Mpunda wa Balâma udi wakula

Bena Isalele bakadi benze bidimu bitue ku 40 mu tshipela. Bakadi batshimune bimenga bia bungi bia bukole. Mpindieu mbatudile mu mpata ya Moaba, ku est kua musulu wa Yadene, dîba dikavua dikumbane dia bobu kubuela mu Buloba Bulaya. Balaka, mukalenge wa Moaba uvua utshina ne: bavua mua kulua kunyenga buloba buende. Ke yeye kubikidisha muntu mukuabu diende Balâma bua alue ku Moaba bua kuela bena Isalele mulawu.

Kadi Yehowa wakambila Balâma ne: ‘Kuena ne bua kuela bena Isalele mulawu to.’ Ke Balâma kubengaye bua kuya. Mukalenge Balaka wakamubikidisha musangu muibidi, kulayaye bua kumupesha tshionso tshivuaye musue. Kadi Balâma wakabenga kabidi. Pashishe Nzambi wakamuambila ne: ‘Udi mua kuya, kadi udi mua kuamba anu tshindi nkuambila.’

Balâma wakabanda pa mpunda mutangile ku sud ku Moaba. Wakalongolola bua kuela bena Isalele mulawu nansha muvua Yehowa mumukandike. Muanjelu wa Yehowa wakamumuenekela mu njila misangu isatu. Balâma kavua umumona to, kadi mpunda wende uvua umumona. Musangu wa kumpala mpunda wakumbuka mu njila kuyaye mu mpata. Pashishe mpunda wakasemena ku tshimanu tshia mabue, kushindikilaye dikasa dia Balâma ku tshimanu. Ndekelu wa bionso mpunda kusombaye munkatshi mua njila. Misangu yonso isatu Balâma uvua ututa mpunda ne mutshi.

Panyima pa musangu muisatu, Yehowa wakakuisha mpunda. Mpunda wakebeja Balâma ne: ‘Bua tshinyi udi anu untuta?’ Balâma wakamba ne: ‘Bualu udi muntshimbishe. Bu meme ne muele mvua nkushipa.’ Mpunda kuamba ne: ‘Ndi mukuambule kukadi bidimu bia bungi. Nkadiku mukuenzele malu nunku anyi?’

Ke Yehowa kuenza bua Balâma amone muanjelu. Muanjelu wakamuambila ne: ‘Yehowa uvua mukuambile bua kuedi Isalele mulawu.’ Balâma kuamba ne: ‘Ndi muenze bibi. Ndi ngalukila kuanyi.’ Kadi muanjelu wakamuambila ne: ‘Udi mua kuya ku Moaba, kadi wambe anu tshiakuambila Yehowa.’

Balâma uvuaku mupete dilongesha anyi? Tòo. Pashishe, Balâma wakakeba bua kuela bena Isalele mulawu misangu isatu, kadi misangu yonso isatu Yehowa uvua umufikisha ku dibabenesha. Ndekelu wa bionso bena Isalele bakela Moaba mvita, kushipabu Balâma. Kabivuaku mua kuikala bimpe bu Balâma muteleje tshivua Yehowa mumuambile kumpala anyi?