Tubingishayi ditabuja dietu

‘Nujidile Kristo mu mitshima yenu bu Mukalenge; nuikale badilongolole misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu.’​—1 PETELO 3:15.

1, 2. Bua tshinyi buluishi kabuena bukemesha Bantemu ba Yehowa, kadi ntshinyi tshidibu bajinga?

MU MATUNGA a bungi, Bantemu ba Yehowa mbamanyike pa tshibidilu bu bantu bena bululame ne ba nsombelu muimpe. Bantu ba bungi batu babamona bu bena mutumba bimpe batu kabayi bakeba bilumbu. Kadi kabiyi biumvuangana ne nsombelu wabu mulenga, mbakengeshe bena nkristo aba banangi ba ditalala kakuyi bualu​—mu bikondo bia mvita ne bia ditalala. Buluishi ebu kabuena bubakemesha nansha. Bushuwa, mbabutekemene. Mbamanye ne: bavua bakine bena nkristo ba lulamatu ba mu siekele wa kumpala B.B., nenku bua tshinyi aba badi badienzeja bua kuikala balondi balelela ba Kristo lelu’eu badi ne bua kutekemena bua babenzele bimpe? (Matayo 10:22) Kabidi, Bible udi wamba ne: ‘Bantu bonso badi basue kuikala bena kanemu mu Kristo Yezu nebakengeshibue.’​—2 Timote 3:12.

² Bantemu ba Yehowa kabatu badikebela dikengeshibua, ne ntatu itu ifuminaku bu mudi bibawu, maloko anyi tshikisu kayitu ibasankisha to. Badi bajinga bua ‘kuikala ne muoyo mupola polaa’ bua bamone mua kuyisha lumu luimpe lua Bukalenge bua Nzambi kakuyi tshipumbishi. (1 Timote 2:1, 2) Badi banyisha budikadidi bua ntendelelu budibu nabu mu matunga mavule bua kutungunukabu ne malu a ntendelelu wabu, ne muoyo mujima badi benza muabu muonso bua ‘kuikala ne bantu bonso ditalala,’ pamue ne bakokeshi ba mbulamatadi ya bantu. (Lomo 12:18; 13:1-7) Kadi bua tshinyi mbabakine?

3. Nkabingila kayi kamuepele kadibu bakinyine Bantemu ba Yehowa kakuyi bualu?

³ Mu bulelela, mbakine Bantemu ba Yehowa tshianana amu bua tubingila tua muomumue tuvuabu bakengeshile bena nkristo ba kumpala. Ka kumpala: Bantemu ba Yehowa badi balonda mitabuja a tshitendelelu tshiabu mu mishindu idi ifikisha bantu ku dibenga kubananga. Tshilejilu, badi bayisha ne lukunukunu lumu luimpe lua Bukalenge bua Nzambi, kadi misangu mivule bantu batu bangata lukunukunu luabu elu bibi, bamona buambi buabu bu “dikudimuisha bantu mitshima ku bukole.” (Fuanyikija ne Bienzedi 4:19, 20.) Badi kabidi balama ndubidilu mu malu a tshididi ne a mvita ya matunga, imue misangu batu bangata bibi dilama ndubidilu edi, bamba ne: Bantemu mbena-muabu badi kabayi ne lulamatu.​—Mika 4:3, 4.

4, 5. (a) Mmunyi mudibu babande Bantemu ba Yehowa ne malu a dishima? (b) Mbanganyi batu misangu mivule batamba kukebela basadidi ba Yehowa dikenga?

⁴ Kibidi: mbashiminyine Bantemu ba Yehowa malu​—mashimi a patoke ne malu makonyangaja bua mitabuja abu. Tshipeta tshidi se: mbababunde kakuyi bualu mu amue matunga. Kabidi, bualu badi bakeba luondapu ludi kaluyi luenza mudimu ne diela mashi ne ludi lumvuangana ne dijinga diabu dia kutumikila dîyi dia mu Bible dia ‘kulekela mashi,’ mbabambe patupu mudibu “bashipi ba bana” ne “ntendelelu wa didishipa.” (Bienzedi 15:29) Kadi bulelela budi se: Bantemu ba Yehowa badi bangata muoyo ne mushinga wa bungi, ne badi bakeba luondapu lutambe buimpe buabu buobu ne bua bana babu. Dibanda dia se: bana bavule ba Bantemu ba Yehowa badi bafua tshidimu tshionso bua dibenga mashi kadiena ne nshindamenu nansha mukese to. Kabidi, bu mudi bulelela bua mu Bible kabuyi ne buenzeji bua muomumue kudi bena mu dîku bonso, mbafunde Bantemu ba Yehowa bamba mudibu bapandulula mêku a bantu. Pabi, bantu badi bamanye Bantemu ba Yehowa mbajadike ne: batu baleja kanemu ka bungi bua nsombelu wa dîku ne batu badienzeja bua kulonda mêyi a mu Bible a se: mulume ne mukaji banangangane ne banemekangane, ne se: bana batumikile baledi babu nansha bikalabu bena kuitabuja anyi kabayi bena kuitabuja.​—Efeso 5:21–6:3.

⁵ Misangu ya bungi, batu batamba kukebela basadidi ba Yehowa dikenga mbaluishi bena bitendelelu badi benza mudimu ne malanda adibu nawu ne bakokeshi ba tshididi ne ba-kamona-kamba bua kukeba bua kushipa midimu ya Bantemu. Bu mutudi Bantemu ba Yehowa, ntshinyi tshitudi ne bua kuenza padibu batuluisha​—nansha bikale bua mitabuja ne bibidilu bietu peshi bua malu adibu batubanda nawu?

“Butshintshikidi buenu bumanyike kudi bantu bonso”

6. Bua tshinyi mbia mushinga bua kuikala ne mmuenenu wa nkatshinkatshi bua bantu badi pambelu pa tshisumbu tshia bena nkristo?

⁶ Tshia kumpala, tudi ne bua kuikala ne mmuenenu muakane​—mmuenenu wa Yehowa—​bua bantu badi kabayi mu tshitendelelu tshietu. Tshianana tudi mua kudikebela patupu buluishi anyi ditupetula kudi bantu bakuabu. Mupostolo Paulo wakafunda ne: “Butshintshikidi buenu bumanyike kudi bantu bonso.” (Filipoi 4:5, NW) Bua nenku Bible udi utukankamija bua kuikala ne mmuenenu wa nkatshinkatshi bua bantu badi pambelu pa tshisumbu tshia bena nkristo.

7. ‘Kudilama katuyi ne ditoba dia ku malu a pa buloba’ kudi kumvuija tshinyi?

⁷ Ku lumue luseke, Mifundu idi itubela patoke bua ‘kudilama katuyi ne ditoba dia ku malu a pa buloba.’ (Yakobo 1:27; 4:4) Muaba eu, anu bu miaba ya bungi mu Bible, muaku “buloba” udi ufunkuna tshisumbu tshia bantu batapuluke ne bena nkristo balelela. Tudi basombele munkatshi mua nsangilu eu wa bantu; tudi tupetangana nabu ku mudimu, mu tulasa ne pamue ne ku metu. (Yone 17:11, 15; 1 Kolinto 5:9, 10) Nansha nanku, tudi tudilama katuyi ne ditoba dia ku malu a pa buloba pa kuepuka mmuenenu, ngakuilu ne bikadilu bibengangane ne njila miakane ya Nzambi. Bidi kabidi bia mushinga mukole bua tuetu kujingulula njiwu idiku mu ditamba kulamakana ne ba pa buloba ebu, nangananga ne bantu badi baleja kapeja kakole bua mêyi-makulu a Yehowa.​—Nsumuinu 13:20.

8. Bua tshinyi mubelu wa kushala katuyi ne ditoba dia ku malu a pa buloba kawena utupesha kabingila bua kupepeja bakuabu?

⁸ Kadi mubelu wa kushala katuyi ne ditoba dia ku malu a pa buloba kawena utupesha kabingila nansha kamue bua kupepeja ne muoyo umue bantu badi kabayi Bantemu ba Yehowa. (Nsumuinu 8:13) Vuluka tshilejilu tshia bamfumu ba bitendelelu bena Yuda batudi bakule bualu buabu mu tshiena-bualu tshishale. Tshitendelelu tshivuabu benze katshivua ne dianyisha dia kudi Yehowa nansha; peshi katshiakakankamija malanda mimpe ne bantu bavua kabayi bena Yuda to. (Matayo 21:43, 45) Bu muvuabu badimone bakane, bantu aba bena bulamate bunekesha bavua bapepeja Bampangano. Tuetu katuena tuangata mmuenenu eu mukolesha, tupepeja bantu badi kabayi Bantemu nansha. Amu bu mupostolo Paulo, dijinga dietu ndia se: muntu yonso udi uteleja mukenji wa bulelela wa mu Bible apete dianyisha dia kudi Nzambi.​—Bienzedi 26:29; 1 Timote 2:3, 4.

9. Mmuenenu wa nkatshinkatshi ne wa mu Mifundu udi ne bua kuikala ne buenzeji kayi pa mushindu utudi tuakula bua bantu badi kabayi ne mitabuja etu?

⁹ Mmuenenu wa nkatshinkatshi ne wa mu Mifundu udi ne bua kuikala ne buenzeji pa mushindu utudi tuakula bua bantu badi kabayi Bantemu. Paulo wakambila Tito bua avuluije bena nkristo ba mu tshidiila tshia Kreta bua ‘kabakudi mêyi mabi bua muntu; kabikadi ne kutandangana; bikale ne bupole; baleje bantu bonso kalolo konso.’ (Tito 3:2) Mmona se: bena nkristo kabavua ne bua kuakula mêyi mabi bua “muntu”​—nansha bua bantu bavua kabayi bena nkristo mu Kreta, bamue ba kudibu bavua bamanyike bu bena mashimi, bafube ne bena mudi. (Tito 1:12) Nenku kabiena biumvuangana ne mifundu bua tuetu kutumika ne miaku idi ipuekeshangana milongo patudi tuakula bua bantu badi kabayi ne mitabuja etu. Mmuenenu wa didimona bu bapite bakuabu kakukoka bantu ku ntendelelu wa Yehowa nansha. Kadi patudi tumona ne tuangata bakuabu mu mushindu mumvuangane ne mêyi-maludiki a meji a mu Dîyi dia Yehowa, tudi ‘tutumbisha diyisha’ dia Nzambi.​—Tito 2:10.

Dîba dia kupuwa ne dia kuakula

10, 11. Mmunyi muakaleja Yezu ne: uvua mumanye dîba divuaku (a) ‘tshikondo tshia kupuwa’? (b) “tshikondo tshia kuakula”?

¹⁰ Muambi 3:7 udi wamba ne: kudi ‘tshikondo tshia kupuwa ne tshikondo tshia kuakula.’ Nenku muaba eu ke udi lutatu: kumanya dîba dia kulengulula baluishi ne dia kuakula bua kubingisha ditabuja dietu. Tudi mua kulongela malu a bungi ku tshilejilu tshia muntu uvua misangu yonso muikale ne meji mapuangane​—Yezu. (1 Petelo 2:21) Uvua mumanye dîba divuaku ‘tshikondo tshia kupuwa.’ Tshilejilu, pavua bakuidi bamfumu ne bakulu bamubande kumpala kua Pilato, Yezu ‘kakandamuna dîyi.’ (Matayo 27:11-14) Kavua musue kuamba tshintu tshivua mua kupangakana ne dikumbana dia disua dia Nzambi bua bualu buende. Kadi wakasungula bua kulekela bienzedi biende bidiakuila nkayabi. Uvua mumanye ne: nansha bulelela kabuvua mua kushintulula meji ne mitshima yabu ya lutambishi. Nenku wakalengulula dibanda diabu, kushalaye mupuwe mumanye tshivuaye mupuwile.​—Yeshaya 53:7.

¹¹ Nansha nanku, Yezu uvua kabidi mumanye dîba divuaku “tshikondo tshia kuakula.” Umue musangu, wakakokangana patoke ne bantu bavua bamuelesha mpata, kulejaye muvua mabanda abu a dishima. Tshilejilu, pavua baskribe ne Bafarizeyi bakeba bua kumupuekesha milongo kumpala kua musumba wa bantu pa kuamba ne: udi wipata ba-demon ku diambuluisha dia Belezebula, Yezu wakapangadija bua kubenga kulekela mabanda abu ashala nanku. Ne dielangana meji ditue pamue ne mufuanu wa bukole, wakatonkola dishima diabu adi. (Mâko 3:20-30; tangila kabidi Matayo 15:1-11; 22:17-21; Yone 18:37) Bia muomumue, kunyima kua dimutungila ne dimukuata, bakaya ne Yezu kumpala kua kabadi ka Sanhedrin, Muakuidi Munene Kayifase wakamukonka ne budimu se: ‘Ndi nkutshipisha mu dîna dia Nzambi udi ne muoyo, udi biebe Kristo Muana wa Nzambi anyi?’ Etshi tshivua kabidi “tshikondo tshia kuakula,” bualu kushala mupuwe kuvua mua kumvuika bu divila mudiye kayi Kristo. Nenku Yezu wakandamuna ne: “Mmomu.”​—Matayo 26:63, 64; Mâko 14:61, 62.

12. Nnsombelu kayi yakasaka Paulo ne Bânaba bua kuakula ne dikima mu Ikoniyo?

¹² Tangila kabidi tshilejilu tshia Paulo ne Bânaba. Mukanda wa Malu Menza 14:1, 2 (MMM) udi wamba ne: “Ku Ikoniyo, Paulo ne Barnaba kubuela kabidi muomumue mu nzubu wa disambila wa bena Yuda, kuakulabo; ke bena Yuda ba bungi ne bena Ngreka kuitababo. Kadi bena Yuda bavua bashale ne mpata, kusonsolabo bantu ba bisamba bikuabo bua kubipishabo bana betu.” Tudi tubala mu Mukanda wa Nzambi ne: ‘Kadi bena Yuda bakadi bapidia bakavundulula mitshima ya bantu ba bisamba bia bende, bakayivuija mifike kudi bena kuitabuja.’ Pamutu pa buobu nkayabu kubenga mukenji eu, baluishi bena Yuda bakaditua mu ditangalaja malu a dishima, bakeba bua kupesha Bampangano meji mabi bua bena nkristo.a Bushuwa bavua ne lukuna lukole bua Buena-nkristo! (Fuanyikija ne Bienzedi 10:28.) Paulo ne Bânaba bakamona ne: etshi tshivua “tshikondo tshia kuakula” bua bayidi bapiabapia kabateketshi mu mikolo bua dibatobolola edi dia patoke. ‘[Paulo ne Bânaba] bakashalamu musangu mule, bakajukuila bantu dîyi mu Mukalenge,’ ne Nzambi wakaleja dianyisha diende pa kubapesha bukole bua kuenza bishima. Bualu ebu buakafikisha bamue ku dilamata ‘ku luseke lua bena Yuda, bakuabu ku luseke lua bapostolo.’​—Bienzedi 14:3, 4.

13. Padibu batutobolola, pa tshibidilu ndîba kayi ditu dikale ‘tshikondo tshia kupuwa’?

¹³ Kadi ntshinyi tshitudi ne bua kuenza padibu batutobolola? Bionso mbisuikila ku nsombelu idiku. Imue nsombelu idi itulomba bua kutumikila dîyi-diludiki dia se: kudi ‘tshikondo tshia kupuwa.’ Bidi nenku nangananga padi baluishi ba tshisumi bakeba bua kutubueja mu dielangana mpata tshianana. Katuena ne bua kupua muoyo se: bamue bantu ki mbasue kumanya bulelela to. (2 Tesalonika 2:9-12) Kukeba bua kuelangana meji ne bantu ba lutambishi badi ne mitshima mijame mu tshitshiu kakuena mua kupatula bipeta bimpe nansha. Kabidi, tuetu baditue mu dielangana mpata ne muntu yonso udi utuyobola ne mabanda, tudi mua kushiya ku luseke mudimu wa mushinga mukole ne udi usankisha​—wa diambuluisha bantu bena mitshima milulame badi basue bushuwa kulonga bulelela bua mu Bible. Nenku patudi tutuilangana ne baluishi badi ne tshipatshila tshia kututangalajila malu a dishima, mubelu mufundisha ku spiritu udi se: ‘Tubakome nyima.’​—Lomo 16:17, 18; Matayo 7:6.

14. Mmu mishindu kayi mutudi mua kubingisha ditabuja dietu kumpala kua bakuabu?

¹⁴ Bushuwa, bualu ebu kabuena bumvuija ne: katuena tubingisha ditabuja dietu. Tuamba eku tuela kuaka, kudi kabidi “tshikondo tshia kuakula.” Tudi badiakaje bua kupesha bakuabu mumvuija matoke a malu atudi bitabuje ne muoyo mujima; bushuwa, tudi tuitaba bua kuenza nanku. Petelo wakafunda ne: ‘Nujidile Kristo mu mitshima yenu bu Mukalenge; nuikale badilongolole misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina.’ (1 Petelo 3:15) Padi bantu badi basankidila bulelela ne muoyo mujima bakeba tshijadiki tshia mitabuja atudi tuanyisha bikole, padibu bebeja bua malu adi baluishi batubanda nawu, mbujitu buetu bua kubingisha ditabuja dietu, bua kufila mandamuna mimpe a mu Bible. Kabidi, tshikadilu tshietu tshilenga tshidi mua kuikala bumanyishi bukole. Padi bantu ba lungenyi lunzuluke bamona se: bushuwa tudi tudienzeja bua kuikala ne nsombelu mumvuangane ne mêyi-makulu ne makane a Nzambi, badi mua kujingulula ne lukasa ne: malu adibu batubanda nawu nga dishima.​—1 Petelo 2:12-15.

Tshia kuenza ntshinyi bua ngumu ya dishima?

15. Fila tshilejilu tshimuepele tshia muvuabu bashiminyine Bantemu ba Yehowa malu mu tshikandakanda.

¹⁵ Ku misangu batu bendeshila Bantemu ba Yehowa ngumu ya dishima ku tudiomba ne mu bikandakanda. Tshilejilu, mu dia 1 Tshimungu 1997, tshikandakanda kampanda tshia bena Russie tshiakapatula tshiena-bualu tshivua ne malu a dishima. Tshilejilu tshivua tshiamba ne: Bantemu batu bambila bena mu nzambi wabu patoke bua ‘kubenga bakaji, balume ne baledi babu padibu kabayi bumvua ne kabayi balamata ku ditabuja diabu.’ Muntu yonso udi mumanye bimpe Bantemu ba Yehowa mmujadike ne: bualu ebu mbua dishima. Bible udi uleja ne: bena nkristo badi ne bua kuenzela bena dîku badi kabayi bena kuitabuja malu ne dinanga ne kanemu, ne Bantemu batu badienzeja bua kulonda njila eu. (1 Kolinto 7:12-16; 1 Petelo 3:1-4) Nansha nanku, bavua bapatule tshiena-bualu etshi, ne bavua bamanyishe babadi ba bungi malu avua kaayi malelela. Mmunyi mutudi mua kubingisha ditabuja dietu padibu batubanda ne malu a dishima?

16, 17, ne kazubu mu dibeji dia 16. (a) Ntshinyi tshiakamba Tshibumba tshia Nsentedi umue musangu bua diandamuna ku malu a dishima mamanyisha ku tudiomba anyi mu bikandakanda? (b) Mmu nsombelu kayi mudi Bantemu ba Yehowa mua kuandamuna ku ngumu mibi mibendeshila ku tudiomba anyi mu bikandakanda?

¹⁶ Muaba eu kabidi, kudi ‘tshikondo tshia kupuwa ne tshikondo tshia kuakula.’ Umue musangu Tshibumba tshia Nsentedi tshiakamba nunku: ‘Kulengulula ngumu ya dishima ya ku tudiomba anyi kubingisha bulelela ku diambuluisha dia mishindu miakanyine nkusuikila ku nsombelu idiku, mujudi wa didiwula ne kipatshila kende.’ Mu imue nsombelu bidi mua kuikala bitambe buimpe bua kulengulula ngumu mibi mituendeshila, bua kubenga kutangalajija kabidi mashimi.

¹⁷ Mu mikuabu nsombelu bidi mua kuikala “tshikondo tshia kuakula.” Badi mua kuikala bamanyishe kamona-kamba wa kueyemena malu adi kaayi malelela bua Bantemu ba Yehowa ne udi mua kuanyisha bua kupeta mamanyisha malelela adi atutangila. (Tangila kazubu “Dilongolola malu adi kaayi malelela.”) Bikala ngumu mibi ya ku tudiomba anyi mu bikandakanda ijula mmuenenu mubi udi upumbishisha mudimu wetu wa buambi, baleji-mpala ba biro bia filiale wa Société Watch Tower badi mua kuangata dipangadika dia kubingisha bulelela ku diambuluisha dia imue mishindu miakanyine.b Tshilejilu, badi mua kutuma bakulu bapie bua kuleja mushindu udi malu, bu mudi ku TV, bua kabalu kuamba ne: Bantemu ba Yehowa kabena ne tshia kuandamuna. Mu malu a nunku Bantemu muntu pa nkayende badi bakuatshishangana mu mushindu wa meji ne balombodi ba Société Watch Tower ne baleji-mpala bende.​—Ebelu 13:17.

Tubingishayi lumu luimpe ku diambuluisha dia mikenji

18. (a) Bua tshinyi katuena dijinga ne dianyisha dia kudi mbulamatadi ya bantu bua kuyisha? (b) Ntshinyi tshitutu tuenza padibu batubengela dianyisha bua kuyisha?

¹⁸ Dianyisha ditupesha bua kuyisha lumu luimpe lua Bukalenge bua Nzambi ndifume mu diulu. Mbapeshe Yezu, wakatutuma bua kuenza mudimu eu, ‘bukokeshi buonso mu diulu ne pa buloba.’ (Matayo 28:18-20; Filipoi 2:9-11) Pa nanku katuena dijinga ne dianyisha dia kudi mbulamatadi ya bantu bua kuyisha. Nansha nanku, tudi tuitaba ne: kuikala ne budikadidi bua ntendelelu kudi kuambuluisha bua kutangalaja mukenji wa Bukalenge. Mu matunga mutudi ne budikadidi bua kutungunuka ne ntendelelu wetu, netuenze mudimu ne ndongoluelu wa mikenji bua kubukuba. Muaba udibu batubengele budikadidi ebu, netudienzeje bua kubupeta bilondeshile mikalu ya mikenji. Tshipatshila tshietu ki ntshia kushintulula nsombelu udi mu nsangilu wa bantu nansha, kadi ntshia ‘kubingisha ne kujadika lumu luimpe ku diambuluisha dia mikenji.’c​—Filipoi 1:7, NW.

19. (a) ‘Dipa Nzambi bintu bia Nzambi’ didi mua kulela tshinyi? (b) Ntshinyi tshitudi bapangadije bua kuenza?

¹⁹ Bu mutudi Bantemu ba Yehowa, tudi tuangata Yehowa bu Mfumu Mukulu wa bionso. Mukenji wende udi ku mutu kua bionso. Ne dimanya dionso tudi tutumikila mbulamatadi ya bantu, nenku ‘tupa Kaisa bintu bia Kaisa.’ Kadi katuakulekela tshintu nansha tshimue tshitupangisha bua kukumbaja bujitu buetu bua mushinga mukole​—‘kupa Nzambi bintu bia Nzambi.’ (Matayo 22:21) Tudi bajingulule bimpe ne: kuenza nenku nekufikishe bisamba ku ditukina, kadi tudi tuitaba bualu ebu bu tshitupa tshia mushinga wa buyidi. Malu adi atangila mikenji adi Bantemu ba Yehowa benze mu siekele eu wa 20 ntshijadiki tshia dipangadika dietu dia kubingisha ditabuja dietu. Bua diambuluisha ne dikuatshisha dia Yehowa, netutungunuke ‘katuyi tulekela kuyisha bantu ne kubambila lumu luimpe.’​—Bienzedi 5:42.

[Mêyi adi kuinshi]

Udi muvuluke anyi?

◻ Bua tshinyi mbakine Bantemu ba Yehowa?

◻ Mmunyi mutudi ne bua kuangata bantu badi kabayi mu tshitendelelu tshietu?

◻ Pavuaye kumpala kua baluishi, ntshilejilu kayi tshia nkatshinkatshi tshiakashiya Yezu?

◻ Padibu batutobolola, mmunyi mutudi mua kutumikila dîyi-diludiki dia se: kudi ‘tshikondo tshia kupuwa ne tshikondo tshia kuakula’?

[Kazubu mu dibeji 16]

Dilongolola malu adi kaayi malelela

“Mu tshimenga tshia Yacuiba, ku Bolivie, kasumbu ka bena malu a Nzambi kakenza bua kadiomba ka TV kaleje filme uvua umueneka mupatula kudi batontolodi. Pa kumona bipeta bibi bia ndongamu au, bakulu bakapangadija bua kuya ku tudiomba tubidi tua TV ne kulomba bua kufuta bena tudiomba etu makuta bua baleje bantu bande wa video wa Les Témoins de Jéhovah​—Un nom, une organisation ne wa La Bible: un récit historique exact, des prophéties dignes de foi. Mumane kumona bande eyi ya Société, muena kadiomba ka tshisanji wakanyingalala bua malu a dishima a mu ndongamu wa batontolodi abu ne wakalaya bua kuenzela Bantemu ba Yehowa mamanyisha kabayi bafuta bua mpungilu wabu wa distrike uvua kumpala. Bantu ba bungi bakabuelamu kupita ba pa tshibidilu, ne bantu bavule ba mitshima milulame bakatuadija kuela nkonko ne muoyo umue pavua Bantemu babakumbula mu mudimu wa buambi.”​—Annuaire 1997 des Témoins de Jéhovah, mabeji 61-62.

[Tshimfuanyi mu dibeji 17]

Ku misangu, Yezu uvua uleja patoke muvua mabanda a bantu bavua bamuelesha mpata mikale a dishima