Dibikila dia dinanga kudi badi bapungile
“Vuayi kundi meme, nuenu buonso badi bakenga ne bazengele ne majitu, ne meme nennukankamije.”—MATAYO 11:28, NW.
1. Ntshinyi tshiakamona Yezu mu Ngalileya mu luendu luende luisatu lua buambi?
PABUIPI ne ntuadijilu wa tshidimu tshia 32 B.B., Yezu uvua mu luendu luende luisatu lua buambi mu distrike dia Ngalileya. Wakenza luendu pa kukosoluela mu bimenga ne misoko, “wenda ulongesha mu nsunagoga yabu ne umanyisha lumu luimpe lua bukalenge ne wondapa masama a mishindu yonso ne bulema bua mushindu wonso.” Pavuaye wenza nunku, wakamona misumba ya bantu, ne “luse luakamukuata, bualu bavua bapungile ne batangalakangane bu mikoko kayiyi ne muyilami.”—Matayo 9:35, 36, NW.
2. Yezu wakambuluisha bantu mushindu kayi?
2 Kadi, Yezu, tshiakenzaye tshivua tshipite ne kule kumvua luse patupu bua misumba ya bantu. Kunyima kua kutumina bayidi bende dîyi bua kusambila “Mfumu wa dinowa,” Yehowa Nzambi, wakabatuma bua kuambuluisha bantu. (Matayo 9:38, NW; 10:1) Pashishe wakaleja bantu dieyemena diende dia njila udi upetesha disulakana ne disambibua bilelela. Wakabamanyisha dibikila didi dilenga mutshima edi: “Vuayi kundi meme, nuenu buonso badi bakenga ne bazengele ne majitu, ne meme nennukankamije. Angatayi tshikokedi tshianyi ne nulongele kundi meme, bualu ndi mupole-malu ne mudipuekeshi mu mutshima, ne nenupete dikankamijibua bua anyima yenu.”—Matayo 11:28, 29, NW.
3. Bua tshinyi dibikila dia Yezu didi disengelelangana mu mushindu wa muomumue lelu’eu?
3 Lelu’eu tudi mu bikondo mudi bavule badiumvua bazengejibue ne majitu. (Lomo 8:22; 2 Timote 3:1) Bua bamue, kupeta patupu mushindu wa kudikuatshisha kudi kuangata tshitupa tshinene tshia dîba ne bukole biabu bashala anu ne ndambu mukese bua dîku diabu, balunda, anyi malu makuabu kabidi. Bavule mbazengeja kudi masama makole, tshinyongopelu, dibungama, ne ntatu mikuabu ya ku mubidi ne ya mu lungenyi. Pa kumvua difimpakaja, bamue badi bateta bua kupeta disulakana pa kuditua ne kasuki mu dikeba dia masanka, didia, dinua, anyi mu dinua bintu bia lulengu. Ebi bidi bushuwa bibabueja mu nsombelu wa njiwu, udi ubakebela ntatu mivule ne bifimpakaji. (Lomo 8:6) Mbimueneke se: dibikila dia Yezu dia dinanga ditshidi disengelelangana anu bu muakenzadi tshikondo atshi.
4. Nnkonko kayi itudi ne bua kukonkonona bua kubabidila dibikila dia dinanga dia Yezu?
4 Kadi, ntshinyi tshivua bantu bakokela mu matuku a Yezu, tshivua tshibafikisha ku dimueneka “bapungile ne batangalakangane,” tshiakasaka Yezu ku dibumvuila luse? Mmajitu ne mmabuki kayi bivuabu ne bua kuambula ne mmunyi muvua dibikila dia Yezu ne bua kubambuluisha? Mandamuna ku nkonko eyi adi mua kutuambuluisha bikole bua bapungile bababidile dibikila dia dinanga dia Yezu.
Aba “badi bakenga ne bazengele ne majitu”
5. Bua tshinyi bivua biakanyine bua mupostolo Matayo kulonda bualu ebu bua mu mudimu wa Yezu?
5 Bidi bijula ntema pa kumona se: anu Matayo nkayende ke wakalonda bualu ebu bua mu mudimu wa Yezu. Bu muvuaye mulambuishi wa bitadi, Matayo, uvua kabidi mumanyike bu muena Lewi, uvua mumanye bimpe bujitu kampanda busunguluke buvua bantu bambule. (Matayo 9:9; Mâko 2:14) Mukanda wa Daily Life in the Time of Jesus udi wamba ne: “Bitadi bia mfranga anyi bia bintu bivua [bena Yuda ne bua] kufila bivua kudibu bujitu bunekesha, ne bivua bionso bipite bujitu bualu bavua babafutshisha mishindu ibidi ya bitadi tshiapamue, bitadi bia mbulamatadi ne bitadi bia malu a Nzambi; ne nansha tshimue katshivua tshipepele.”
6. (a) Ndongoluelu wa bitadi uvuabu batumika nende mu bikondo bia Yezu uvua tshinyi? (b) Bua tshinyi balambuishi ba bitadi bavua bende lumu lubi lua mushindu’eu? (c) Paulo wakasunguluja ne: bivua bikengela kuvuluija bena nkristo nende tshinyi?
6 Tshivua tshivuija bionso ebi bujitu bua pa buabu nndongoluelu wa bitadi tshikondo atshi. Bamfumu bena Roma bavua bapa bukenji bua kulambuisha bitadi mu provinse kudi banene bavua babandisha bikole mushinga. Ku luabu luseke, bavua bangata ku mudimu bena misoko bua kutangila mudimu wa dilambuisha bitadi. Yonso mu ndongoluelu eu uvua udiumvua ne bukenji bua kusakidila matabishi ende nkayende, anyi tshia-lumbandi. Tshilejilu, Luka udi ulonda se: “Kuvua muntu mukuabo dina diende Zakayo; uvua mfumu wa balambuishi ba bitadi, muikale kabidi muena biuma.” (Lukase 19:2, MMM) Mbimueneke se: “mfumu wa balambuishi ba bitadi” Zakayo ne aba bavua muinshi mua butangidi buende bakalua babanji pa kukengesha bapele. Kanyawu ne nkosa-mishiku bikebesha kudi ndongoluelu wa mushindu’eu biakafikisha bantu ku diangata balambuishi ba bitadi mu mulongo umue ne benji ba mpekatu ne bakaji ba ndumba, ne bavua pamu’apa babiakanyine mu nsombelu mivule. (Matayo 9:10; 21:31, 32; Mâko 2:15; Luka 7:34) Bu muvua bantu bumvue bujitu bukena buambudi, kabiena bikemesha muvua mupostolo Paulo musunguluje dikengedibua dia kuvuluija bena nkristo nende bua kabateki tshiji bua tshikokedi tshia Roma kadi bua “kupingajila muntu yonso tshidi bu tshiende, udi ulomba bitadi, bitadi; udi ulomba mulambu, mulambu.”—Lomo 13:7a, NW; fuanyikija ne Luka 23:2.
7. Mmunyi muvua mikenji ya Roma pa manyoka ivudija majitu a bantu?
7 Paulo wakavuluija kabidi bena nkristo bua kupingajila “udi ulomba ditshina, ditshina dia mushindu’eu; udi ulomba kanemu, kanemu ka mushindu’eu.” (Lomo 13:7b, NW) Bena Roma bavua bende lumu bua tshikisu ne dîsu dikole bia mikenji yabu pa manyoka. Bavua pa tshibidilu batumika ne mututu, dituta mfimbu, bikondo bikole mu lukanu, ne dishipibua bua bantu batungunuke ne kubakokela. (Luka 23:32, 33; Bienzedi 22:24, 25) Nansha bamfumu bena Yuda bavua bapeshibue bukenji bua kufila manyoka a mushindu’eu pavuabu bamona se: bivua bikengedibua. (Matayo 10:17; Bienzedi 5:40) Ndongoluelu wa mushindu’eu uvua kakuyi mpata utamba kuzengeja aba bavua muinshi muende, anyi uvua ubamuenesha kasuba.
8. Mmunyi muvua bamfumu ba malu a Nzambi buomekela bantu majitu?
8 Kadi, tshivua tshitambe bitadi ne mikenji bia Roma bubi, mbujitu buomekela bantu ba tshianana kudi bamfumu ba malu a Nzambi ba matuku awu. Eyowa, ebi mbimueneke bu bivua tshiena-bualu tshia diditatshisha dia Yezu dia kumpala pakalejaye bantu bu badi “bakenga ne bazengele ne majitu.” Yezu wakamba ne: pamutu pa kupetesha bantu badi bakengeshibua ditekemena ne disulakana, bamfumu ba malu a Nzambi “badi basuika mabuki a bujitu ne baateka bantu pa makaya, kadi buobu bine kabena nansha basua bua kuanyungisha ne munu wabu.” (Matayo 23:4, NW; Luka 11:46) Mu Evanjeliyo mbaleje patoke kakuyi ntupakanyi bamfumu ba malu a Nzambi—nangananga Baskribe ne Bafarizeyi—bu tshisumbu tshia bena lutambishi, bakena luse, ne bena mpala ibidi. Bavua bapepeja bantu ba tshianana bu bapangi ba mukanda ne bu bantu bakena bakezuke, ne bavua badiula benyi munkatshi muabu. Diumvuija kampanda pa mmuenenu wabu didi diamba ne: “Muntu udi womekela kabalu bujitu bunekesha lelu’eu udi upia tshibawu kumpala kua mikenji. Netuambe tshinyi bua muntu wakuomekela ‘bantu ba tshianana’ bavua kabayi bashidimunyibue mu malu a Nzambi mikenji 613; ne pashishe, uvua kayi muenze tshintu nansha tshimue bua kubambuluisha, wakabapiisha bu bakena bena Nzambi?” Eyowa, bujitu bulelela kabuvua Mikenji ya Mozese to, kadi mbungi bunekesha bua bilele bibambidika bantu.
Mpokolo mulelela wa ntatu
9. Ndishilangana kayi divua pankatshi pa nsombelu ivua munkatshi mua bantu mu bikondo bia Yezu ne eyi ya mu matuku a Mukalenge Solomo?
9 Imue misangu bujitu bua mfranga buomekela bantu buvua bunekesha, ke bua tshinyi bupele buakatangalaka. Bena Izalele bavua ne bua kufuta bitadi bitshinkidila bilomba kudi Mikenji ya Mozese. Pashishe munkatshi mua bukokeshi bua Solomo, bantu bavua bafila dikuatshisha mu midimu ivua ditunga dikengela mfranga mivule bu mudi diibakibua dia ntempelu ne nzubu mikuabu. (1 Bakelenge 7:1-8; 9:17-19) Pabi, Bible udi utulondela se: bantu bavua “badia ne banua ne batshionkomoka. . . . Yuda ne Izalele bakatungunuka ne kusomba mu dikubibua, muntu yonso muinshi mua muonji wende wa mvinyo ne muinshi mua mutshi wende wa mfigi, kumbukila ku Dan too ne ku Béer-Schéba, mu matuku wonso a Solomo.” (1 Bakelenge 4:20, 25, NW) Dishilangana divua ku ntshinyi?
10. Ntshinyi tshivua mpokolo wa nsombelu wa bena Izalele mu siekele wa kumpala?
10 Patshivua ditunga edi ditungunuka ne kushimata bua ntendelelu mulelela, bakababidila dianyishibua dia kudi Yehowa ne bakabeneshibua ne dikubibua ne dilubuluka nansha muvua mfranga mivule itudibua mu ditunga edi. Kadi, Yehowa wakadimuija ne: bu bobu mua “kubenga kumulonda ne kulama mêyi-matuma [ende],” bavua ne bua kutuilangana ne makenga makole. Eyowa, “Izalele [uvua mua] kulua bushuwa tshia kusendeka ne tshipendu munkatshi mua bantu buonso.” (1 Bakelenge 9:6, 7, NW) Malu akenzeka anu mushindu’au. Izalele wakalua muinshi mua bukokeshi buenyi, ne bukalenge ebu buvua kale buende lumu buakakuatshibua ku bupika. Mbipetapu kayi bikuate buôwa bikebesha kudi dilengulula dia majitu a mu nyuma!
11. Bua tshinyi Yezu wakumvua ne: bantu bavua “bapungile ne batangalakangane bu mikoko kayiyi ne muyilami”?
11 Ebi bionso bidi bituambuluisha bua kujingulula bua tshinyi Yezu wakumvua se: bantu bakamonaye “bavua bapungile ne batangalakangane.” Mbena Izalele, tshisamba tshia Yehowa, bavua mu tshibungi benza madikolela bua kuikala ne nsombelu udi mu diumvuangana ne mikenji ya Nzambi ne kutungunuka ne ntendelelu wabu mu mushindu muakanyine. Kadi, bavua bakengeshibua ne badiatshibua ki ng’anu kudi makole a tshididi ne a bungenda kadi kabidi ne kudi bamfumu bena malu a Nzambi batontolodi bavua munkatshi muabu. Bavua “bu mikoko kayiyi ne muyilami” bualu kabavua ne muntu bua kubakuba anyi kubasungila. Bavua bakengela diambuluisha bua kuakama nsombelu mikole. Mmushindu kayipu uvua dibikila dia dinanga ne kalolo dia Yezu diakanyine!
Dibikila dia Yezu lelu’eu
12. Mbifimpakaji kayi bidi basadidi ba Nzambi ne bakuabu bantu bena muoyo muimpe bumvua lelu’eu?
12 Mu mishindu mivule malu adi muomumue lelu’eu. Bena muoyo muimpe badi benza madikolela bua kuleja bululame mu bungenda buabu badi batuilangana ne bifimpakaji ne malomba bia bulongolodi ebu bunyanguke bua malu bukole bua kuakama. Nansha aba badi baditshipe kudi Yehowa ki mbepula ku nsombelu eu to. Luapolo idi ileja ne: bamue munkatshi mua basadidi ba Yehowa badi bamona mudibi bienda bikola bua kukumbaja majitu abu wonso, nansha mudibu basue bua kuenza nunku. Badi badiumvua buomekela majitu, bapungile, bazengele. Bamue badi nansha badiumvua se: nebikale disulakana bimanshabu malu wonso mu lupepele ne kuya muaba kampanda, bua kupetulula bukole bua ngenyi yabu. Ukadiku mumane kudiumvua nunku anyi? Udiku mumanye muntu kampanda wa pa muoyo udi mu nsombelu au anyi? Eyowa, dibikila didi dilenga mutshima dia Yezu didi ne diumvuija diondoke buetu tuetu lelu’eu.
13. Bua tshinyi tudi mua kushindika se: Yezu udi mua kutuambuluisha bua kupeta disambibua ne dikankamijibua?
13 Kumpala kua Yezu kumanyisha dibikila diende dia dinanga, wakamba ne: “Bionso mbabimpeshe kudi Tatu. Kakuena muntu udi mumanye Muana, amu Tatu ke udi mumumanye, kabidi kakuena muntu udi mumanye Tatu, anu Muana ne muntu udiye musue kumumanyisha.” (Matewuse 11:27, MMM) Bua malanda aa mashême pankatshi pa Yezu ne Tatuende, tudi ne dishindika dia se: bituanyisha dibikila dia Yezu ne kulua bayidi bende, tudi mua kudia malanda mashême, a muntu pa nkayende ne Yehowa, “Nzambi wa busambi buonso.” (2 Kolinto 1:3; fuanyikija ne Yone 14:6.) Kusakidila apu, bualu ‘mbamupeshe bionso,’ Yezu Kristo nkayende udi ne bukole ne bukokeshi bua kupepeja majitu etu. Mmajitu kayi? Aa matuomekela kudi malongolodi manyanguke a malu a tshididi, a bungenda, ne a malu a Nzambi, kusangisha ne majitu matuomekela kudi mpekatu mupiana ne dipanga bupuangane. Ndungenyi kayipu ludi lukankamija ne lukolesha ku muoyo ludi ku ntuadijilu [mu mvese wa nshindamenu wa tshiena-bualu]!
14. Mbua dikenga kayi buvua Yezu ne bua kufila dikankamijibua?
14 Yezu wakatungunuka ne kuamba ne: “Vuayi kundi meme, nuenu buonso badi bakenga ne bazengele ne majitu, ne meme nennukankamije.” (Matayo 11:28, NW) Bushuwa Yezu kavua ukandika mudimu mukole nansha, bualu uvua pa tshibidilu ubela bayidi bende bua kuenza madikolela mu mudimu uvuabu benza. (Luka 13:24) Kadi muaku “bakenga” (“batata,” nkudimuinu wa Kingdom Interlinear) udi umvuija dienza mudimu mukole mulunguluke ne mupungiji, pa tshibidilu kakuyi lupetu lua nsongo. Ne “kuzengela ne majitu” kudi kumvuija kuikala buomekela majitu manekesha. Dishilangana didi mua kufuanyikijibua ne didi pankatshi pa muntu udi umbula bua tshiuma tshisokoka ne eu udi umbula biina mu kamponya ka dikengeshangana. Badi benza mudimu mukole mufuanangane. Kudi umue, mudimu udi wenjibua ne disuminyina, kadi kudi mukuabu, udi tshidimudimu tshikena ndekelu. Tshidi tshienza dishilangana ntshipatshila tshia mudimu, anyi dipangika dia tshipatshila.
15. (a) Nnkonko kayi itudi ne bua kudiela bitumvua se: tudi bambule dibuki dia bujitu bua bungi pa makaya etu? (b) Ntshinyi tshitudi mua kuamba pa bidi bitangila mpokolo wa majitu etu?
15 Udiku umvua se: udi ‘ukenga ne mupungile ne majitu,’ kabidi se: badi bakulomba bivule pa dîba ne bukole biebe anyi? Majitu audi muambule adi amueneka makupite tshipimu anyi? Bikalabi nunku, kudiela nkayebe nkonko idi ilonda eyi kudi mua kukuambuluisha: ‘Ndi nkenga bua tshinyi? Mmabuki a mushindu kayi andi muambule?’ Pa muanda eu, mushikuluji kampanda wa Bible wakamba kukadi bidimu 80 ne: “Dikonkonona pa majitu a mu nsombelu didi diatapulula mu bisumbu bibidi; tudi mua kuabikila bu madikebela ne akena buepuki: aa adi afumina ku bienzedi bietu nkayetu, ne aa akêna afumina ku bienzedi bietu nkayetu.” Pashishe wakasakidila ne: “Bavule ba kutudi badi mua kukatshila, kunyima kua didikonkonona ne dîsu dikole, bua kumona mudi mavule a ku majitu etu mikale madikebela.”
16. Mmajitu kayi atudi mua kudiomekela mu mushindu ukêna wa meji?
16 Nngamue majitu kayi atudi mua kudikebela tuetu nkayetu? Lelu’eu tudi mu bulongolodi bunangi bua bintu bia ku mubidi, bunangi bua masanka, ne budi bupange nsombelu wa tshitembu. (2 Timote 3:1-5) Nansha bena nkristo baditshipe badi basakibua kudi bifimpakaji bia munanunanu ku dilonda mvuadilu ne nsombelu bia mu bulongolodi ebu. Mupostolo Yone wakafunda pa “bijingajinga bia mubidi, bijingajinga bia mesu ne lutambishi bua biuma.” (1 Yowanese 2:16, MMM) Ebi mbifimpakaji bikole bidi mu mushindu mupepele mua kuikala ne buenzeji kutudi. Mbimanyike se: bamue mbanyishe bua kupia mabanza manene bua kutamba kulabula masanka a mu bulongolodi ebu anyi bua kulama nsombelu kampanda muimpe. Pashishe badi bamona se: badi ne bua kupitshisha dîba dia bungi ku mudimu, anyi kuenza midimu mivule, bua kupeta mfranga bua kufuta mabanza abu.
17. Nnsombelu kayi udi mua kutamba kukolesha diambula dia dibuki, ne mmunyi mudibi mua kujandudibua?
17 Nansha mudi muntu mua kuela meji se: ki mbibi bua kuikala ne bimue bintu bidi bakuabu nabi anyi kuenza amue malu adi bakuabu benza, bidi bia mushinga bua kukonkonona né udi usakidila ku dibuki diende bujitu bua pa mutu. (1 Kolinto 10:23) Bualu muntu udi mua kuambula anu bujitu butshinkidila, tshintu kampanda tshidi ne bua kumbushibua bua kuambula dibuki dishilangane. Pa tshibidilu, bintu bidi ne mushinga bua diakalenga dietu dia mu nyuma—dilonga Bible dia muntu pa nkayende, dibuela mu bisangilu, ne mudimu wa budimi—ke bitu biumbushibua kumpala. Tshipeta ndijimija dia bukole bua mu nyuma, didi, ku luadi luseke, ditamba kukolesha diambula dia dibuki. Yezu Kristo wakadimuija bua njiwu eyi pakambaye ne: “Nudilame nuenu bine, bua mitshima yenu kayinemi bujitu mu budiavi, mu bunuavi, mu tunyinganyinga tua mu nsombelu, ne dituku adi kadivu kunuluila mu tshita ne mu tshita, bu buteyi.” (Luka 21:34, 35, NW; Ebelu 12:1) Mbikole bua kusunguluja buteyi ne kubuepuka bikala muntu muzengele ne majitu ne mupungile.
Disulakana ne dikankamijibua
18. Ntshinyi tshiakapetesha Yezu aba bakalua kudiye?
18 Nunku, ne dinanga dionso, Yezu wakapetesha dijandula: “Vuayi kundi meme, . . . ne meme nennukankamije.” (Matayo 11:28, NW) Miaku ‘kukankamija’ apa ne “dikankamija” mu mvese wa 29 idi ifumina ku miaku ya tshiena-Greke idi mu diumvuangana ne muaku udi nkudimuinu wa Septante mutumike nawu bua kukudimuna muaku wa tshiena-Ebelu bua “Nsabatu” anyi “disekelela Nsabatu.” (Ekesode 16:23) Nunku, Yezu kakalaya ne: aba bakalua kudiye kabatshivua kabidi ne mudimu, kadi wakalaya se: neabakankamije bua bamone mua kudiakaja bua mudimu uvuabu ne bua kuenza mu diumvuangana ne dilongolola dia Nzambi.
19. Mmunyi mudi muntu ‘ulua kudi Yezu’?
19 Kadi, mmunyi mudi muntu ‘ulua kudi Yezu’? Yezu wakambila bayidi bende ne: “Biasua muntu kundonda, adipidie ne atuale mutshi wende wa tshinyongopelu dituku dionso ne atungunuke ne kundonda.” (Matayo 16:24, NW) Nunku, kulua kudi Yezu kudi kumvuija se: muntu udi wimansha disua diende nkayende bua kusungula dia Nzambi ne dia Kristo, pa kuanyisha dibuki kampanda dia midimu mipesha, pa kuenza nunku tshiendelele. Bionso ebi bidi bilomba bivule anyi? Tshidibi bilomba ntshipite bukole anyi? Tuanjayi kukonkonona tshiakamba Yezu kunyima kua difila dibikila dia dinanga kudi bapungile.
Udi mua kuvuluka anyi?
◻ Mmu mishindu kayi muvua bantu ba mu matuku a Yezu buomekela majitu?
◻ Tshikebeshi tshilelela tshia dikenga dia bantu tshivua tshinyi?
◻ Mmunyi mutudi mua kudikonkonona tuetu nkayetu bitumvua se: tudi buomekela majitu mapite bungi?
◻ Mmajitu kayi atudi mua kudiomekela mu mushindu ukêna wa meji?
◻ Mmunyi mutudi mua kupeta dikankamijibua diakalaya Yezu?
[Tshimfuanyi mu dibeji 15]
Nng’amue majitu kayi atudi mua kudiomekela tuetu nkayetu?
[Mêyi a dianyisha bua tshimfuanyi mu dibeji 15]
Courtesy of Bahamas Ministry of Tourism