“Tshikokedi tshianyi ntshitekete ne dibuki dianyi ndipepele”

“Angatayi tshikokedi tshianyi ne nulongele kundi.”​—MATAYO 11:29, NW.

1, 2. (a) Ntshinyi tshiudi mumone mu nsombelu [webe] tshidi tshikupetesha dikankamijibua? (b) Ntshinyi tshidi muntu ne bua kuenza bua kupeta dikankamijibua diakalaya Yezu?

MAYI matalale muowa ku ndekelu kua dituku dia luya ne disuluila, anyi tulu tuimpe bufuku kunyima kua luendu lule ne lupungiji​—oh, mmushindupu kayi udibi bikankamija! Ke mudibi padi dibuki dia bujitu diumbushibua anyi padi mpekatu ne bilema bifuidibua luse. (Nsumuinu 25:25; Bienzedi 3:19) Dikankamijibua didi malu a disanka a mushindu’eu apetesha didi ditupeshulula bukole, ne tudi tupeta tshikandi bua kuya kumpala.

² Buonso badi badiumvua bazengele ne majitu ne bapungile badi mua kulua kudi Yezu bua kupeta tshiakabalayaye​—dikankamijibua. Kadi, bua kupeta dikankamijibua didi diakanyine menemene, kudi tshintu kampanda tshidi muntu ne bua kuanyisha bua kuenza. “Angatayi tshikokedi tshianyi ne nulongele kundi,” ke muakamba Yezu, “ne nenupete dikankamijibua bua anyima yenu.” (Matayo 11:29, NW) Tshikokedi etshi ntshinyi? Mmunyi muditshi tshipetesha dikankamijibua?

Tshikokedi tshitekete

3. (a) Mbikokedi bia mushindu kayi bivuabu batumika nabi mu bikondo bia difunda Bible? (b) Ndiumvuija kayi dia mu tshimfuanyi didi disuikakaja ku tshikokedi?

³ Bu muvuabu basombele mu nsangilu wa ba-bidime, Yezu ne bamuteleji bende bavua bamanye bimpe bitambe tshikokedi. Pa tshibidilu, tshikokedi mmutandala [peshi múkámbá] wa mutshi udi ne bipapu bibidi bilongolola muinshi muawu bua kuteka pa nshingu ya nyama ibidi, nangananga ngombe, bua kuyisuika pamue bua kukoka tshikasu, ditempu, anyi dibuki dikuabu. (1 Samuele 6:7) Bavua kabidi batumika ne bikokedi bua bantu. Bivua mitandala tshianana anyi mitshiompo miambula pa makaya ne dibuki ku ndekelu wonso. Ku diambuluisha diabi, ba-bidime bavua mua kuambula mabuki a bujitu. (Yelemiya 27:2; 28:10, 13) Ku disuikakajibua diatshi ku majitu ne mudimu mukole, tshikokedi batu pa tshibidilu batumika natshi mu ngakuilu wa mu tshimfuanyi mu Bible bua kuleja bukokeshi ne butangidi.​—Dutelonome 28:48; 1 Bakelenge 12:4; Bienzedi 15:10.

4. Ntshinyi tshidi tshifunkunyibue kudi tshikokedi tshidi Yezu uleja aba badi balua kudiye?

⁴ Nunku, tshikokedi tshivua Yezu ulomba aba bakalua kudiye bua dikankamijibua bua kuambulabo ntshinyi? Vuluka se: wakamba ne: “Angatayi tshikokedi tshianyi ne nulongele kundi.” (Matayo 11:29, NW) Mulongi udi muyidi. Nunku, mu ngakuilu mupepele kuangata tshikokedi tshia Yezu kudi kumvuija kulua muyidi wende. (Filipoi 4:3) Kadi, bidi bilomba kupita ne kule kumanya malongesha ende. Bidi bilomba kuenza bienzedi bidi mu diumvuangana nawu​—kuenza mudimu wakenzaye ne kuikala ne nsombelu wa mushindu umue ne uvuaye nende. (1 Kolinto 11:1; 1 Petelo 2:21) Bidi bilomba dikokela ku budisuile bumfumu buende ne aba badiye mupe bukokeshi kampanda. (Efeso 5:21; Ebelu 13:17) Bidi biumvuija kulua muena nkristo muditshipe, mutambule, udi wanyisha masanka wonso a mudimu ne majitu a ku diditshipa dia mushindu’eu. Atshi ke tshikokedi tshidi Yezu uleja buonso badi balua kudiye bua disambibua ne dikankamijibua. Udi mudiakaje bua kutshianyisha anyi?​—Yone 8:31, 32.

5. Bua tshinyi kuangata tshikokedi tshia Yezu ki mbualu bukole?

⁵ Kupeta dikankamijibua pa kuangata tshikokedi​—ki ndibengangana mu miaku anyi? Tòo, bualu Yezu wakamba ne: tshikokedi tshiende tshidi “tshitekete.” Muaku eu udi ne diumvuija dia tshinefuke, tshia kunanga, tshibotakaja. (Matayo 11:30; Luka 5:39; Lomo 2:4; 1 Petelo 2:3) Bu muvuaye muena mabaya mupiluke, pamu’apa Yezu uvua wenza bikasu bia ngombe ne bikokedi, ne mumanye mushindu wa kupa tshikokedi mmuenekelu muakanyine bua se: mudimu muvule wenjibue bimpe kakuyi lutatu. Uvua pamu’apa usakidila muinshi mua bikokedi mupimbu wa tshilamba anyi tshiseba. Bivule bitu bienjibua mushindu au bua kabitambi kusamisha, anyi kutekenena, nshingu. Mu mushindu wa muomumue, tshikokedi tshia mu tshimfuanyi tshidi Yezu utuleja tshidi “tshitekete.” Nansha mudi kuikala muyidi wende kulomba amue malu ne majitu, ki mmuanda mukole anyi muzengejanganyi kadi mmukankamijanganyi. Nansha mêyi-matuma a Tatuende wa mu Diulu, Yehowa, kaena a bujitu.​—Dutelonome 30:11; 1 Yone 5:3.

6. Ntshinyi tshivua Yezu usua kumvuija pakambaye ne: “Angatayi tshikokedi tshianyi”?

⁶ Kudi tshintu tshikuabu kabidi tshidi tshivuija tshikokedi tshia Yezu “tshitekete,” anyi tshipepele bua kuambula. Pakambaye ne: “Angatayi tshikokedi tshianyi,” uvua wakula bua tshimue tshia ku bintu bibidi. Bikalaye uvua mutume meji ku tshikokedi tshidi tshisuikakaja bintu bibidi, mbuena kuamba ne: etshi tshitubu basuika nyama ibidi pamue bua kukoka dibuki kampanda, nunku uvua utulomba bua kulua muinshi mua tshikokedi tshimue nende. Ndibeneshapu kayi adi​—kuikala ne Yezu ku luseke luetu ukoka dibuki dietu pamue netu! Ku lukuabu luseke, bikala Yezu mutume meji ku mutshiompo [anyi múkámbá] mutumika nawu kudi tshidime, nunku uvua utuleja mushindu utudi mua kuvuija dibuki kayi dionso ditudi ne bua kuambula tshintu tshitambe kupepela anyi tshitekete mua kukokeshibua. Mishindu yonso ibidi ya tshikokedi tshiende idi anu mpokolo mulelela wa dikankamijibua bualu udi utushindikila ne: “Bualu ndi mupole-malu ne mudipuekeshi mu mutshima.”

7, 8. Nditupakana kayi ditu nadi bamue batu badiumvua bafimpakajibue?

⁷ Nunku, ntshinyi tshitudi ne bua kuenza bitumvua se: dibuki dia ntatu ya mu nsombelu ditudi bambule didi dienda ditamba kunema bujitu, ne se: tudi tuenda tuzengejibua bipite tshipimu tshietu? Bamue badi mua kutupakana pa kumvua se: tshikokedi tshia kuikala muyidi wa Yezu Kristo ntshitambe bukole, anyi se: tshidi tshilomba bivule, nansha mudi tunyinganyinga tua mu nsombelu wa dituku dionso tuikale mpokolo wa dizengejibua diabu ne majitu. Bamue bantu mu nsombelu ya mushindu’eu badi balekela kubuela mu bisangilu bia bena nkristo, anyi badi badikanda ku didifila mu buambi, bumvua pamu’apa ne: badi mua kupetulula disulakana kampanda. Kadi, adi nditupakana dinene.

⁸ Tudi ne dianyisha mudi tshikokedi tshia Yezu “tshitekete.” Bituikala katuyi batshiambule bimpe, tshidi mua kuikala tshisamisha. Mu nsombelu wa mushindu’eu tudi ne bua kukontolola menemene tshikokedi tshidi pa makaya etu. Pamu’apa, bua kabingila kampanda, bikala tshikokedi tshinyanguke anyi katshiyi tshiteka biakane, kutumika natshi kakuakutulomba anu madikolela mavule kadi nekukebeshe kabidi bimue bisama. Mu mêyi makuabu, biatuadija midimu ya teokrasi kumueneka bu majitu kutudi, tudi ne bua kudikontolola bua kumona né tudi tuyenza mu mushindu muakane. Kenzela ka tshitudi tuenza ntshinyi? Tudi badiakaje biakane patudi tuya mu bisangilu anyi? Ku mubidi ne mu lungenyi tudi badilongolole patudi tuditua mu mudimu wa budimi anyi? Tudi ne malanda mashême ne mimpe ne bakuabu mu tshisumbu anyi? Ne, kupita bionso, malanda etu nkayetu ne Yehowa Nzambi ne Muanende, Yezu Kristo, adi munyi?

9. Bua tshinyi tshikokedi tshia buena nkristo katshiena mua kuikala bujitu bukena buambudi?

⁹ Patudi tuanyisha ne muoyo mujima tshikokedi tshidi Yezu utuleja ne tumanya mua kutshiambula bimpe, kakuena kabingila bua kuikalatshi nansha musangu umue tshiangatshibua bu bujitu bukena buambudi. Bushuwa, bituikala mua kufuanyikija nsombelu eu​—Yezu muinshi mua tshikokedi tshimue netu—​ki mbikole bua tuetu kusunguluja eu udi bushuwa muambule tshitupa tshinene tshia bujitu. Mbifuane muana mutekete udi weyama pa maboko a nkuasa wende wa nkata, udi wela meji ne: yeye muine ke udi umusakila kumpala, kadi bua kuamba bulelela, muledi ke udi kakuyi mpata wenza nunku. Bu mudiye Tatu wa dinanga, Yehowa Nzambi mmumanye bimpe mikalu ne matekete bietu ne udi ukumbaja majinga etu ku butuangaji bua Yezu Kristo. “Nzambi neakumbaje menemene majinga enu bilondeshile bubanji buende mu butumbi ku butuangaji bua Kristo Yezu,” ke muakamba Paulo.​—Filipoi 4:19, NW; fuanyikija ne Yeshaya 65:24.

10. Ntshinyi tshivua muntu udi utabalela biakane buyidi mujingulule?

¹⁰ Bena nkristo baditshipe bavule mbafike ku dianyisha bualu ebu ku diambuluisha dia malu mamonamona a muntu pa nkayende. Tshilejilu, Jenny udi umona se: kusadila bu mpanda-njila muambuluishi ngondo wonso ne kuenza mudimu wa pa tshibidilu ku mudimu wa ku mubidi udi ulomba bivule bidi bimufimpakaja bikole. Kadi, udi umvua ne: mudimu wa bumpanda-njila udi bushuwa umuambuluisha bua kulama ntumikilu wende wa pankatshinkatshi. Kuambuluisha bantu bua kumanya bulelela bua mu Bible ne kubamona bashintulula nsombelu yabu bua kubabidila dianyishibua dia Nzambi​—ke tshidi tshimupetesha disanka dinenanenayi mu nsombelu wende wa mudimu muvule. Udi ne muoyo mujima utua ku mêyi a lusumuinu elu ludi luamba ne: “Dibenesha dia kudi Yehowa—​ke ditu divuija [muntu] mubanji, ne katu utentekeja kanyinganyinga pa mutu padi.”​—Nsumuinu 10:22, NW.

Dibuki dipepele

11, 12. Ntshinyi tshivua Yezu usua kumvuija pakambaye ne: “Dibuki dianyi ndipepele”?

¹¹ Pa kusakidila ku ditulaya tshikokedi “tshitekete,” Yezu udi utushindikila ne: “Dibuki dianyi ndipepele.” Tshikokedi “tshitekete” tshitu pa tshibidilu tshitamba kupepeja mudimu bikala dibuki dipepejibue padi, mudimu udi bushuwa disanka. Kadi, ntshinyi tshivua natshi Yezu mu lungenyi pa kuamba tshiambilu atshi?

¹² Anjibi kutangila tshivua tshidime mua kuenza pavuaye usua kushintulula midimu ya nyama yende, tshilejilu kulekela kudima budimi bua kukoka ditempu. Uvua diambedi ne bua kumbusha tshikasu ne pashishe kusuika ditempu. Kabivua mua kuikala bia meji bikalaye musuike nyama tshikasu ne ditempu. Bia muomumue, Yezu kavua wambila bantu bua kutenteka dibuki diende pa mutu pa dikavuabu bambule nansha. Wakambila bayidi bende ne: “Muena mudimu k[ê]na mumanye mua kukuatshila ba[m]fumu babidi mudimu diakamue.” (Luka 16:13) Nunku, Yezu uvua uleja bantu disungula. Bavua ne bua kutungunuka ne kuambula dibuki dia bujitu divuabu nadi, peshi bavua ne bua kuditula panshi ne kuanyisha divuaye ubaleja? Yezu wakabapa mêyi makankamiji a dinanga aa: “Dibuki dianyi ndipepele.”

13. Ndibuki kayi divua bantu bambule mu matuku a Yezu, ne bivua ne tshipeta kayi?

¹³ Mu matuku a Yezu, bantu bavua batata muinshi mua dibuki dia bujitu dibuomekela kudi bamfumu bena Roma bakengeshanganyi ne bamfumu bena malu a Nzambi ku dîna, bena mpala ibidi. (Matayo 23:23) Mu madikolela bua kudipikula ku bukokeshi bua Roma, bamue bantu bakateta bua kudishintuluila malu. Bakaditua ne kasuki mu mianda ya tshididi, biakabafikisha ndekelu wa bionso ku kabutu. (Bienzedi 5:36, 37) Bakuabu bakapangadika bua kuakaja nsombelu wabu pa kuditua ne kasuki mu dikeba dia bintu bia ku mubidi. (Matayo 19:21, 22; Luka 14:18-20) Pakabaleja Yezu njila wa ku disulakana pa kubalomba bua kulua bayidi bende, ki mbuonso bavua badiakaje bua kuanyisha. Bavua belakana bua kutula dibuki divuabu bambule panshi, nansha muvuadi dia bujitu, bua kuambula diende. (Luka 9:59-62) Nditupakanapu kayi dikebeshi dia kabutu!

14. Mmunyi mudi tunyinganyinga tua mu nsombelu ne nkuka ya bintu bia ku mubidi mua kutuzengeja ne majitu?

¹⁴ Bituapanga kudimuka, tudi mua kuenza ditupakana dia muomumue lelu’eu. Kulua muyidi wa Yezu kudi kutupikula ku diluangana bua bipatshila ne manême bimue bimue bu mudi bena bulongolodi ebu benza. Nansha mututshidi ne bua kutumika bikole bua kupeta bidi bikengela bia dituku dionso, katuena tuvuija bintu ebi nshindamenu wa nsombelu wetu. Kadi, tunyinganyinga tua mu nsombelu ne bulobeshi bua bintu bia ku mubidi bidi mua kuikala ne buenzeji bukole kutudi. Bituabishila muaba, nkuka ya mushindu’eu idi mua kujikila bulelela butudi banyishe ne muoyo wa zukuzuku. (Matayo 13:22) Tudi mua kufika ku diditatshisha bikole bua kukumbaja nkuka ya nunku mu mushindu udi majitu etu a buena nkristo alua majitu adi azengejangana atudi basue bua kukumbaja ne lukasa luonso ne ku tshifula muoyo. Bushuwa katuena mua kutekemena bua dikankamijibua difumine ku mudimu wetu kudi Nzambi bituawenza ne mmuenenu wa mushindu au.

15. Ndidimuija kayi divua Yezu mufile pa bidi bitangila nkuka ya bintu bia ku mubidi?

¹⁵ Yezu wakaleja ne: nsombelu wa disankishibua udi ulua, ki nku diluangana bua kukumbaja majinga etu wonso, kadi pa kutabalela bintu bia mushinga mutambe mu nsombelu. “Lekelayi kuditatshisha bua anyima yenu, bua tshinuadia ne bua tshinuanua, anyi, bua mibidi yenu, bua tshinuavuala,” ke muakabelaye. “Anyima ki mmupite biakudia, ne mubidi, ki mmupite bivualu anyi?” Pashishe wakakoka ntema ku nyunyu ya mu diulu ne kuamba ne: “Kayena inowa nansha isangisha bintu mu mayeba; kadi Tatuenu wa mu diulu udi uyidiisha.” Pa bidi bitangila bilongo bia mu budimi, wakamba ne: “Kabitu bitata nansha bikuma buanda, pabi ndi nnuambila ne: nansha Solomo muine, mu butumbi buende buonso, kakavuala bu tshimue tshia kudibi.”​—Matayo 6:25-29, NW.

16. Ntshinyi tshidi dimonamona malu dileje pa bidi bitangila buenzeji bua dipatshila bintu bia ku mubidi?

¹⁶ Tudiku mua kulongela tshintu kampanda ku malongesha aa mapepele mafila ku diambuluisha dia bintu anyi? Dimonamona malu didi dileja se: padi muntu utamba kuditatshisha bua kuakaja nsombelu wende wa dipeta mfranga, udi utamba kukuatshibua mu buteyi bua bipatshila bia bulongolodi ebu ne majitu adi atamba kumunemena pa makaya ende. Bulongolodi ebu mbuule ne bena kumpanyi badi bakamangana ne mêku matapulukangane, mabaka manyanguke, masama, ne bivule bikuabu [anu] bua kupeta bintu bia ku mubidi. (Luka 9:25; 1 Timote 6:9, 10) Dimue edi mutshimunyi wa Difutu dia Nobel, Albert Einstein wakamba ne: “Bubanji, dilubuluka dia budileji, lumu, dibodiama dia bintu​—pa tshibidilu buanyi meme mbintu bia tshianana. Ndi ngitabuja ne: nsombelu mutshintshikila ne wa budipope mmulenga bua bantu buonso.” Ebi bidi anu biambulula mubelu mupepele wa Paulo eu: “Dinemeka [Nzambi, NW] ntshiuma tshipite bunene tshidi natshio muntu udi usanka bua bidiye nabio.”​—1 Timoteyi 6:6, MMM.

17. Nnsombelu wa mushindu kayi udi Bible ukankamija?

¹⁷ Kudi bualu bua mushinga butudi katuyi ne bua kulengulula. Nansha mudi “nsombelu mutshintshikila ne wa budipope” muikale ne bipeta bimpe bia bungi, kêna pa nkayende ufikisha muntu ku disanka bua bidiye nabi to. Kudi bavule bena nsombelu mutshintshikila mubambidika kudi malu, kadi kabena nansha kakese ne disanka anyi ne musangelu. Bible kêna utubela bua kubenga masanka a bintu bia ku mubidi ne kuikala ne nsombelu wa bu-katadi wa pa buende. Kashonyi nkedibue pa dinemekela Nzambi, ki mpa mudi muntu ne bua kusanka bua bidiye nabi. Anu patudi tusangisha bionso bibidi ebi ke patudi tupeta ‘tshiuma tshipite bunene.’ Ntshiuma kayi? Kunyima mu mukanda umue umue au, Paulo udi uleja ne: aba badi kabayi basa “ditekemena diabu pa mabanji adiku bua tshitupa tshîpi, kadi kudi Nzambi” nebikale “badiunguijile bu tshiuma tshijalame, tshishimikidi tshimpe bua matuku atshivuavua, bua bikale ne dishindika dijima dia kupeta muoyo wa bushuwa.”​—1 Timote 6:17-19, NW.

18. (a) Mmunyi mudi muntu mua kupeta dikankamijibua dilelela? (b) Mmunyi mutudi ne bua kuangata mashintuluka atudi ne bua kuenza?

¹⁸ Dikankamijibua netudipete bituamanya mua kutula panshi dibuki dia bujitu dietu nkayetu ditudi mua kuikala bambule ne kuangata dibuki dipepele didi Yezu uleja. Bavule badi bakaje nsombelu yabu bua kumona mua kudifila tshishiki mu mudimu wa Bukalenge mbasokolole njila udi ufikisha ku nsombelu wa disanka ne wa disankishibua. Bushuwa, bidi bikengela ditabuja ne dikima bua kuangata dipangadika dia mushindu’eu, ne kudi mua kuikala bipumbishi mu njila eu. Kadi Bible udi utuvuluija ne: ‘Udi utangila bu mudi lupepele luenza kena ukuna bintu, udi utangila bu mudi matutu enda kena upola.’ (Muambi 11:4) Malu mavule kaatu kabidi makole menemene patudi tuangata diakamue dipangadika bua kuenza. Bidi bimueneka se: tshitupa tshipite bionso bukole, nkuangata dipangadika. Tudi mua kupungila pa kuluisha anyi kukanda lungenyi elu. Bituakaja bieledi bietu bia lungenyi ne kuanyisha mufuno eu, pamu’apa netukemeshibue pa kumona mabenesha adibi bipetesha. Mufundi wa misambu wakabela ne: “Teta, ulabule, unvue ne, Yehowa udi muakane.”​—Musambu wa 34:8; 1 Petelo 1:13.

“Dikankamijibua bua anyima yenu”

19. (a) Ntshinyi tshitudi mua kutekemena bu mudi nsombelu pa buloba mitungunuke ne kubiipa? (b) Patudi muinshi mua tshikokedi tshia Yezu, ndishindika kayi ditudi nadi?

¹⁹ Mupostolo Paulo wakavuluija bayidi ba mu siekele wa kumpala ne: “Bidi bikengela bua tuetu kubuela mu Bukalenge bua Nzambi pa kupitshila mu makenga mavule.” (Bienzedi 14:22, NW) Abi bitshidi bilelela too ne ku lelu. Bu mudi nsombelu pa buloba mitungunuke ne kubiipa, bifimpakaji bidi biluila buonso badi bapangadike bua kuikala ne nsombelu wa buakane ne dinemekela Nzambi nebitambe kukola. (2 Timote 3:12; Buakabuluibua 13:16, 17) Kadi, tudi tudiumvua anu bu muakadiumvua Paulo pakambaye ne: “Badi batufimpakaja nseke yonso, kadi kabena batuboza to; tudi bapange tshia kutekemena, kadi katuena bajimije ditekemena nansha; badi batukengesha, kadi kabena batulekelela to; badi batufina panshi, kadi kabena batubutula to.” Kabingila kadi se: tudi mua kueyemena Yezu Kristo bua kutupetesha bukole budi bupite bua ku tshilelelu. (2 Bena Korente 4:7-9, MMM) Pa kuanyisha tshikokedi tshia buyidi ne muoyo mujima, netubabidile dikumbana dia dilaya edi dia Yezu: “Nenupete dikankamijibua bua anyima yenu.”​—Matayo 11:29, NW.

Udi mua kumvuija anyi?

◻ Tshikokedi tshitekete tshiakaleja Yezu ntshinyi?

◻ Ntshinyi tshitudi mua kuenza bitumvua se: tshikokedi tshietu tshikadi tshinema bujitu?

◻ Ntshinyi tshivua Yezu usua kumvuija pakambaye ne: “Dibuki dianyi ndipepele”?

◻ Mmunyi mutudi mua kuikala bashindike se: dibuki dietu didi dishala dipepele?