ne dianyisha dia bungi bua mudi malu a luondapu maye kumpala. Mu bulelela, mushindu wa kuondopa bantu kabayi babela mashi uvuabu bapatule bua kuondapa Bantemu, ke ukadibu buondopa bantu bonso lelu. Mu matunga a bungi, babedi badi mpindieu mua kuepuka njiwu idi diedibua mashi mua kukebesha bu mudi masama adi ambulukilangana mu mashi, diuwula dia mubidi ne bikuabu, ne njiwu idi bilema bia bamunganga mua kukebesha.

Dishima: Bantemu ba Yehowa batu bamba ne: ditabuja didi diondopa muntu.

Bulelela: Katutu tuenza bishima bua kuondapangana to.

Dishima: Luondapu ludi kaluyi lulomba mashi lutu lutudisha makuta a bungi menemene.

Bulelela: Luondapu ludi kaluyi lulomba mashi lutu luimpe ne kalutu lutudisha makuta a bungi to.a

Dishima: Bantemu ba Yehowa, bana ne bakole, badi bafua tshidimu tshionso etshi bualu badi babenga kuedibua mashi.

Bulelela: Tshidibu bambe etshi katshiena ne tshijadiki tshilelela to. Bamue baminganga batu ne tshibidilu tshia kupandangana mioyo, miaba idi manungu, ne bapingaja bitupa bia munda mua muntu pa muaba wa bikuabu kabayi bela muntu mashi to.b Pa tshibidilu, babedi batubu kabayi bela mashi batu bumvua bimpe kupita batu bitaba bua babelawu.c Kadi kakuena muntu udi mua kujadika mudi mubedi mua kufua bualu mmubenge kuedibua mashi anyi mua kushala ne muoyo bualu mbamuelawu to.

Bua tshinyi Bantemu ba Yehowa batu babenga diedibua dia mashi?

Bualu ntshilumbu tshia malu a ntendelelu ki ntshia manga adibu bondapangana nawu to. Mbatutumine dîyi mu Dipungila dikulukulu ne mu Dipungila dipiadipia bua tudikande ku mashi. (Genese 9:4; Lewitiki 17:10; Dutelonome 12:23; Bienzedi 15:28, 29) Bualu bukuabu, ku mêsu kua Nzambi muoyo wa tshintu tshionso mmashi atshi. (Lewitiki 17:14) Nunku tudi tubenga kuedibua mashi bualu tudi basue kutumikila Nzambi ne kumunemeka yeye udi mutupeshe muoyo.

Bantu mbashintulule mmuenenu wabu

Kumpala baminganga bavua bamona dibenga kuelangana mashi bu diela kalele anyi mene bu mushindu wa kushipa muntu, kadi mmuenenu wabu eu mmushintuluke bidimu bidi panshi ebi. Tshilejilu, mu 2004, tshiena-bualu kampanda tshivuabu bapatule mu tshikandakanda kansanga tshia kulongeshangana natshi malu a manga tshivua tshiambe ne: “Mishindu yonso idibu bapatule ya mua kuondopa Bantemu ba Yehowa padibu basama ke ikalabu buondopa bantu bonso bidimu kumpala eku.”d Tshiena-bualu tshikuabu tshia mu tshikandakanda tshia Heart, Lung and Circulation tshiakamba mu 2010 ne: “Ki nganu Bantemu [ba Yehowa] nkayabu bikalabu bapanda kabayi babela mashi to, kadi nebikala anu benzela bantu bonso nanku dîba dionso didibi bilomba ne: babapande.”

Patudi tuakula apa badoktere ba bungi pa buloba bujima bakadi bapanda bantu masama manene, kabayi babela mashi to; tshibi mbenze bua mashi a mubedi ikale anyungulukila mu biamu bua kulua kumupingajawu mu mubidi. Ke mukadibu bapanda bantu nunku too ne mu matunga akadi mashidimuke. Babedi ba bungi badi kabayi Bantemu ba Yehowa bakadi balomba badoktere bua babapande mushindu au.