Bukalenge buenze anu bu mutshi munene

Dituku dikuabu butuku, Nebukadenesâ wakalota tshilota tshivua tshienza buôwa. Wakabikidisha bena meji ba muende bua bamuambile diumvuija dia tshilota atshi. Kadi muntu nansha umue wa kudibu kakakokesha bua kumumvuija tshilota tshiende to. Ndekelu wa bionso, mukalenge wakayukila ne Danyele.

Nebukadenesâ wakambila Danyele ne: ‘Mvua mumone mutshi kampanda mu tshilota tshianyi. Mutshi au wakalepa kutuawu too ne mu diulu. Bantu ba pa buloba bujima bavua mua kuwumona. Uvua ne mabeji mimpe ne bimuma bia bungi. Nyama ivua yikishila mu dileji diawu, ne nyunyi yenzela masua mu matamba awu. Pashishe muanjelu wakapueka ufumina mu diulu. Wakela dîyi ne: “Upulayi mutshi au, nukose matamba awu. Kadi nushiye tshikuku ne miji yatshi mu buloba, nusuike mukaba wa tshiamu tshifiike ne wa tshiamu tshia mitaku ku tshikuku atshi. Muoyo wa mutshi neukudimuke umbuka ku wa buntu ulua wa nyama, ne tshikuku atshi tshishale nanku bikondo muanda mutekete. Bantu bonso nebamanye ne: Nzambi ke Mfumu ne udi mua kupesha muntu yonso udiye musue bukalenge.”’

Yehowa wakabuluila Danyele diumvuija dia tshilota. Pavua Danyele mumvue tshilota, wakapeta buôwa. Wakamba ne: ‘Mukalenge wanyi, mvua musue bua tshilota etshi tshikale bua baluishi bebe, kadi tshidi tshikutangila wewe. Mutshi munene uvuabu bupule au nguewe. Neujimije bukalenge buebe, ne neudie mashinde mu mpata anu bu nyama ya tshisuku. Kadi bu muvua muanjelu muambe bua kushiya tshikuku ne miji yatshi, neulue kabidi mukalenge.’

Panyima pa tshidimu tshimue, Nebukadenesâ uvua wenda wendakana pa mutu pa dibalasa diende, wanyisha bulenga bua Babilona. Uvua wamba ne: ‘Ndi muibake tshimenga etshi bimpe bia dikema! Bushuwa, ndi muntu munene!’ Patshivuaye wakula apu, wakumvua dîyi difuma mu diulu diamba ne: ‘Nebukadenesâ! Wajimiji bukalenge buebe mpindieu.’

Anu pa dîba adi, Nebukadenesâ wakajimija lungenyi, kushalaye bu nyama wa tshisuku. Wakadimona muenzejibue bua kushiya dibalasa diende, kutuadijaye kusomba mu tshisuku muvua nyama ya tshisuku. Nsuki ya Nebukadenesâ yakalepa kuluayi bu masala a mukanku, ne nzadi yende ivua anu bu nzadi ya nyunyi.

Pakapita bidimu muanda mutekete, Nebukadenesâ wakapetulula lungenyi ne Yehowa wakamuteka mukalenge wa Babilona. Pashishe Nebukadenesâ wakamba ne: ‘Ndi ntumbisha Yehowa, Mukalenge wa diulu. Mpindieu ndi mufike ku dimona ne: Yehowa ke Mfumu. Udi upuekesha bantu badi badibandisha, ne udi mua kupesha muntu yonso udiye musue bukalenge.’