Badi ne mêna abu mafunda mu “mukanda wa muoyo” mbanganyi?

Diandamuna dia mu Bible

“Mukanda wa muoyo,” udibu babikila kabidi ne: “Muvungu wa muoyo” anyi “mukanda wa tshivulukilu,” udi ne mêna a bantu badi ne diakalenga dia kupeta dipa dia muoyo wa tshiendelele. (Buakabuluibua 3:5; 20:12; Malaki 3:16) Bantu badi balamate Nzambi ne bamutumikila, ke badiye ufunda mêna abu mu mukanda wa muoyo.​—Yone 3:16; 1 Yone 5:3.

Nzambi mmulame bena mudimu bende ba lulamatu mu mêji ende, bienze anu bu ne: mmufunde mêna abu mu mukanda katshia ku “mbangilu wa ba pa buloba.” (Buakabuluibua 17:8) Bidi bimueneka ne: dîna dia Abele uvua ne lulamatu ke divua dia kumpala divuabu bafunde mu mukanda wa muoyo. (Ebelu 11:4) Mukanda wa muoyo ki nganu mukanda wa mêna tshianana to, kadi udi utuleja ne Yehowa Nzambi wa dinanga “mmumanye badi bende.”​—2 Timote 2:19; 1 Yone 4:8.

Badi mua kukupula mêna mu “mukanda wa muoyo anyi?”

Eyowa. Bualu Nzambi wakambila bantu ba mu Isalele wa kale bavua kabayi bamutumikila ne: “Muntu udi mungenzele mpekatu, yeye ke ungakupula mu mukanda wanyi.” (Ekesode 32:33) Kadi tuetu bashale ne lulamatu, mêna etu neikale anu mu “muvungu wa muoyo.”​—Buakabuluibua 20:12.