Ntenta wa tshitendelelu bua kutendelela

Pavua Mose ku Mukuna wa Sinai, Yehowa wakamuambila bua ibake ntenta wa pa buende, uvuabu babikila ne: ntenta wa tshitendelelu, muvua bena Isalele mua kutendelela Nzambi. Bavua ne bua kuikala bambula ntenta wa tshitendelelu eu baya nende muaba wonso uvuabu baya.

Yehowa wakamba ne: ‘Ambila bena Isalele bafile bidibu bakokeshe bua bamone mua kuibaka ntenta wa tshitendelelu.’ Bena Isalele bakafila or, arjan, tshiamu tshia mitaku, ne mabue a mushinga mukole. Bakafila kabidi miose ya mikoko, bilamba bia line, biseba bia nyama ne bintu bikuabu bia bungi. Bavua anu bafila bintu bia bungi, Mose kufika too ne ku dibambila ne: ‘Bitukadi nabi mbikumbane! Kanufidi tshintu tshikuabu to.’

Bantu balume ne bantu bakaji ba bungi bavua ne mamanya bakambuluisha bua kuibaka ntenta wa tshitendelelu eu. Yehowa wakabapesha meji bua kuenzabu mudimu eu. Bamue bavua baluka manda, banga benza bilamba, anyi bazolapu ne manda. Bakuabu bavua basonga mabue, balongolola or, anyi basonga mitshi.

Bena Isalele bakibaka ntenta wa tshitendelelu anu muvua Yehowa mubambile. Bakenza tshilamba tshimpe bua kukosolola ntenta wa tshitendelelu eu mu bitupa bibidi, tshitupa tshia Muaba wa Tshijila ne tshia Muaba Mutambe Tshijila. Mushete wa tshipungidi muenza ne mabaya a mutshi wa musese ne or uvua mu Muaba Mutambe Tshijila. Tshitekelu tshia miendu ne mêsa ne tshioshelu tshia kuoshela musenga wa manananshi bivua mu Muaba wa Tshijila. Mu lubanza muvua dilongo dia tshiamu tshia mitaku ne tshioshelu tshinene. Mushete wa tshipungidi uvua uvuluija bena Isalele ne: bavua balaye bua kutumikila Yehowa. Udi mumanye tshidi tshipungidi tshiumvuija anyi? Tshidi tshiumvuija dilaya dia pa buadi didi muntu ulaya.

Yehowa wakasungula Alona ne bana bende bua kuenzabu mudimu ku ntenta wa tshitendelelu bu bakuidi. Bavua ne bua kumulama bimpe ne kulambulaku Yehowa milambu. Anu muakuidi munene Alona ke uvuabu banyishile bua kubuela mu Muaba Mutambe Tshijila. Uvua ubuela muaba eu musangu umue ku tshidimu bua kulambula mulambu bua mpekatu yende, ya bena mu dîku diende, ne ya tshisamba tshijima tshia Isalele.

Bena Isalele bakajikija ntenta wa tshitendelelu tshidimu tshimue panyima pa dipatuka diabu mu Ejipitu. Bavua mpindieu mua kutendelela Yehowa.

Yehowa wakuwuja ntenta wa tshitendelelu ne butumbi buende, ne wakapatula ditutu pa mutu pende. Pavua ditutu edi pa mutu pa ntenta wa tshitendelelu, bena Isalele bavua bashala muaba uvuabu au. Kadi pavua ditutu diumbuka, bavua bamanya ne: tshikondo tshia kuasa luendu ntshikumbane. Bavua ne bua kumbusha ntenta wa tshitendelelu muaba uvuaye ne kulonda ditutu.