Matayi 11:28-30​—“Luayi kundi, . . . ne meme nennupeshe dikisha”

“Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu muoyo, nunku nuenu nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.”​—Matayi 11:28-30, Nkudimuinu wa bulongolodi bupiabupia.

“Luayi kundi nuenu bonso badi bapungile ne diambula bujitu bukole ne meme nennupeshe dikisha. Ambula bujitu buanyi pambidi penu ne nulonge malu kundi, bualu bua meme ndi mupole ne mupuekele mu muoyo; ne nenupete dikisha. Bujitu bundi nnupesha kabuena bualu bukole pa kuambula ne bujitu bungateka pambidi penu budi bupepele.”​—Matayi 11:28-30, Mukenji Mulenga Lelu.

Diumvuija dia Matayi 11:28-30

Yezu wakabikila bantu bavua bamuteleja ne disanka dionso bua baye kudiye. Yeye kubajadikila ne: bobu balonge malu kudiye, nebapetulule bukole ne disulakana. 

“Luayi kundi, nuenu bonso badi batata ne midimu mikole ne bambule majitu mabapite.” Bantu bavua Yezu mubikile abu bavua “bambule majitu mabapite” a mikenji ne bilele bia bantu bivua bamfumu babu ba bitendelelu babenzeja bua kulonda. (Matayi 23:4; Mâko 7:7) Bantu ba tshianana bavua bakengeshibua kabidi kudi tunyinganyinga ne ditshioka bualu bavua ne bua kuenza mudimu mukole mêba a bungi bua kupeta anu tshiakudia.

“Nennupeshilule bukole.” Yezu wakalaya bantu bavua bitabe dibikila diende disulakana anyi dikisha. Wakakumbaja mêyi ende au pavuaye mubumvuije tshivua Nzambi ubalomba menemene. (Matayi 7:24, 25) Dimanya adi diakabapatula ku bupika bua ngenyi ya dishima ne bilele bibi bia malu a ntendelelu. (Yone 8:31, 32) Nansha muvua kulonga malongesha a Yezu ne kuatumikila kubalombe didienzeja dia bungi, kuakabapetshilula bukole. 

“Ambulayi mutshi wanyi wa tshikokedi, nulonge malu kundi.” Mu bikondo bivuabu bafunda Bible, bantu bavua batamba kuteka mutshi wa tshikokedi pa makaya bua kuambula majitu manene. Ke mudi tshiambilu tshia ‘mutshi wa tshikokedi’ tshilue kuangata diumvuija dia kukokela bukokeshi anyi mikenji ya muntu kampanda. (Lewitiki 26:13; Yeshaya 14:25; Yelemiya 28:4) Tshiambilu tshia “nulonge malu kundi” tshidi mua kuambibua kabidi ne: “nulue bayidi (balongi) banyi.” Nunku Yezu uvua ukankamija bantu bavua bamuteleja bua kulua bayidi bende pavuabu bamulonda ne bidikija tshilejilu tshiende.​—Yone 13:13-15; 1 Petelo 2:21.

“Nennupeshilule bukole.” Yezu kakalaya bantu bavua bamuteleja ne: ntatu yonso neyijike diakamue to. Kadi wakabambuluisha bua kupeta busambi ne ditekemena. (Matayi 6:25-32; 10:29-31) Bantu bavua balue bayidi bende ne bitabe malongesha ende bakamona ne: kabivua bikole bua kuenzela Nzambi mudimu to, kadi bakapeta disanka dia bushuwa.​—1 Yone 5:3.

“Bualu mutshi wanyi wa tshikokedi mmuimpe ne bujitu buanyi mbupepele.” Yezu uvua mushilangane ne bamfumu ba bitendelelu ba tshikondo tshiende bualu yeye uvua ne budipuekeshi ne malu mapole. (Yone 7:47-49) Kavua ne tshikisu ne kavua wenzeja bantu malu ku bukole to. Uvua muntu wa malu malenga ne wa kukukuatshila bualu. Malu avuaye ulomba bayidi bende avua mabakumbanyine. (Matayi 7:12; Mâko 6:34; Luka 9:11) Wakabaleja kabidi mudi luse lua Nzambi mua kubambuluisha ne mua kupeta bukole budi kondo ka muoyo kimpe kapetesha. (Matayi 5:23, 24; 6:14) Ngikadilu mimpe ivua nayi Yezu yakakoka bantu kudiye ne yakabasaka bua kuitaba mutshi wende wa tshikokedi ne kulua bayidi bende.

Malu adi Matayi 11:28-30 wakuila

Yezu wakamba mêyi adi mu Matayi 11:28-30 mu tshidimu tshia 31 bikondo bietu ebi pavuaye mu mudimu wa diyisha mu Galela. Mu bafundi bonso banayi ba Evanjeliyo, anu mupostolo Matayi ke uvua mufunde mêyi au. Bu muvua Matayi mulambuishi wa bitadi kumpala ne muena Yuda, wakamona ne ende abidi muvua bitadi bia bena Lomo ne ndongoluelu mubi wa bena Yuda wa malu a Nzambi bikengeshisha bantu. Nunku tudi batuishibue ne: wakapeta bukole pavuaye umona Yezu wenza malu ne bukokeshi buvua Tatuende Yehowaa mumupeshe bua kubikila bena bupuekele ne bakengi bua balue kudiye.​—Matayi 11:25-27.

Evanjeliyo wa Matayi udi uleja patoke ngikadilu mimpe ivua nayi Yezu uvua Masiya mulaya ne mfumu wa Bukalenge bua Nzambi budi ne bua kulua.​—Matayi 1:20-23; Yeshaya 11:1-5.

Tangila filme muîpi eu bua kumona kadiosha ka mukanda wa Matayi.