Kakuena tshintu tshilenga tshipite bulelela

Bu mudibi bilonda kudi G. N. Van Der Bijl

Mu Kabalashipu 1941, bakamfila mu bianza bia bena Gestapo ne kuyabu nanyi mu kamponya ka disubishilangana ka ku Sachsenhausen, pabuipi ne tshimenga tshia Berlin, mu Allemagne. Kuine aku, bu muena buloko wa nimero 38190, ngakashalaku too ne ku dituku dia luendu lua lufu lua kavuambu lua mu Tshisanga 1945. Kadi kumpala kua meme kunumvuija malu au, lekelayi nnumvuije mungakalua muena buloko.

NDI muledibue mu tshimenga tshia Rotterdam, mu ditunga dia Pays-Bas, katupa kîpi panyima pa ntuadijilu wa Mvita ya Kumpala ya Buloba bujima, mu 1914. Tatu uvua muena mudimu wa njanja, ne nzubu wetu mukese uvua pabuipi ne njila wa njanja. Batangile ku ndekelu kua mvita mu 1918, mvua mmona tuwulu tuvuabu babikila ne: tua babedi tupita lubilu ne mutoyi. Kakuyi mpata tuvua tûle ne basalayi batapike bavuabu baluja ku mabu bafumina ku mvita.

Pankavua ne bidimu 12, ngakumbuka mu kalasa bua kukeba mudimu. Bidimu muanda-mukulu pashishe bakangangata bu muena mudimu mu mazuwa a mâyi adi ambula bantu, ne munkatshi mua bidimu binayi biakalonda, mvua ngenda ne mazuwa pankatshi pa Pays-Bas ne États-Unis.

Patuakatula ku dilobo dia tshimenga tshia New York mu muvu wa été wa 1939, mvita mikuabu ya buloba bujima ikavua isua kutuadija. Nenku pakabanda muntu kampanda mu mazuwa etu ne kumpesha mukanda wa Government, uvua wakula bua mbulamatadi muakane, ngakawangata ne disanka dionso. Bamane kupingana ku Rotterdam, meme kutuadija kukeba mudimu mu ditunga, bualu nsombelu pa mbuu katshivua umueneka kabidi ne bukubi. Mu dia 1 Kabitende, ditunga dia Allemagne diakakuata dia Pologne ne bukua-matunga buakadina mu Mvita Mibidi ya Buloba bujima.

Ndi ndonga bulelela bua mu Bible

Mu dinda dia Dia lumingu kampanda mu Luabanya 1940, mvua mu dikumbula tutuanyi ukavua musele pakalua Ntemu umue wa Yehowa kuela ngonga ku tshiibi. Meme kumuambila ne: nkavua mupete mukanda wa Government ne kumukonka bua diulu ne bua badi bayamu. Diandamuna ditoke ne dia meji dingakapeta diakamfikisha ku didiambila ne: ‘Ke bulelela ebu.’ Meme kumupesha adrese wanyi ne kumulomba bua kunkumbulaye kuanyi.

Panyima pa makumbula asatu patupu, mutuakayukila mu buondoke pa malu a Bible, ngakatuadija kufila Ntemu eu mu mudimu wa diyisha wa ku nzubu ne ku nzubu. Patuvua tufika mu teritware, uvua undeja muaba wa kutuadijila, ne mvua ndiyila nkayanyi. Ke mushindu uvuabu babueja bapiabapia bavule mu mudimu wa diyisha mu matuku au. Bakambela ne: bua kubenga kumueneka mu musesu, mvua misangu yonso ne bua kuikala munda mua tshibuelelu tshia nzubu pamvua ndeja mikanda. Bivua bikengela budimu mu matuku au a ku ntuadijilu kua mvita.

Mbingu isatu pashishe, mu dia 10 Lumungulu 1940, tshiluilu tshia bena Allemagne tshiakakuata Pays-Bas, ne mu dia 29 Lumungulu, Seyss-Inquart, muleji-mpala wa Reich (mbulamatadi) wakamanyisha ne: bulongolodi bua Bantemu ba Yehowa buvua bukandika. Tuvua tusangila anu mu tusumbu tukese, ne tuvua tuleja budimu bua miaba yetu ya bisangilu kushalayi misokome. Makumbula a batangidi bena ngendu avua nangananga atupetesha makanda.

Mvua nnua makanya bikole, ne pangakapesha Ntemu uvua ulonga nanyi mutshi wa makanya ne kumona kayi unua, ngakamba ne: “Tshivuaku mua kulekela dinua makanya!” Kadi mutantshi mukese pashishe, pamvua ngenda nya mu njila, ngakela meji ne: ‘Bingikala mua kulua Ntemu, ndi ne bua kuikala Ntemu mulelela.’ Nenku tshiakanuaku kabidi makanya.

Ndi ndamata bulelela

Mu Kabalashipu 1940, ngondo isatu kayanji kukumbana panyima pa dipetangana dianyi ne Ntemu au kumbelu kua tutuanyi, ngakaleja didilambula dianyi kudi Yehowa ne ngakatambula. Ngondo mikese pashishe, mu Kasuamansense 1940, ngakabuela mu mudimu wa ku dîba ne ku dîba bu mpanda-njila. Tshikondo atshi, bakampesha tshivuabu babikila ne: kazaku ka bampanda-njila. Kavua ne bibombi bivule bia kuela mikanda ne tukanda tukese, ne bavua mua kukavuala muinshi mua nkotshi.

Anu ku ntuadijilu kua dibuela dia bena Allemagne, bavua bipatangana ne Bantemu ba Yehowa ne babakuata mu mushindu mulongolola. Mu dinda kampanda mu Luishi 1941, mvua mu mudimu wa budimi pamue ne ndambu wa Bantemu bakuabu. Pavuabu bakumbula bantu ku lumue luseke lua mulongolongo wa nzubu, mvua ngenza mudimu ku luseke lukuabu lua mulongolongo eu bua kusambakena nabu. Ndekelu, ngakaya kumona tshivua tshibanengesha ne kusambakena ne muntu kampanda wakankonka ne: “Udi pebe ne mikanda mikese ya buena eyi anyi?”

“Eyowa,” ke mungakandamuna. Anu apu wakankuata ne kuya nanyi ku biro bia bampulushi. Bakandama munkatshi mua mbingu bu inayi. Bavule ba ku bamfumu ba bampulushi bavua bena bulunda. Pavua muntu kayi muanji kufila mu bianza bia bena Gestapo, bavua mua kumulekela bu yeye mua kutua patupu tshiala pa mêyi mafunda a se: kavua kabidi mua kuabanya mikanda idi yumvuija Bible. Pakangambilabu bua kutua tshiala pa mêyi a nunku, ngakandamuna ne: “Nansha nuenu bampeshe gulden (mfranga ya ditunga edi) muliyo umue anyi ibidi, tshiakutuaku tshiala nansha.”

Panyima pa bamane kundama mutantshi, bakamfila mu bianza bia bena Gestapo. Pashishe bakaya nanyi mu kamponya ka disubishilangana ka ku Sachsenhausen mu Allemagne.

Nsombelu mu Sachsenhausen

Pangakafika mu Sachsenhausen mu Kabalashipu 1941, mukavua Bantemu bu 150​—nangananga bena Allemagne. Bakaya netu tuetu bena buloko bapiabapia mu tshitupa tshia kamponya tshibikila ne: Diteka-pa-nkaya. Muine amu, bana betu bena nkristo bakatutabalela ne bakatulongolola bua bivua bituindile. Lumingu lumue panyima bakuabu Bantemu ba ku Pays-Bas bakafika, balue ku mazuwa. Kumpala bakatufundila bua kushala bimane kaba kamue batangile ku bizubuzubu kubangila pa dîba 7:00 mu dinda too ne pa dîba 6:00 ku dilolo. Imue misangu bena buloko bavua ne bua kuenza nanku dituku dionso munkatshi mua lumingu lumue anyi kupita apu.

Nansha muvuaku ngenzelu eu wa kanyawu, bana betu bakamona dikengela dia lukasa dia kushala badilongolole ne kupeta biakudia bia mu nyuma. Dituku dionso bavua balomba muntu umue bua kulongolola ngenyi pa mvese kampanda wa mu Bible. Pashishe, mu muaba wa disangila, Ntemu yonso uvua uya kudi muntu eu ne uteleja bivuaye mulongolole. Mu mushindu kampanda anyi kansanga, bavua babueja pa tshibidilu mikanda mu kamponya mu musokoko, ne bushuwa tuvua tudisangisha mu Dia lumingu dionso ne tulonga pamue mikanda eyi ivua yumvuija Bible.

Mu mushindu kauyi mumanyike, bakabueja mu musokoko mu Sachsenhausen kopi umue wa mukanda wa Children (Bana), uvuabu bapatule mu mpuilu wa ku St. Louis mu États-Unis mu été wa 1941. Bua kumona mua kukepesha njiwu ya disokolola ne diosha mukanda eu, tuakautulakaja, ne tuakendesha bitupa biawu munkatshi mua bana betu bua se: muntu yonso apete mushindu wa kuubala.

Panyima pa matuku, kasumbu ka balombodi ba kamponya kakamanya ne: tuvua tuenza bisangilu. Nenku bakatapulula Bantemu ne kubateka mu bizubuzubu bishilangane. Abi biakatupesha mpunga mulenga bua kuyisha bakuabu bena buloko, ne bu tshipeta, bena Pologne, bena Ukraine ne bakuabu ba bungi bakitaba bulelela.

Bena Nazi kabavua basokoka lungenyi luabu lua kutonkola anyi kushipa ba-Bibelforscher, muvuabu babikila Bantemu ba Yehowa. Nenku ditufimpakaja divua dia dîsu dikole. Bakatuambila ne: bavua mua kutulekela bu tuetu mua kutua biala pa mukanda uvua ne mêyi a dibenga nawu ditabuja dietu. Bamue bana betu bakatuadija kuela meji ne: “Buobu bandekele, ndi mua kuenza bivule mu mudimu wa Yehowa.” Nansha muakatua ndambu biala, bana betu bavule bakashala ne lulamatu nansha muvuabu batupangisha bituvua nabi bualu, batupuekesha milongo ne batukengesha. Bamue ba ku aba bakatua biala katuakumvua kabidi bualu buabu. Kadi, diakalenga, bakuabu bakapetulula makanda pashishe ne batshidi anu Bantemu bazanzamuke.

Pa tshibidilu bavua batuenzeja bua kubandila muvuabu bakengesha bena buloko ne tshikisu, bu mudi dibela nkodi 25. Dimue edi, tuvua ne bua kubandila muvuabu ne bua kushipa bantu banayi pa kubuowa. Malu au mamona adi ne buenzeji bukole kudi muntu. Muanetu umue wa balume uvua musombele mu tshizubuzubu tshimue nanyi, muntu mule ne mulengele mubidi, wakangambila ne: “Kumpala kua meme kulua muaba eu, tshivua mua kumona mashi tshiyi mufue tshipuka. Kadi mpindieu ndi mulue kukola muoyo.” Kadi, nansha mutuvua mua kuikala balue kukola muoyo, katuakalua bu bipatu nansha. Ndi ne bua kuamba ne: tshiakalamina batukengeshi abu bualu bubi anyi kubumvuila lukinu to.

Panyima pa ditumika mu kommando kampanda (kasumbu ka bena mudimu) bua tshikondo kansanga, bakambueja mu lupitadi bua mubidi kapia. Munga doktere muena bulenga wa bena Norvège ne muondapi muambuluishi wa bena Tchécoslovaquie bakangambuluisha, ne pamu’apa bulenga buabu ke buakampandisha muoyo.

Luendu lua lufu

Pabuipi ne Tshisanga 1945, biakamueneka patoke se: bavua benda batshimuna ditunga dia Allemagne. Makole madisange a ku Ouest avua enda asemena lukasa umbukila ku Ouest, ne a bena Union Soviétique, umbukila ku Est. Bena Nazi kabavua ne mushindu wa kushipa nkama ya binunu bia bantu bavua mu tumponya tua disubishilangana ne kujimija mibidi yabu mu matuku makese kabiyi bimanyika. Nenku bakapangadija bua kushipa bavua basama ne kuya ne bena buloko bavua bashala ku bitudilu bia mazuwa bia pabuipi apu. Kuine aku, bavua balongolole bua kubabueja mu mazuwa ne kuina mazuwa awu mu mbuu.

Luendu elu lua bena buloko batue ku 26 000 kumbukila ku Sachsenhausen luakatuadija butuku bua dia 20 Tshisanga. Kumpala kua tuetu kumbuka mu kamponya, bakapatula bana betu bavua basama bavua mu nzubu wa babedi. Bakapeta ditempu divuabu mua kubambuila. Bonso pamue, tuvua bantu 230 ba mu matunga asambombo mashilangane. Munkatshi mua bavua basama muvua Muanetu Arthur Winkler, uvua muambuluishe bikole mu didiunda dia mudimu mu Pays-Bas. Tuetu Bantemu tuvua mu milongo ya ndekelu mu luendu elu, ne tuvua anu tukankamijangana bua kutungunuka ne luendu.

Bua kutuadija, tuakenda munkatshi mua mêba 36 kakuyi diikisha. Pamvua munkatshi mua luendu, bushuwa tulu tuakankuata bua dikenga dipite ne dipungi. Kadi kakuvua mushindu wa kushala panyima anyi wa kuikisha, bualu kuvua njiwu ya kuashibua tshingoma kudi balami. Butuku tuvua tulala pambelu mu madimi anyi muitu. Biakudia bivua bikese anyi kabivuaku mene. Pakatamba kunsuma nzala, ngakalaka buanga bua menu buvua bena Nkuruse Mukunze wa bena Suède batupeshe.

Mu muaba kampanda, bualu balami bena Allemagne bavua belakana bua muaba uvua basalayi bena Russie ne bena États-Unis, tuakalala muitu matuku anayi. Ebi bivua bua diakalenga dietu bualu, bu tshipeta, katuakafika ku Diapa dia Lübeck kumpala kua dîba bua kubuela mu mazuwa avuabu balongolole bua kutufila mu lukita luetu lua mu mâyi. Ndekelu wa bionso, panyima pa matuku 12 ne luendu lua kilometre bu 200, tuakafika mu Ditu dia Crivitz. Katuvua mutantshi mule ne Schwerin, tshimenga tshivua mutantshi wa kilometre 50 ne Lübeck.

Bena Union Soviétique bavua ku dia balume dietu, ne bena Amerike ku dia bakaji dietu. Bua dikungula dia bingoma binene ne bua muadi wa bingoma bikese uvua kauyi ukoseka, tuakamanya se: tuvua pabuipi ne milongo ya kumpala ya bena mvita. Buôwa e kukuata balami bena Allemagne; bamue bakanyema, ne bakuabu bakashintulula nsukutu yabu ya busalayi ne kuangata bilamba bia bena buloko bivuabu bakopole bafue, bela meji ne: kabakubamanya. Mu nsombelu eu mukondakane, tuetu Bantemu tuakadisangisha bua kusambila bua tupete buludiki.

Bana betu bavua buomekela majitu bakapangadija ne: tuvua ne bua kumbuka patshiatshia dituku divua dilonda ne kuya ku luseke luvua basalayi bena Amerike. Bena buloko batue ku tshia bibidi tshia aba bakatuadija luendu elu lua lufu bakafua anyi bakabashipela mu njila, kadi Bantemu bonso bakapanduka.

Bakangambula kudi bamue bena mudimu wa busalayi bena Canada, kuyabu nanyi mu tshimenga tshia Nijmegen, muvua yayanyi mukuabu musombele. Kadi pangakafikamu, ngakasangana se: ukavua mumuangale. Nenku meme kudiata mu njila mutangile ku Rotterdam. Diakalenga, mashinyi a muntu kampanda akangambula mu njila e kumfikisha too ne kumvua nya.

Bulelela budi nsombelu wanyi

Dituku dine dingakafika ku Rotterdam, ngakalomba kabidi mudimu wa bumpanda-njila. Mbingu isatu pashishe mvua mu muaba wanyi wa mudimu mu tshimenga tshia Zutphen, mungakasadila tshidimu tshijima ne tshitupa tshiakalonda. Tshikondo atshi, meme kupetulula ndambu wa makanda anyi a mubidi. Pashishe bakanteka mutangidi wa tshijengu, mudibu babikila ba-ministre bena ngendu. Ngondo mikese panyima, bakambikila ku Tshilongelu tshia Bible tshia Watchtower tshia Gilada ku South Lansing, mu New York. Panyima pa dipeta dipolome mu kalasa ka 12 ka tshilongelu atshi mu Luishi 1949, bakantuma mu Belgique.

Ndi musadile mu bitupa kabukabu bia mudimu wetu mu Belgique, pa kukonga bidimu bitue ku muanda-mukulu ku biro bia filiale ne makumi a bidimu mu mudimu wa ngendu bu mutangidi wa tshijengu ne bu mutangidi wa distrike. Mu 1958, meme kusela Justine, eu wakalua muinanyi muena ngendu. Mpindieu, nansha munkadi mukulakaje, ntshidi anu ne disanka bua mundi mua kusadila mu mushindu mushadile bu mutangidi muena ngendu mupinganyi.

Pandi ntangila panyima ku mudimu wanyi, ndi mua kuamba bushuwa ne: “Kakuena tshintu tshilenga tshipite bulelela.” Bushuwa, kabivua misangu yonso bipepele. Ndi mujingulule dikengela dia kulongela ku mapanga ne bilema bianyi. Nenku pandi ngakula ne bansonga, ntu mbambila misangu mivule ne: “Nuenu penu nenuenze bilema ne pamu’apa kuenza mpekatu minene, kadi kanudingi mu bualu ebu. Nuyukile pa bualu ebu ne baledi benu anyi ne mukulu kampanda, ne pashishe nuenze makajilula adi akengedibua.”

Mu bidimu bianyi bitue ku 50 mu mudimu wa ku dîba ne ku dîba mu Belgique, ndi mupete diakalenga dia kumona bamue bamvua mumanye kale bu bana basadila bu bakulu ne batangidi ba bijengu. Ne ndi mumone bamanyishi ba Bukalenge 1 700 anyi kupita apu mu ditunga edi bavula bapita pa bantu 27 000.

Ndi nkonka ne: “Kudiku mua kuikala mushindu mukuabu mubenesha wa kuikala ne nsombelu mupite wa kusadila Yehowa anyi?” Kautu muanji kuikalaku, kawenaku mpindieu ne kawakuikalaku. Ndi nsambila bua Yehowa atungunuke ne kutulombola ne kutubenesha meme ne mukajanyi bua se: tutungunuke ne kumusadila bua kashidi.

[Tshimfuanyi mu dibeji 26]

Ne mukajanyi katupa kîpi panyima pa dibaka dietu mu 1958