Dimue dia 25/8
Nansha munudi kanuyi banji kumumona, nudi bamunange.—1 Pet. 1:8.
Yezu wakakandamena mateta a Satana Diabolo, wakajinga too ne bua Yezu anyange lulamatu luende kudi Yehowa. (Mat. 4:1-11) Satana uvua mudisuike bua kuenzeja Yezu mpekatu, bua apangile mua kufuta mulambu wa tshia kupikulangana natshi. Pavua Yezu pa buloba, wakatantamena mateta makole. Bena lukuna bende bakamukengesha, kujingabu ne bua kumushipa. (Luka 4:28, 29; 13:31) Uvua mutantamene dipanga bupuangane dia bayidi bende. (Mâko 9:33, 34) Pakavuaye pa kufila muoyo wende, bakamukengesha bibi menemene, kumupuekeshabu milongo; pashishe kumushipabu anu bu muenzavi. (Eb. 12:1-3) Wakananukila mu makenga a pakavuaye pa kukuula muoyo ku bukole buende yeye nkayende Yehowa kayi umukuba to. (Mat. 27:46) Kakuyi mpata, Yezu wakakenga bikole kumpala kua kufila tshia kupikulangana natshi. Patudi tuela meji a muvua Yezu mutufuile, kabienaku bitusaka bua kumunanga bikole menemene anyi? w24.01 10-11 §7-9
Dibidi dia 26/8
Bantu bonso badi balubakana mbatangile bushuwa ku bupele.—Nsu. 21:5.
Tuetu ne lutulu netusombe bimpe ne bakuabu ne netubateleje ne ntema padibu bakula. (Yak. 1:19) Netusombe kabidi nabu mu ditalala. Tuetu ne lutulu katuakutayika diakamue ne tshiji anyi kuambangana dîyi dibi padi malu matutonde to. Katuakukuata nansha tshiji ne lukasa padibu batunyingalaje to. Pamutu pa kualujilangana bubi ku bubi, ‘netutungunuke ne kulejangana lutulu ne kufuilangana luse ne muoyo mujima.’ (Kolos. 3:12, 13) Lutulu ludi kabidi lutuambuluisha bua kuangata mapangadika mimpe. Pamutu pa kuya ne malu mu tshiputuku anyi kulubakana, netuenze makebulula bua kumanya buimpe ne bubi bua mapangadika atuangata. Tshilejilu, tuetu tukeba mudimu tudi bafuane kuitaba wa kumpala utuapeta. Kadi tuetu ne lutulu netukonkonone tshikalawu mua kuenzela dîku dietu ne malanda atudi badie ne Yehowa. Tuetu ne lutulu, pamuapa katuakuangata dipangadika dibi to. w23.08 22 §8, 9
Disatu dia 27/8
Ndi mmona mu mubidi wanyi mukenji mukuabu uluangana ne mukenji wa mu meji anyi ne uya nanyi munkuate mutangile ku mukenji wa mpekatu udi mu mubidi wanyi.—Lomo 7:23.
Meji ebe a kuenza mpekatu owu makutshiokeshe, kuelangana meji a mutshipu uuvua muenzele Yehowa pauvua mudilambule kudiye, nekukoleshe dipangadika diebe dia kubenga kukuluka mu diteta. Mushindu kayi? Paudi udilambula kudi Yehowa, udi udibenga. Tuambe ne: udi ne bua kulekela majinga anyi malu mabi onso adi kaayi asankisha Yehowa to. (Mat. 16:24) Dîba adi pakutetabu, kuakusamisha mutu bua tshia kuenza to. Newikale mumane kudisuika bua kushala ne lulamatu kudi Yehowa. Neudisuike anu bua kumusankisha. Newikale anu bu Yobo. Nansha muvuaye mupete ntatu mitambe bubi, wakamba ne muoyo mujima ne: “Tshiakulekela muoyo wanyi mutoke!” to.—Yobo 27:5. w24.03 9 §6-7