Udi mubuele mu diikisha dia Nzambi anyi?
“Muntu udi mubuele mu diikisha dia Nzambi mmuikishe pende ku midimu yende.”—EBELU 4:10, NW.
1. Bua tshinyi bantu batu batamba kujinga diikisha?
DIIKISHA. Mmuaku kayipu wa mvuemvue ne mulenga! Bu mudibu basombele mu bulongolodi bua lelu budi mu lubilu ne buikale mu kayumbayumba, bavule ba kutudi nebitabe ne: ndambu wa diikisha mbualu butubu batambe kuanyisha. Bansonga nansha bakulumpe, basele anyi bajike, tudi mua kudiumvua bafimpakaja bikole ne bapungile anu bua nsombelu wa ku dituku ne ku dituku. Bua aba badi ne mikalu ya ku mubidi anyi bulema, dituku dionso didi difila lutatu. Anu bu mudi Mifundu yamba, ‘bifukibua bionso bidi bitua mikemu popamue ne bidi bidinyenga popamue too ne katataka.’ (Lomo 8:22) Muntu udi wikisha kêna anu muena lulèngù nansha. Diikisha ndijinga didi bantu ne bua kukumbaja.
2. Yehowa mmuikishe kubangila tshikondo kayi?
2 Yehowa Nzambi muine mmuikishe. Tudi tubala mu mukanda wa Genese ne: ‘Diulu ne buloba ne bintu bionso biakajikijibua, buonso buabi. Mu dituku dia muanda-mutekete Nzambi wakadi mumane kujikija mudimu wende wakenzaye; yeye wakikisha dituku dia muanda-mutekete ku mudimu wonso wakenzaye.’ Yehowa wakangata ‘dituku dia muanda-mutekete’ ne mushinga wa pa buawu, bualu muyuki mupudija ku spiritu udi utungunuka ne kuamba ne: ‘Nzambi [“wakaditua mu dibenesha,” NW] dituku dia muanda-mutekete, wakadijidila.’—Genese 2:1-3.
Nzambi wakikisha ku mudimu wende
3. Mmalu kayi avua kaayi mua kuikala tubingila tudi Nzambi muikishile?
3 Bua tshinyi Nzambi wakikisha “dituku dia muanda mutekete”? Bushuwa, kavua muikishe bua dipungi nansha. Yehowa udi ne “dikanda dia bungi ne bukole bupite” ne “kena upungila, kena uteketa.” (Yeshaya 40:26, 28, MMM) Peshi Nzambi kakaditua mu diikisha bualu uvua ukengela didiolola anyi dishintulula lubilu lua mudimu, bualu Yezu wakatuambila ne: ‘Tatu wanyi udi ukuata mudimu too ne katataka, ne meme kabidi ndi ngukuata.’ (Yone 5:17) Mu mishindu yonso, “Nzambi udi Spiritu” ne ki mmuelela mikalu kudi mashintuluka a mubidi ne majinga adi nawu bifukibua bidi ne mubidi wa musunya.—Yone 4:24, NW.
4. Mmu mushindu kayi muvua “dituku dia muanda mutekete” dishilangane ne ‘matuku’ makuabu asambombo?
4 Mmunyi mutudi mua kupeta ndambu wa bujinguludi mu kabingila kadi kaleja bua tshinyi Nzambi wakikisha ‘dituku dia muanda-mutekete’? Mu dijingulula ne: nansha muvuaye musanke bua bivuaye mukumbaje munkatshi mua tshikondo tshile tshia “dituku” dionso dia bufuki, Nzambi wakabenesha nangananga ‘dituku dia muanda-mutekete’ ne wakadiangata bu ‘dia tshijila.’ Nkonga-miaku kampanda (Concise Oxford Dictionary) udi umvuija tshintu tshia ‘tshijila’ bu “tshilambula anyi tshifila anu (kudi nzambi kampanda anyi bua tshipatshila kansanga tshia malu a Nzambi).” Nenku, dibenesha dia Yehowa dia ‘dituku dia muanda-mutekete’ ne didiangata bu dia tshijila bidi bileja ne: diodi ne “diikisha” diende bidi ne bua kuikala mu diumvuangana kampanda ne disua diende kabidi ne dilongolola diende dia tshijila kabiyi bua majinga ende makuabu. Ndiumvuangana kayi adi?
5. Mbinganyi bivua Nzambi muenze mu ‘matuku’ a kumpala asambombo a bufuki?
5 Mu “matuku” asambombo a bufuki akavua mapite, Nzambi ukavua muenze ne mujadike bintu bionso ne mikenji idi ilombola luendu lua buloba ne tshintu tshionso tshidi kumpenga kuabu. Bena meji badi mpindieu balonga mudi bintu ebi bienza mu mushindu udi ukemesha. Batangile ku ndekelu kua “dituku disambombo,” Nzambi wakafuka bantu babidi ba kumpala ne wakabateka mu “budimi ku esete, mu Edene.” Ku ndekelu, Nzambi wakamanyisha dilongolola diende bua dîku dia bantu ne buloba mu mêyi aa a mulayi: ‘Nulelangane, nukumbane ba bungi, nuuje buloba tente; nubukokeshe; nuikale ne bukokeshi ku mutu kua minyinyi ya mu mâyi, ne nyunyu ya muulu, ne tshintu tshionso tshidi ne muoyo tshidi tshiendakana pa buloba.’—Genese 1:28, 31; 2:8.
6. (a) Ku ndekelu kua “dituku disambombo,” mmunyi muakumvua Nzambi bua bionso bivuaye mufuke? (b) Mmu ngumvuilu kayi mudi ‘dituku dia muanda-mutekete’ dikale dia tshijila?
6 Pakafika “dituku disambombo” dia bufuki ku ndekelu, muyuki udi utuambila ne: “Nzambi wakamona bintu bionso biakenzeye ne biakadi bimpe be!” (Genese 1:31) Nzambi wakasanka bua tshintu tshionso tshivuaye muenze. Nenku wakikisha anyi wakalekela kuenza mudimu mukuabu wa bufuki uvua utangila buloba. Kadi, nansha muvua budimi bua mparadizu bua tshikondo atshi buikale bupuangane ne bulengele, buvua buangata anu tshitupa tshikese, ne kuvua anu bantu babidi bafukibue pa buloba. Bivua mua kuangata dîba bua buloba ne dîku dia bantu kufikabi ku nsombelu uvua Nzambi mulongolole. Bua kabingila aka, wakajadika ‘dituku dia muanda-mutekete’ divua mua kuambuluisha bionso bikavuaye mufuke mu ‘matuku’ asambombo mashale bua kulubulukabi mu diumvuangana ne disua diende dia tshijila. (Fuanyikija ne Efeso 1:11.) Padi ‘dituku dia muanda-mutekete’ difika ku ndekelu kuadi, buloba bujima nebuikale bukadi bulue mparadizu muasa bua kashidi kudi dîku dia bantu bapuangane. (Yeshaya 45:18) ‘Dituku dia muanda-mutekete’ nditeka pa luseke bua (anyi difundila) dikumbaja ne dikumbana dia disua dia Nzambi didi ditangila buloba ne bukua-bantu. Mu ngumvuilu au ke mudidi dia ‘tshijila.’
7. (a) Bua tshinyi Nzambi wakikisha ‘dituku dia muanda-mutekete’? (b) Mmunyi muenzeka malu onso mu tshikondo tshidi ‘dituku dia muanda-mutekete’ difika ku ndekelu kuadi?
7 Nenku Nzambi wakikisha ku mudimu wende wa bufuki mu ‘dituku dia muanda-mutekete.’ Mbienze bu se: wakalekela kukuata mudimu ne kupesha bivuaye muenze mushindu wa kufika too ne ku tshipatshila tshibifukila. Udi ne dishindika dikole dia se: ku ndekelu kua ‘dituku dia muanda-mutekete,’ malu onso neikale akadi menzeke anu bu mudiye mulongolole. Nansha bu kuoku kuikale bipumbishi, neikale ukadi mubitshimune. Bantu bonso bena butumike nebapete masanka padi disua dia Nzambi dilua muanda mulelela wa tshishiki. Tshintu nansha tshimue katshiakupangisha muanda eu bualu Nzambi mmubeneshe ‘dituku dia muanda-mutekete,’ ne wakadivuija ‘dia tshijila.’ Nditekemena kayipu dia mpatshi bua bantu bena butumike!
Izalele wakapangila bua kubuela mu diikisha dia Nzambi
8. Ndîba kayi ne mmunyi muvua bena Izalele bafike ku disekelela Nsabatu?
8 Tshisamba tshia Izalele tshiakapetela masanka ku ndongoluelu wa Yehowa wa mudimu ne diikisha. Nansha kumpala kua kupeshaye bena Izalele Mikenji ku Mukuna wa Sinayi, Nzambi wakabambila ku butuangaji bua Mozese ne: ‘Monayi, Yehowa wakanupa [“nsabatu,” NW], nunku yeye wakanupa bidia bia matuku abidi mu dituku disambombo; muntu ne muntu ashale mu muaba wende, kalopoki mu muaba wende dituku dia muanda-mutekete.’ Tshipeta tshivua se: “bantu [“bakaditua mu dilama nsabatu,” NW] dituku dia muanda mutekete.”—Ekesode 16:22-30.
9. Bua tshinyi mukenji wa Nsabatu uvua bushuwa dishintuluka dianyisha bua bena Izalele?
9 Ndongoluelu eu uvua mupiamupia bua bena Izalele, batshivua bafumina ku dipikudibua ku bupika mu Ejipitu. Nansha muvua bena Ejipitu ne bisamba bikuabu bakosa dîba mu bikondo bia matuku atanu too ku dikumi, kabiena bimueneka ne: bavua bapeshe bena Izalele bapika dituku dia diikisha nansha. (Fuanyikija ne Ekesode 5:1-9.) Pa nanku mbia meji bua kukoma se: bena Izalele bakanyisha dishintuluka edi. Pamutu pa kumona bualu-bulomba bua Nsabatu bu bujitu anyi mukandu, bavua ne bua kuikala ne disanka bua kubulonda. Bushuwa, Nzambi wakabambila pashishe ne: Nsabatu uvua ne bua kuambuluisha bua kubavuluija bupika buabu mu Ejipitu ne dibapikula diende.—Dutelonome 5:15.
10, 11. (a) Bu buobu bikale bena butumike, ntshinyi tshivua bena Izalele mua kuikala batekemene bua kupeta? (b) Bua tshinyi bena Izalele bakapangila bua kubuela mu diikisha dia Nzambi?
10 Bu bena Izalele bakapatuka mu Ejipitu ne Mozese bikale bena butumike, bavua mua kuikala bapete diakalenga dia kubuela mu “buloba [bulaya] budi ne mabele ne buitshi bia bungi.” (Ekesode 3:8) Muine amu bavua mua kuikala bapete diikisha dia bushuwa, ki ng’anu dituku dia Nsabatu kadi mu nsombelu wabu mujima. (Dutelonome 12:9, 10) Kadi kabiakenzeka nanku to. Pa bidi bibatangila, mupostolo Paulo wakafunda ne: ‘Mbanganyi bavua bumvue dîyi, bobo kutomboka? Se mbonso bavua bapatuke mu Ejipitu ku diambuluisha dia Mozese. Bavua [“Nzambi,” NW] mufikile munda bidimu makumi anayi mbanganyi? Se mbavua benze bibi, bitalu biabu kushala mu tshipela. Kabidi mbanganyi bavuaye muditshipile ne: kabakubuela mu dikisha [“diende,” NW]? Se mbavua babenge kuitaba. Tudi tumona ne: ki mbabuelemu, bualu kabavua [“ne ditabuja,” NW].’—Bena Hebreyi 3:16-19, MMM.
11 Ndilongesha kayipu dia bukole buetu tuetu! Bua dipanga diabu dia ditabuja kudi Yehowa, bena mu tshipungu atshi kabakapeta diikisha divuaye mubalaye. Pamutu pa nanku, bakafua mu tshipela. Bakapangila bua kujingulula ne: bu muvuabu ndelanganyi ya Abrahama, bavua basuikakane bikole ne disua dia Nzambi mu dipetesha bisamba bionso bia pa buloba mabenesha. (Genese 17:7, 8; 22:18) Pamutu pa kuenza mudimu mu diumvuangana ne disua dia Nzambi, majinga abu a pa buloba ne a budisui akababueja mu ditanaji dikole. Katuponyi mu nsombelu wa nunku’eu nansha!—1 Kolinto 10:6, 10.
Nkushale diikisha dikuabu
12. Nditekemena kayi ditshivuaku bua bena nkristo ba mu siekele wa kumpala, ne mmunyi muvuabu mua kumona dikumbana diadi?
12 Panyima pa dileja muvua Izalele mupangile bua kubuela mu diikisha dia Nzambi bua dipanga ditabuja, Paulo wakatuma ntema yende kudi bena kuitabuja nende. Anu mudibi bileja mu Ebelu 4:1-5 (NW), wakabashindikila tshiakabidi ne: “nkushale dilaya dia kubuela mu diikisha [dia Nzambi].” Paulo wakababela bua kuleja ditabuja mu “lumu luimpe,” bualu “tuetu badi baleje ditabuja tudi tubuela mu diikisha.” Bu mukavua Mikenji miumbusha kudi mulambu wa tshia-bupikudi wa Yezu, muaba eu Paulo kavua wakula bua diikisha dia ku mubidi difila kudi Nsabatu. (Kolosai 2:13, 14) Mu ditela Genese 2:2 ne Musambu 95:11, Paulo uvua ubela bena nkristo bena Ebelu bua kubuela mu diikisha dia Nzambi.
13. Mu ditela Musambu 95, bua tshinyi Paulo wakakoka ntema ku muaku “lelu eu”?
13 Diakalenga dia kubuela mu diikisha dia Nzambi divua ne bua kuikala “lumu luimpe” kudi bena nkristo bena Ebelu, anu muvua Nsabatu ne bua kuikala “lumu luimpe” kudi bena Izalele bavua kumpala kuabu. Nanku, Paulo wakabela bena kuitabuja nende bua kubenga kuenza tshilema tshia muomumue ne tshivua Izalele muenze mu tshipela. Muikale utela mpindieu Musambu 95:7, 8, wakakoka ntema ku muaku “lelu eu,” nansha mukadiku tshikondo tshile menemene katshia Nzambi wikisha ku mudimu wa difuka. (Ebelu 4:6, 7) Ntshinyi tshivua Paulo wamba? Uvua wamba se: “dituku dia muanda mutekete,” divua Nzambi muteke ku luseke bua kuambuluisha dilongolola diende didi ditangila buloba ne bukua-bantu bua dikumbane tshishiki, ditshivua mu luendu luadi. Pa nanku, bivua bikengela mitalu bua bena nkristo nende kuenzabu mudimu biumvuangane ne dilongolola adi pamutu pa kuikala badifile anu mu bipatshila bia budisui. Bua musangu au kabidi wakadimuija ne: “Kanupapishi mitshima yenu.” (NW)
14. Mmunyi muakaleja Paulo ne: “diikisha” dia Nzambi ditshivuaku?
14 Kabidi, Paulo wakaleja ne: “diikisha” dilaya kadivua patupu muanda wa diasa mu Buloba Bulaya ku bulombodi bua Yoshua. (Yoshua 21:44) Paulo wakabela ne: ‘Bualu bua bu Yoshua mubape diikisha, [“Nzambi,” NW] kakadi kuamba kunyima bua dituku dikuabu.’ Bua muanda au, Paulo wakasakidila ne: “Kudi kushala diikisha dia [“nsabatu,” NW] dia bantu ba Nzambi.” (Ebelu 4:8, 9) “Diikisha dia nsabatu” adi ntshinyi?
Buela mu diikisha dia Nzambi
15, 16. (a) Tshiambilu “diikisha dia nsabatu” tshidi ne diumvuija kayi? (b) ‘Kuikisha ku midimu yetu’ kudi kumvuija tshinyi?
15 Tshiambilu “diikisha dia nsabatu” ntshikudimuna ku muaku wa tshiena-Greke udi umvuija “kuikisha dia nsabatu.” (Kingdom Interlinear) Mulongeshi William Lane udi wamba ne: “Muaku eu wakapetela ngikadilu wawu musunguluke ku mukenji wa Nsabatu wakatangalaka mu Buena-Yuda mushindamene pa Ekesode 20:8-10, muvuabu bele kashonyi pa se: diikisha ne disamuna mbisuikakane pamue . . . [Udi] uzangika ngikadilu wa pa buende wa dienza difesto ne wa disanka, muleja mu ditendelela ne disamuna Nzambi.” Nenku, diikisha dilaya ki ndisulakana patupu ku mudimu kampanda nansha. Ndishintuluka mu diumbuka ku mudimu wa dipungi, udi kauyi tshipatshila batangile ku mudimu wa disanka udi utumbisha Nzambi.
16 Bualu ebu mbushindika kudi mêyi a Paulo adi alonda aa: “Bualu muntu udi mubuele mu diikisha dia Nzambi mmuikishe pende ku midimu yende; anu bu mudi Nzambi muikishe ku yende.” (Ebelu 4:10, NW) Nzambi kavua muikishe dituku dia bufuki dia muanda-mutekete bua dipungi nansha. Kadi, wakimanyika mudimu wa bufuki wa pa buloba bua kumona mua kulekela mudimu wende ulubuluka ne ufika ku butumbi bua tshishiki, bionso ebi bua dimusamuna ne lumu luende. Bu mutudi tshitupa tshia bufuki bua Nzambi, tudi petu ne bua kuikala mu diumvuangana ne ndongoluelu au. Tudi ne bua ‘kuikisha ku midimu yetu,’ mmumue ne: tudi ne bua kulekela kudibingisha kumpala kua Nzambi mu dikeba bua kupeta lupandu. Pamutu pa nanku, tudi ne bua kuikala ne ditabuja dia se: lupandu luetu ndusuikila ku mulambu wa tshia-bupikudi wa Yezu Kristo, ku butuangaji buawu bintu bionso nebikale bifikisha kabidi mu diumvuangana ne dilongolola dia Nzambi.—Efeso 1:8-14; Kolosai 1:19, 20.
Dîyi dia Nzambi didi ne bukole
17. Nnsombelu kayi mulonda kudi Izalele wa ku mubidi utudi ne bua kuepuka?
17 Bena Izalele bakapangila bua kubuela mu diikisha dilaya dia Nzambi bua bupidia buabu ne dipanga ditabuja diabu. Bua nanku Paulo wakabela bena nkristo bena Ebelu ne: ‘Nunku tutshintayi bietu bua kubuela mu diikisha adi, bua muntu kaponyi mu kulonda kua tshifuanyikiji tshiotshimue tshia bupidia.’ (Ebelu 4:11) Bena Yuda bavule ba mu siekele wa kumpala kabakaleja ditabuja kudi Yezu, ne ba bungi ba kudibu bakakenga bikole pakatua ndongoluelu wa malu wa bena Yuda ku ndekelu kuende mu 70 B.B. Mmunyipu mudibi bia mushinga wa bungi lelu’eu bua tuetu kuikala ne ditabuja mu dîyi dia Nzambi dia dilaya!
18. (a) Ntubingila kayi tuakafila Paulo bua kuleja ditabuja mu dîyi dia Nzambi? (b) Mmunyi mudi dîyi dia Nzambi ‘dipita muele wonso musakisha nseke ibidi kutua’?
18 Tudi ne tubingila tuimpe bua kuleja ditabuja mu dîyi dia Yehowa. Paulo wakafunda ne: ‘Bua dîyi dia Nzambi didi ne muoyo ne bukole, didi dipita muele wonso musakisha nseke ibidi kutua, didi ditubula too ne ku dipandulula dia [“anyima ne spiritu,” NW] ne dia manungu ne buongo bua mikupa, didi dijingulula lukasa meji ne malu adi mutshima musue kuenza.’ (Ebelu 4:12) Eyowa, dîyi dia Nzambi, anyi mukenji wende, ‘didi dipita muele wonso musakisha nseke ibidi kutua.’ Bena nkristo bena Ebelu bavua bakengela bua kuvuluka tshiakenzekela bankambua babu. Mu dilengulula dilumbuluisha dia Yehowa dia se: bavua ne bua kufua mu tshipela, bakakeba bua kubuela mu Buloba Bulaya. Kadi Mozese wakabadimuija ne: ‘Bena Amaleka ne bena Kanana badi kumpala kuenu, nunku nenufue ku miele ya mvita.’ Pakaya bena Izalele ne tshitunu tshionso kumpala, ‘bena Amaleka bakapueka ne bena Kanana bakadi bashikama mu mikuna, bakabapita bukole, bakabipata too ne ku Hôma.’ (Nomba 14:39-45) Dîyi dia Yehowa nditue kupita muele wonso musakisha nseke ibidi, ne muntu yonso udi udilengulula ku budisuile bushuwa neanowe bipeta bibi.—Galatia 6:7-9.
19. Mmunyi mudi dîyi dia Nzambi “ditubula” ne bukole, ne bua tshinyi tudi ne bua kuitaba ne: tudi ne bua kubadila Nzambi malu?
19 Mmunyipu mudi dîyi dia Nzambi ne bukole buonso ‘ditubula too ne ku dipandulula dia [“anyima ne spiritu,” NW], ne dia manungu ne buongo bua mikupa’! Didi dibuela mu ngenyi ne majinga bia bantu, mu tshimfuanyi ditubulula too ne buongo bua mu tshitupa tshia munda menemene mua mifuba! Nansha muvua bena Izalele bapikula ku bupika mu Ejipitu bitabe bua kulama Mikenji, Yehowa uvua mumanye ne: mundamunda muabu kabavua banyishe ndongoluelu ne malu-malomba ende to. (Musambu 95:7-11) Pamutu pa kuenza disua diende, bavua baditatshisha bua kusankisha majinga abu a mubidi. Nanku, kabakabuela mu diikisha divua Nzambi mulaye, kadi bakafua mu tshipela. Tudi ne bua kulama muanda au ku muoyo, bualu ‘kakuena tshintu tshifukibua tshidi katshiyi tshimueneshibua ku mêsu [kua Nzambi], kadi bintu bionso bidi butaka ne bibuluke ku mêsu kua utudi nende bualu.’ (Ebelu 4:13) Pa nanku tukumbajayi mutshipu wa didilambula dietu kudi Yehowa ne katuyi ‘tualuka tshianyima too ne ku dibutuka.’—Ebelu 10:39.
20. Mbualu kayi budi kumpala, ne ntshinyi tshitudi ne bua kuenza mpindieu bua kubuela mu diikisha dia Nzambi?
20 Nansha mutshidi ‘dituku dia muanda-mutekete’—dituku dia diikisha dia Nzambi—ditungunuka, mmutabalele dikumbana dia dilongolola diende didi ditangila buloba ne bukua-bantu. Mu katupa kîpi emu, Masiya Mukalenge Yezu Kristo neaditue mu diumbusha baluishi bonso ba disua dia Nzambi pa buloba, pamue ne Satana Diabolo. Mu Bukokeshi bua Bidimu Tshinunu bua Kristo, Yezu ne bakokeshi nende 144 000 nebafikishe buloba ne bukua-bantu ku nsombelu uvua Nzambi mulongolole. (Buakabuluibua 14:1; 20:1-6) Mpindieu ke tshikondo tshia tuetu kuleja ne: nsombelu wetu mmushindamene pa disua dia Yehowa Nzambi. Pamutu pa tuetu kukeba bua kudibingisha kumpala kua Nzambi ne kutuma bipatshila bietu nkayetu kumpala, mpindieu ke tshikondo tshia tuetu ‘kuikisha ku midimu yetu’ ne kusadila ne muoyo mujima bua bipatshila bia Bukalenge. Mu dienza nanku ne mu dishala ne lulamatu kudi Yehowa Tatu wetu wa mu diulu, netuikale ne diakalenga dia kupeta masanka a diikisha dia Nzambi mpindieu ne tshiendelele.
Udi mua kumvuija anyi?
◻ Nzambi wakikisha “dituku dia muanda mutekete” bua tshipatshila kayi?
◻ Ndiikisha kayi divua bena Izalele mua kuikala bapete, kadi bua tshinyi bakapangila bua kubuelamu?
◻ Ntshinyi tshitudi ne bua kuenza bua kubuela mu diikisha dia Nzambi?
◻ Mmunyi mudi dîyi dia Nzambi ne muoyo, ne bukole, ne ditue kupita muele wonso musakisha nseke ibidi?
[Tshimfuanyi mu mabeji 16, 17]
Bena Izalele bakalama Nsabatu, kadi kabakabuela mu diikisha dia Nzambi nansha. Udi mumanye mbua tshinyi?