Nzambi udi ufuka diulu ne buloba

Yehowa Nzambi ke Mufuki wetu. Wakafuka bintu bionso bitudi mua kumona ne bitudi katuyi mua kumona. Kumpala kua kufukaye bintu bitudi mua kumona, wakafuka banjelu bungi kabuyi kubala. Udiku mumanye mutu banjelu anyi? Banjelu mbantu badi Yehowa mufuke badi bafuanangane nende. Katuena mua kubamona to, anu bu mutudi katuyi mua kumona Nzambi. Muanjelu wa kumpala uvua Yehowa mufuke wakalua muambuluishi wende. Muanjelu eu wakambuluisha Yehowa pavuaye ufuka mitoto, mabulunge, ne bintu bikuabu bionso. Dimue dia ku mabulunge au ke buloba, muaba wetu muimpe utudi basombele.

Pashishe Yehowa wakalongolola buloba bua nyama ne bantu basombelapu. Wakafuka butoke bua dîba bua bukenkeshe pa buloba. Wakafuka mikuna, mbuu, ne misulu.

Ntshinyi tshiakenzeka pashishe? Yehowa wakamba ne: ‘Ndi ngenza bisonsa ne bikunyibua ne mitshi.’ Mishindu ya bungi mishilashilangane ya mitshi, ya bikunyibua, ne ya bilongo yakatuadija kutoloka. Pashishe Yehowa wakafuka nyama ne bifukibua bidi bibuuka, bidi biowela mu mâyi, bidi bidikoka, ne bidi bilamba. Wakafuka nyama ya mikese bu mudi tululu, ne ya minene bu mudi tupumbu (nzevu). Nnyama kayi uutu munange bikole?

Pashishe Yehowa wakambila muanjelu wa kumpala au ne: “Tuenze muntu.” Bantu bavua ne bua kuikala bashilangane ne nyama. Bavua mua kuenza bintu. Bavua mua kuakula, kuseka, ne kusambila. Bavua ne bua kulama buloba ne nyama. Udiku mumanye muntu wa kumpala wa pa buloba anyi? Tumonayi.