Ebelu 4:12​—“Dîyi dia Nzambi didi ne muoyo, ne bukole”

“Bualu dîyi dia Nzambi didi ne muoyo, ne bukole, nditue kupita muele wonso wa ntapa kubidi ne didi dibuela difika too ne ku dipandulula dia anyima ne nyuma, ne dia manungu ne buongo bua mu mifuba, ne didi mua kujingulula meji ne malu adi muoyo musue kuenza.”​—Ebelu 4:12, Nkudimuinu wa bulongolodi bupiabupia.

‘Bualu bua dîyi dia Nzambi didi ne muoyo ne bukole, didi dipita muele wonso musakisha nseke ibidi kutua, didi ditubula too ne ku dipandulula dia muoyo ne nyuma, ne dia manungu ne buongo bua mifuba, didi dijingulula lukasa meji ne malu adi mutshima musue kuenza.’​—Ebelu 4:12, Mukanda wa Nzambi.

Diumvuija dia Ebelu 4:12

Mêyi adi Nzambi mumanyishe bantu adi mu Bible adi ne bukole bua kujingulula meji etu ne tshidi tshitusaka bua kuenza malu kampanda. Adi kabidi mua kulengeja nsombelu wetu.

“Dîyi dia Nzambi didi ne muoyo.” Tshiambilu tshia ne: “dîyi dia Nzambi” tshidi tshileja malu adi Nzambi muambe mu Biblea adi atangila milayi yende, anyi malu adiye mulongolole. Bumue bua ku malu manene adiye mulongolole budi ne: bantu badi bamutumikila nebasombe pa buloba bua kashidi mu ditalala ne mu buobumue bia bushuwa.​—Genese 1:28; Misambu 37:29; Buakabuluibua 21:3, 4.

Dîyi dia Nzambi didi ne “muoyo” mu ngumvuilu kayi? Tshia kumpala, didi ne buenzeji bukole mu muoyo wa bantu badi baditaba, dibapetesha ditekemena ne nsombelu wa nsongo. (Dutelonome 30:14; 32:47) Didi kabidi ne “muoyo” bualu Nzambi wa muoyo udi wenza mudimu bua kukumbaja milayi yende. (Yone 5:17) Nzambi mmushilangane ne bantu bualu yeye kena mua kulaya bualu, pashishe ubupua muoyo anyi ujingulula ne: kakukumbana bua kubukumbaja to. (Nomba 23:19) Dîyi diende “kadiakupingana [kudiye] kakuyi bipeta.”​—Yeshaya 55:10, 11.

“Dîyi dia Nzambi didi ne . . . bukole.” Tshiambilu tshia “didi ne bukole” tshidi mua kuambibua kabidi ne: “didi dienza mudimu,” anyi “didi dikumbaja bionso bidi [dîyi adi] ne bua kuenza.” Nunku, malu onso adi Yehowab Nzambi wamba anyi ulaya neakumbane bushuwa. (Misambu 135:6; Yeshaya 46:10) Nzambi udi ukumbaja milayi yende bipitshidile kule ne kule bitudi tuelela meji.​—Efeso 3:20.c

Dîyi dia Nzambi didi kabidi ne “bukole” bualu didi diambuluisha bantu badi baditaba bua kushintulula nsombelu wabu ne bumuntu buabu. Badi bitaba malongesha a Nzambi adi alombola meji abu, nsombelu wabu, ne abambuluisha bua kuditekela bipatshila. (Lomo 12:2; Efeso 4:24) Mu ngumvuilu au, ke mudi “dîyi dia Nzambi . . . kabidi dikuata mudimu munda” mua bantu badi baditaba.​—1 Tesalonike 2:13.

“Dîyi dia Nzambi . . . nditue kupita muele wonso wa ntapa kubidi.” Mu ngakuilu wa mu tshimfuanyi, Dîyi dia Nzambi nditue kupita muele wonso muenza kudi muntu bualu didi dibuela dipita. Mukenji wa Nzambi udi mua kulenga muoyo wa muntu, mbuena kuamba ne: tshidi muntu menemene kupita malongesha a bantu. Ke tshidi mêyi makuabu adi mu Ebelu 4:12 aleja.

“Diyi dia Nzambi . . . didi dibuela difika too ne ku dipandulula dia anyima ne nyuma, ne dia manungu ne buongo bua mu mifuba.” Mu Bible muaku “anyima” udi uleja tshidi muntu umueneka bua kuikala, eku muaku “nyuma” wowu udi uleja tshidi muntu menemene munda. (Galatiya 6:18) Mu ngakuilu wa mu tshimfuanyi, “diyi dia Nzambi didi dibuela” too ne mu “buongo bua mu mifuba,” mmumue ne: meji etu ne mutudi tudiumvua menemene. Padidi dileja tshitudi munda muetu menemene (muaba udi muntu nansha umue kayi mua kumona) malongesha a Yehowa adi mua kutusaka bua tuetu kushintuluka. Bidi bisankisha Mufuki wetu ne tuetu petu.

“Diyi dia Nzambi . . . didi mua kujingulula meji ne malu adi muoyo musue kuenza.” Mushindu udi muntu witaba dîyi dia Nzambi udi uleja meji ende menemene, too ne malu adiye musue kuenza menemene anyi tshidi tshimusaka bua kuenza malu au; biobi abi bidi ne buenzeji ku bikadilu biende peshi mushindu udiye udituala. Tshilejilu, muntu yeye muitabe dîyi dia Nzambi pa kushintulula nsombelu wende, udi uleja mudiye ne didipuekesha ne mudiye muditabe ne muoyo mujima. Mmusue kusankisha Mufuki wende. Kadi yeye ukeba bua kupeta bilema mu Dîyi dia Nzambi, udi mua kuleja mudiye ne ngikadilu mibi, bu mudi lutambishi anyi budinangi. Pamuapa, udi ukeba kudibingisha bua tshikadilu tshidi Nzambi kayi wanyisha.​—Yelemiya 17:9; Lomo 1:24-27.

Mukanda mukuabu udi uleja ne: Dîyi dia Nzambi “didi mua kutubuela too ne mu tuonyi.” Kakuena tshintu nansha tshimue tshia muntu wa munda tshidi Nzambi kayi mua kumona ne tshidi dîyi diende kadiyi mua kuleja to. Ebelu 4:13 udi wamba ne: “Bintu bionso bidi butaka ne mbibulula patoke ku mêsu kua yeye utudi ne bua kubadila malu.”

Malu adi Ebelu 4:12 wakuila

Nyuma wa Nzambi wakasaka mupostolo Paulo bua kufundila bena Kristo bena Yuda ba mu Yelushalema ne ba mu Yudaya mukanda wa Ebelu bu mu 61 P.Y.

Mu nshapita 3 ne 4, Paulo wakaleja mudi tshilejilu tshia bena Isalele wa kale tshikale didimuija bua bena Kristo. (Ebelu 3:8-12; 4:11) Yehowa wakalaya bua kumbusha bena Isalele ku bupika ne kubateka mu ditunga divuabu mua ‘kusomba talalaa.’ (Dutelonome 12:9, 10) Kadi bena Isalele bavua bumbuke mu Ejipitu bakapangila ditabuja mu milayi ya Nzambi misangu yonso; bakabenga kutumikila mikenji yende njila ne njila. Ke bualu kayi, ‘kabakabuela mu dikisha dia Nzambi,’ mmumue ne: kabavua kabidi nende mu ditalala to. Nunku bakafua mu tshipela. Nansha muvua ndelanganyi yabu mipiane Buloba Bulaya, bakabanga pabu kubenga kutumikila Nzambi; biobi kukebela tshisamba makenga a bungi.​—Nehemiya 9:29, 30; Misambu 95:9-11; Luka 13:34, 35.

Paulo wakaleja ne: tshilejilu tshibi tshia bena Isalele bavua kabayi ne lulamatu tshidi ne bua kulongesha bena Kristo. Tudi bashilangane nabu, bualu tudi mua kubuela mu dikisha dia Nzambi patudi tutumikila Dîyi diende ne tuitabuja milayi yende ne muoyo mujima.​—Ebelu 4:1-3, 11.

Tangila filme muîpi eu bua kumona kadiosha ka mukanda wa Ebelu.