Wewe mulami wa lulamatu, ikala mudilongolole!

Yezu ukavua mumvuije ne: anu “kasumbu kakese ka mikoko” ke kapeta muaba mu Bukalenge bua mu diulu. (Luka 12:32) Kadi bua kupeta difutu dimpe edi ki mbualu bupelele to. Bushuwa, wakatungunuka ne kuleja ne: bua muntu kubuela mu Bukalenge bua Nzambi mbimpe ikale ne mmuenenu muimpe.

Ke bua tshinyi Yezu wakadimuija bayidi bende bua kuikala badilongolole bua dilua diende tshiakabidi. Wakamba ne: “Ikalayi bavuale tshilamba tshia mudimu ne badilongolole, ne miendu yenu yikale miteme, ne nudi ne bua kuikala bu bantu badi bindile mfumu wabu udi ufuma ku tshibilu tshia dibaka, bua padiye ulua ukokola, bamunzuluile diakamue. Bapika badi mfumu, padiye ulua, usangana batabale mba diakalenga!”​—Luka 12:35-37.

Bayidi ba Yezu bavua mua kujingulula bipepele mmuenenu uvua Yezu mufile mu tshilejilu etshi. Bapika badiye mutele mbadilongolole ne mbindile dilua dia mfumuabu tshiakabidi. Yezu wakamba ne: “Yeye [mfumu] mulue pa tshilu tshibidi nansha pa tshisatu, ne mubasangane badilongolole, mba diakalenga!”​—Luka 12:38.

Bualu ebu budi ne mushinga kupita mibelu ya kuikala balami bimpe ba nzubu anyi bena mudimu ba tshisumi. Bidi biumvuika bimpe bua muvua Yezu, Muana wa muntu, mudibueje mu tshilejilu etshi. Wakambila bayidi bende ne: “Nuenu kabidi, nuikale badilongolole, bualu Muana wa muntu udi ulua pa dîba dinudi kanuyi nuelela meji.” (Luka 12:40) Nunku Yezu nealue mu tshikondo kampanda mu matuku atshidi alua. Mmusue bua bayidi bende nangananga bena mu “kasumbu kakese ka mikoko” bikale badilongolole.

Petelo uvua musue kumvua bimpe tshivua Yezu usua kuamba, ke kuebejaye ne: “Mukalenge, baudi wambila tshilejilu etshi ntuetu nkayetu anyi nne bantu bonso kabidi?” Pamutu pa Yezu kuandamunaye Petelo diakamue, udi ufila tshilejilu tshidi tshipetangana ne tshia kumpala etshi: “Nnganyi menemene udi mulami wa lulamatu udi mudimuke, wikala mfumuende mua kuteka ku mutu kua kasumbu ka bena mudimu bende bua kutungunuka ne kubapesha biakudia biabu bidibu bakengela mu tshikondo tshiakanyine? Mupika au ngua diakalenga biamusangana mfumuende wenza nanku padiye ulua! Ndi nnuambila mu bulelela ne: yeye neamuteke ku mutu kua bintu biende bionso.”​—Luka 12:41-44.

Bidi bimueneka patoke ne: mu tshilejilu tshia kumpala, “mfumu” udi uleja Yezu, Muana wa muntu. Mbikumbane bua kuamba ne: “mulami wa lulamatu” udi ukongoloja bantu badi benza “kasumbu kakese ka mikoko” bapeshabu Bukalenge. (Luka 12:32) Muaba eu Yezu udi wamba ne: bena mu kasumbu aka nebapeshe “kasumbu ka bena mudimu bende” dikuatshisha, mmumue ne: “biakudia biabu bidibu bakengela mu tshikondo tshiakanyine.” Nunku Petelo ne bayidi bakuabu bavua Yezu ulongesha ne udiisha mu nyuma bavua mua kufika ku diamba ne: nekuikale tshikondo kampanda mu matuku atshilualua tshikala Muana wa muntu ne bua kulua. Tshikondo atshi, nekuikale bulongolodi buikala buenza mudimu bua kudiisha bayidi ba Yezu mu nyuma, “kasumbu ka bena mudimu” ba Mfumu.

Yezu udi ushindika mu mushindu mukuabu bua tshinyi bayidi bende badi ne bua kuikala badimuke ne kutuma ntema ku mushindu udibu bamona malu. Bidi nanku bualu bidi mua kuenzeka ne: umue wa kudibu abuele mu ditanaji anyi afike too ne ku diluisha bena Kristo nende balume anyi bakaji. Yezu wakamba ne: “Kadi mupika au yeye mudiambile mu muoyo wende ne: ‘Mfumuanyi udi unenga bua kulua,’ ne utuadija kukuma bena mudimu balume ne bakaji, udia, unua ne ukuatshika, mfumu wa mupika au nealue dituku didiye kayi mumutekemene ne pa dîba didiye kayi mumanye, neamupeshe dinyoka dikole menemene ne neamuteke ku luseke lua bantu badi kabayi ne lulamatu.”​—Luka 12:45, 46.

Yezu wakamba ne: uvua mulue “bua kutemesha kapia pa buloba.” Uvua mujule ndululu ivua mikebeshe makokangana makole menze bu kapia avua mafike too ne ku diosha malongesha a dishima ne bilele bia dishima. Ndululu eyi yakatapulula bantu bavua mu buobumue, yenza bua ‘tatu aluishe muanende wa balume ne muana wa balume aluishe tatuende, mamu aluishe muanende wa bakaji ne muana wa bakaji aluishe mamuende, mamu muenu aluishe mukaji wa muanende ne mukaji wa muana aluishe mamuende muenu.’​—Luka 12:49, 53.

Yezu uvua mufile mibelu eyi nangananga bua bayidi bende. Pashishe wakakudimuka kudi musumba wa bantu. Bantu ba bungi bakabenga ne muoyo mujima bua kuitaba tshijadiki tshia ne: Yezu uvua Masiya, ke yeye kubambila ne: “Panutu numona ditutu dibanda luseke lua ku ouest, nutu nuamba diakamue ne: ‘Mvula mukole wa tshipepele udi ulua,’ ne bidi bienzeka. Panutu numona ne: lupepele lua ku sud ludi lututa, nutu nuamba ne: ‘Nekuikale luya lukole,’ ne bidi bienzeka. Nuenu bena lubombo, nudi bamanye mua kukonkonona tshimuenekelu tshia buloba ne diulu, kadi bua tshinyi kanuena bamanye mua kukonkonona tshikondo etshi tshisunguluke?” (Luka 12:54-56) Bushuwa kabavua badilongolole to.