Kabakenza bualu buvuabu balaye

Yehowa wakambila Mose ne: ‘Luaku kundi ku mukuna eku. Nenkufundile mikenji yanyi pa bipese bia mabue ne nenkupeshayi.’ Mose wakabanda ku mukuna ne kushalaku matuku 40 munya ne butuku. Pavuaye ku mukuna eku, Yehowa wakafunda Mikenji dikumi pa bipese ebi bibidi bia mabue ne kubipeshaye Mose.

Mutantshi mukese pashishe, bena Isalele bakela meji ne: Mose uvua mubalekele. Bakambila Alona ne: ‘Tudi tukeba muntu wa kutulombola. Tuenzela nzambi!’ Alona wakamba ne: ‘Mpeshayi or yenu.’ Wakengulula or eyi ne kuenzaye lupingu lua kana ka ngombe. Bena Isalele bakamba ne: ‘Kana ka ngombe aka ke Nzambi wetu uvua mutupatule mu Ejipitu!’ Bakatuadija kutendelela kana ka ngombe ka or, ne bakenza tshibilu tshinene. Tshivuabu benze atshi tshivua tshibi anyi? Eyowa, bualu bena Isalele bavua balaye bua kutendelela anu Yehowa. Kadi mpindieu kabena benza tshivuabu balaye to.

Yehowa uvua mumone tshivua tshienzeka, ke kuambilaye Mose ne: ‘Pueka ndaku kudi bena Isalele. Kabena bantumikila ne badi batendelela nzambi wa dishima.’ Mose wakapueka ku mukuna, muambule bipese bibidi bia mabue.

Pakasemena Mose pabuipi ne muaba uvua bena Isalele batudile, wakumvua bantu bimba misambu. Pashishe wakabamona bombota maja, binamina kana ka ngombe. Mose wakafiika munda bikole. Wakimansha bipese bia mabue bibidi abi panshi, ne biakatayika tupese tupese. Diakamue wakavingutula lupingu elu. Pashishe wakebeja Alona ne: ‘Mmunyi mudi bantu aba bafike ku dikuitabijija bua wewe kuenza bualu butambe bubi ebu?’ Alona wakamba ne: ‘Kufiiki munda to. Wewe udi mumanye mudi bantu aba. Bavua bakeba nzambi, nunku meme kuela or yabu mu kapia, ke kana ka ngombe aku kupatukaku!’ Alona kavua mua kuenza bualu ebu to. Mose wakapingana ku mukuna ne kusengelelaye Yehowa bua afuile bena Isalele luse.

Yehowa wakafuila bantu bonso bavua basue kumutumikila luse. Udi mumone bua tshinyi bivua ne mushinga bua bena Isalele kulondabu bulombodi bua Mose anyi?