Nzambi udi ufuka mulume ne mukaji ba kumpala

Yehowa wakenza budimi muaba udibu babikila ne: Edene. Budimi ebu buvua buwule tente ne bilongo, mitshi, ne nyama. Pashishe Nzambi wakafuka muntu wa kumpala Adama ne lupuishi, kumuelaye mupuya mu mimpempe ya diulu. Udi mumanye tshiakenzeka anyi? Muntu wakalua ne muoyo! Yehowa wakateka Adama bua alame budimi, ne Nzambi wakamuambila bua inyike nyama ne nyama yonso dîna.

Yehowa wakelela Adama mukenji wa mushinga. Wakambila Adama ne: ‘Udi mua kudia bimuma bia mitshi yonso pa kumbusha bia mutshi umue wa pa buawu. Wewe mudie bimuma bia mutshi au, neufue.’

Pashishe Yehowa wakamba ne: ‘Ndi ngenzela Adama mumukuatshishi.’ Wakaladika Adama tulu tukole, ne pashishe Nzambi wakangata lubadi lumue lua Adama bua kumufukila mukaji. Dîna dia mukaji eu divua Eva. Adama ne Eva bakenza dîku dia kumpala. Adama wakumvua bishi bua mukajende mupiamupia eu? Adama wakasanka bikole, kuambaye ne: ‘Tangila tshidi Yehowa muenze ne lubadi luanyi! Mpindieu, eu mmuntu bu meme.’

Yehowa wakambila Adama ne Eva bua balele bana ne buwuje buloba tente. Uvua musue bua benze mudimu pamue bua bavuije buloba bujima mparadizu, anyi muaba mulengele, anu muvua budimi bua Edene amu. Kadi malu kaakenzeka mushindu au to. Bua tshinyi? Netumanye malu a bungi mu nshapita udi ulonda.