Newimane luseke kayi kumpala kua nkuasa wa tshilumbuluidi?

“Palua Muan’a muntu mu butumbi buende, ne banjelo buonso nende, neasombe mu nkuasa wende wa bumfumu wa butumbi.”​—MATAYO 25:31, NW.

1-3. Nkabingila kayi katudi naku bua kuikala ne dieyemena mu dilumbuluisha diakane?

‘MUENA TSHIBAWU ANYI MUBINGE?’ Bavule batu bajula mpata padibu bateleja luapolo pa dikosa dia tshilumbu kampanda ku kabadi. Banzuji ne bena mu tshipangu tshia bena mutshipu badi mua kuteta bua kuleja bululame, kadi bulumbuluishi buakane butu misangu yonso bulondibua pa dikasa anyi? Katshia kuena muanji kumvuaku bua dipanga buakane ne kansungasunga mu dikosa nsambu anyi? Dipanga buakane dia mushindu’eu ki ndia lelu, bu mutudi mua kubimona mu mufuanu wa Yezu udi usanganyibua mu Luka 18:1-8.

² Nansha dimona malu diebe pa bidi bitangila dikosa nsambu dia muntu dikale munyi, bambisha nkomenu wa Yezu eu: ‘Nzambi mene kena usombuela bakasunguleye, batu badila kudiye butuku ne munya, . . . anyi? Ndi nnuambila ne, Neabasombuele lubilu. Kadi palua Muana wa muntu, neasangane ditabuja pa buloba, anyi?’

³ Eyowa, Yehowa neenze bua se: ndekelu wa bionso basadidi bende bapete disombuela. Yezu udi pende ne tshitupa tshia kukumbaja mu bualu ebu, nangananga mpindieu, bualu tudi mu “matuku a ku nshikidilu” a ndongoluelu eu mubi wa mpindieu. Mu katupa kîpi emu Yehowa neakuate mudimu ne Muanende muena bukole bua kumbusha bubi buonso nkong pa buloba. (2 Timote 3:1; 2 Tesalonike 1:7, 8; Buakabuluibua 19:11-16) Tudi mua kupeta bujinguludi pa bidi bitangila muaba udi nawu Yezu ku umue wa ku mifuanu ya ndekelu yakafilaye, udi ubikidibua misangu mivule ne: mufuanu wa mikoko ne bibujibuji.

4. Ntshinyi tshitukadi bajingulule pa tshikondo tshia dikumbana dia mufuanu wa mikoko ne bibujibuji, kadi bua tshinyi tudi ne bua kuteya ntema ku mufuanu eu mpindieu? (Nsumuinu 4:18)

⁴ Tukadi bamane kumvua se: mufuanu au uvua uleja disomba dia Yezu mu nkuasa bu Mukalenge mu 1914 ne [se:] kutuadija ku tshikondo atshi udi wenza malumbuluisha​—muoyo wa tshiendelele bua bantu badi bu mikoko, ne lufu lua kashidi bua bibujibuji. Kadi dikonkonona mufuanu eu tshiakabidi didi difikisha ku ngumvuilu muakajulula wa tshikondo tshia dikumbana diawu ne tshidiwu uleja. Diakajulula edi didi dishindika mushinga wa mudimu wetu wa buambi ne ngumvuilu wa ngandamuinu wa bantu. Bua kupeta tshishimikidi bua ngumvuilu eu muondoke wa mufuanu, tuanji kukonkonona tshidi Bible uleja pa bidi bitangila Yehowa ne Yezu, buonso buabu bu Bakalenge ne bu Balumbuluishi.

Yehowa bu Mulumbuluishi mutambe bunene

5, 6. Bua tshinyi mbikumbanyine bua kuangata Yehowa bu Mukalenge ne Mulumbuluishi?

⁵ Yehowa udi ukokesha bukua-mabulunge ne bukole pa mutu pa bionso. Bu mudiye kayi ne ntuadijilu anyi ndekelu, udi “Muk[a]lenge wa kashidi.” (1 Timote 1:17; Musambu wa 90:2, 4; Buakabuluibua 15:3) Udi ne bukokeshi bua kuela mêyi ne mikandu, anyi mikenji, ne kuenza bua bayitumikile. Kadi bukokeshi buende budi bukonga dikala Mulumbuluishi. Yeshaya 33:22 udi wamba ne: “Yehowa udi Mulumbuluishi wetu, Yehowa udi mutueledi wa mikenji, Yehowa udi Mukelenge wetu; yeye neatusungile.”

⁶ Biangatshile ku kale basadidi ba Nzambi mbanyishe Yehowa bu Mulumbuluishi wa nsombelu idi ilomba [dilumbuluisha] ne bipeta biayi. Tshilejilu, pakamana “Mulumbuluishi wa buloba buonso” kumona tshijadiki pa bidi bitangila bubi bua Sodome ne Gomore, wakakosa diakamue se: benamu bavua bakanyine kabutu ne kukumbajijaye dilumbuluisha adi diakane. (Genese 18:20-33; Yobo 34:10-12) Mmunyipu mudibi bitukolesha ku muoyo pa kumanya se: Yehowa udi Mulumbuluishi muakane udi misangu yonso mua kukumbaja malumbuluisha ende!

7. Mmunyi muakatumika Yehowa bu Mulumbuluishi mu malanda ende ne Izalele?

⁷ Mu Izalele wa kale, Yehowa uvua imue misangu ulumbuluisha buludiludi. Bu wewe mua kuikalapu tshikondo atshi, kuvuaku mua kukoleshibua ku muoyo pa kumanya se: Mulumbuluishi mupuangane uvua ukosa nsambu anyi? (Lewitiki 24:10-16; Nomba 15:32-36; 27:1-11) Nzambi wakapetesha kabidi “mapangadika a bunzuji” avua mu bujima buawu mimpe bu mêyi-makulu bua dilumbuluisha. (Lewitiki 25:18, 19, NW; Nehemiya 9:13; Musambu wa 19:9, 10; 119:7, 75, 164; 147:19, 20) Udi “Mulumbuluishi wa buloba bujima,” nunku bualu ebu mbututangile tuetu buonso.​—Ebelu 12:23.

8. Ntshikena-kumona kayi tshia mushinga tshiakapeta Danyele?

⁸ Tudi ne bujadiki bua “mumonyi” bufila pa muanda eu. Muprofete Danyele wakapeshibua tshikena-kumona kampanda tshia nyama ya luonji ivua ileja makalenge anyi ampire. (Danyele 7:1-8, 17) Wakasakidila ne: ‘Bakateka nkuasa ya bukalenge. Wa Kale wa Matuku a Bungi wakashikamapu. Bivualu biende bivua bitoke too bu neje.’ (Danyele 7:9) Bambisha se: Danyele wakamona nkuasa ya bukalenge [ne] ‘Wa Kale wa Matuku a Bungi [Yehowa] wakashikamapu.’ Udiebeje ne: ‘Danyele uvua muab’eu umanyisha didivuija dia Nzambi Mukalenge anyi?’

9. Nngumvuilu kayi umue udi nende ‘dishikama’ mu nkuasa wa bukalenge? Fila bilejilu.

⁹ Eyo, patudi tubala ne: muntu kampanda “wakashikama” mu nkuasa wa bukalenge, tudi mua kutuma meji ku divua diende bu mukalenge, bualu imue misangu Bible udi utumika ne ngakuilu wa mushindu’eu. Tshilejilu, “Pakapingana [Zimri] mu bukalenge, ne pakabangaye kushikama mu nkuasa wa bukalenge, yeye . . .” (1 Bakelenge 16:11; 2 Bakelenge 10:30; 15:12; Yelemiya 33:17) Mulayi kampanda udi utangila Masiya wakamba ne: ‘Yeye . . . neashikame mu nkuasa wende wa bukalenge, neakokeshemu.’ (Disendamija miaku ndietu.) Nunku’eu, ‘kushikama mu nkuasa wa bukalenge’ kudi mua kumvuija kuvua mukalenge. (Zekâya 6:12, 13) Yehowa mmulejibue bu Mukalenge udi musombe mu nkuasa wa bukalenge. (1 Bakelenge 22:19; Yeshaya 6:1; Buakabuluibua 4:1-3) Udi “Mukalenge wa tshiendelele.” Kadi, bu muakazangikaye mushindu mupiamupia wa bumfumu butambe bunene, tudi mua kumuamba ne: mmuvue Mukalenge, amu bu udi usomba tshiakabidi mu nkuasa wende wa bukalenge.​—1 Kulondolola 16:1, 31; Yeshaya 52:7; Buakabuluibua 11:15-17; 15:3, NW; 19:1, 2, 6.

10. Mmudimu kayi wa kumpala uvua nawu bakalenge bena Izalele? Umvuija.

¹⁰ Kadi muanda wa nshindamenu ng’udi ulonda eu: Mudimu wa kumpala wa bakalenge ba kale uvua wa diteleja bilumbu ne kubikosa. (Nsumuinu 20:8; 29:14) Vuluka dilumbuluisha dia meji dienza kudi Solomo pavua bakaji babidi bafuilakane muana wa katoto umue. (1 Bakelenge 3:16-28; 2 Kulondolola 9:8) Tshimue tshia ku bintu biibaka bia bukalenge tshivua “Lutanda lua nkuasa wa bumfumu muaba uvuaye ne bua kulumbuluishila,” luvua lubikidibua kabidi ne: “lutanda lua dilumbuluisha.” (1 Bakelenge 7:7, NW) Yeruzaleme uvua ulejibua bu muaba uvuabu ‘bajadike nkuasa ya bukalenge bua kukoselaku bilumbu.’ (Musambu wa 122:5) Mbimueneke patoke se: ‘kushikama mu nkuasa wa bukalenge’ kudi kabidi mua kumvuija kutumika ne bukokeshi bua dilumbuluisha.​—Ekesode 18:13; Nsumuinu 20:8.

11, 12. (a) Nngumvuilu kayi udi mukumbanyine dishikama dia Yehowa, didi ditela mu Danyele nshapita wa 7? (b) Mmushindu kayi udi mifundu mikuabu ishindika se: Yehowa udi ushikama bua kulumbuluisha?

¹¹ Mpindieu tuanjayi kupingana ku bualu bubandila muvua Danyele mumone ‘Wa Kale wa Matuku a Bungi mushikame.’ Danyele 7:10 udi usakidila ne: “Bena tshilumbuluidi bakashikama bua kukosa bilumbu, bakabulula mikanda.” Eyowa, Wa Kale wa Matuku a Bungi uvua mushikame bua kukosa bilumbu pa bidi bitangila bukokeshi bua buloba bujima ne bua kuanyisha Muan’a muntu bu mukumbanyine bua kukokesha. (Danyele 7:13, 14) Pashishe tudi tubala ne: “Wa Kale wa Matuku a Bungi [wakalua]. Mu tshilumbuluidi yeye wakabingisha bansanto,” aba bakanyishibua bu bakanyine bua kukokesha pamue ne Muan’a muntu. (Danyele 7:22; Disendamija miaku ndietu) Ndekelu wa bionso “Bena mu tshilumbuluidi nkayabu bakatuadija kusomba” bua kukosa tshilumbu tshidi tshipiisha bukokeshi bua ndekelu bua pa buloba.​—Danyele 7:26, NW.a

¹² Bua bualu ebu, dimona dia Danyele dia Nzambi ‘mushikame mu nkuasa wa bukalenge’ divua diumvuija dilua Diende bua kulumbuluisha. Davidi ukavua muimbe kumpala ne: ‘[Wewe Yehowa] wakujadika buakane buanyi mu tshilumbu; wakushikama mu nkuasa wa bukalenge ulumbuluisha ne kulumbuluisha kuakane.’ (Musambu wa 9:4, 7) Ne Yoele wakafunda ne: “Ba mu bisamba bia bantu babike, balue mu tshibanda tshia Yehoshafata; bua mu muaba au nenshikame [meme Yehowa] bua kulumbuluisha bisamba bionso bia bantu.” (Yoele 3:12; fuanyikija ne Yeshaya 16:5.) Yezu ne Paulo bakafika buonso mu nsombelu ya dilumbuluisha muvua muntu kampanda musombe bua kuteleja tshilumbu ne kutshikosa.b​—Yone 19:12-16; Bienzedi 23:3; 25:6.

Muaba wa Yezu

13, 14. (a) Ndishindika kayi divua nadi tshisamba tshia Nzambi se: Yezu uvua ne bua kuvua Mukalenge? (b) Ndîba kayi diakasomba Yezu mu nkuasa wende wa bumfumu, ne mmu ngumvuilu kayi muakakokeshaye kutuadija mu 33 B.B.?

¹³ Yehowa udi Mukalenge ne kabidi Mulumbuluishi. Kadi Yezu? Muanjelu mumanyishi wa diledibua diende wakamba ne: “Yehowa Nzambi neamupeshe nkuasa wa bumfumu wa tatuende, Davidi, . . . ne bukalenge buende kabuakuikala ne ndekelu.” (Luka 1:32, 33, NW) Yezu uvua ne bua kuikala mupianyi wa kashidi wa bumfumu bua Davidi. (2 Samuele 7:12-16) Uvua ne bua kukokesha biangatshile mu diulu, bualu Davidi wakamba ne: ‘Yehowa udi wambila mukalenge wanyi [Yezu] ne, Ushikame biebe ku tshianza tshianyi tshia balume too ne pangavuija badi nebe lukuna ditanda dia muinshi mua makasa ebe. Yehowa neolole bukokeshi buebe bu dikombo kule bubangile mu Siona. Ukokeshe biebe munkatshi mua badi nebe lukuna.’​—Musambu wa 110:1-4.

¹⁴ Bivua ne bua kuenzeka tshikondo kayi? Yezu kakakokesha bu Mukalenge patshivuaye muntu pa buloba. (Yone 18:33-37) Mu 33 B.B., wakafua, kubiishibuaye ku lufu, ne kubandaye mu diulu. Ebelu 10:12 (NW) udi wamba ne: “Yeye wakalambula mulambu umu’epele bua kashidi bua mpekatu ne wakasomba ku dia balume dia Nzambi.” Mbukokeshi kayi buvua nabu Yezu? ‘[Nzambi] pakamushikikeye ku tshianza tshiende tshia bukole mu miaba ya mu diulu, kule ku mutu kua bumfumu buonso ne bukokeshi buonso ne bukole buonso ne bukelenge buonso . . . [ne] wakamupa bua kuikaleye mutu wa malu onso a [tshisumbu, NW].’ (Efeso 1:20-22) Bu muvua Yezu tshikondo atshi ne bukokeshi bua bukalenge pa bena nkristo, Paulo wakafunda ne: Yehowa ‘wakatupandisha ku bukokeshi bua mîdima, wakatubueja mu bukalenge bua Muana wa dinanga diende.’​—Kolosai 1:13; 3:1.

15, 16. (a) Bua tshinyi tudi tuamba ne: Yezu kakavua Mukalenge wa Bukalenge bua Nzambi mu 33 B.B.? (b) Ndîba kayi diakatuadija Yezu kukokesha mu Bukalenge bua Nzambi?

¹⁵ Kadi, tshikondo atshi, Yezu kakatumika bu Mukalenge ne Mulumbuluishi ku mutu kua matunga. Wakashikikibua pabuipi ne Nzambi, bua kuindila tshikondo tshia kutumika bu Mukalenge wa Bukalenge bua Nzambi. Paulo wakafunda buende ne: ‘Ne kudi mukuabo kai wa banjelo bende wakuambeye munga musangu ne, Shikama biebe ku tshianza tshianyi tshia bukole, too ne pangavuija bena lukuna bebe bu ditanda dia munshi mua makasa ebe?’​—Ebelu 1:13.

¹⁶ Bantemu ba Yehowa mbamanyishe bikole tshijadiki tshia se: lupolo lua tshikondo lua dindila dia Yezu luakajika mu 1914, pakaluaye mukokeshi wa Bukalenge bua Nzambi mu diulu didi kadiyi dimueneka. Buakabuluibua 11:15, 18 (NW) udi wamba ne: “Bukalenge bua pa buloba buaalu bukalenge bua Mukalenge wetu ne bua Kristo wende, ne neakokeshe kashidi ne kashidi.” “Kadi, matunga akafika munda, ne tshiji tshiebe tshiakalua.” Eyowa, matunga akalejangana tshiji tshikole munkatshi mua Mvita ya Kumpala ya buloba bujima. (Luka 21:24) Mvita, bikumina, bipupu bia masama, biyole bia nzala, ne bikuabu bia muomumue, bitudi bamone kubangila mu 1914 bidi bijadika se: Yezu udi mpindieu ukokesha mu Bukalenge bua Nzambi, ne nshikidilu wa ndekelu wa mulongolodi ebu ukadi pabuipi.​—Matayo 24:3-14.

17. Mmalu kayi manene atukadi bamane kushindika?

¹⁷ Diambulula dikepesha didi nunku: tudi mua kuamba bua Nzambi ne: mmusombe mu nkuasa wa bumfumu bu Mukalenge, kadi mu ngumvuilu mukuabu udi mua kusomba mu nkuasa wende wa bumfumu bua kulumbuluisha. Mu tshidimu tshia 33 B.B., Yezu wakasomba ku tshianza tshia balume tshia Nzambi, ne udi mpindieu Mukalenge wa Bukalenge. Kadi Yezu, ukadi mpindieu ukokesha bu Mukalenge, udi usadila kabidi bu Mulumbuluishi anyi? Ne bua tshinyi bualu ebu mbututangile petu, nangananga mu tshikondo etshi?

18. Ntshijadiki kayi tshidiku se: Yezu udi kabidi ne bua kuikala Mulumbuluishi?

¹⁸ Yehowa, eu udi ne bukenji bua kuteka balumbuluishi, wakasungula Yezu bu Mulumbuluishi udi ukumbaja mêyi-makulu Ende. Yezu wakaleja bualu ebu pa kuakula pa bidi bitangila bantu badi balua ne muoyo mu nyuma ne: “Tatu kena ulumbuluisha muntu, kadi yeye waku[p]a Muana bulumbuluishi buonso.” (Yone 5:22) Kadi, mudimu wa Yezu wa dilumbuluisha mmupite ne kule mushindu eu wa bulumbuluishi, bualu udi mulumbuluishi wa badi ne muoyo ne wa bafue. (Bienzedi 10:42; 2 Timote 4:1) Paulo wakamba umue musangu ne: “[Nzambi] mmufunde dituku dia kulumbuluisha bena panu ne buakane, kudi muntu [Yezu] udiye musungule. Ke tshidiye mujadikile bonso pa kumubisha ku bafue.”​—Malu Menza 17:31, MMM; Musambu wa 72:2-7.

19. Bua tshinyi mbikumbanyine bua kuakula bua Yezu bu udi musombe bu Mulumbuluishi?

¹⁹ Nunku, tudi mua kubinga pa kukoma ne: Yezu mmusombe mu nkuasa wa bumfumu wa butumbi pa muaba musunguluke wa Mulumbuluishi anyi? Eyowa. Yezu wakambila bapostolo ne: “Dîba dia difukulula, pasomba Muan’a muntu mu nkuasa wende wa bumfumu wa butumbi, nuenu bavua bandonde, nenuikale penu basombe mu nkuasa ya bumfumu dikumi ne ibidi, nulumbuluisha bisa dikumi ne bibidi bia Izalele.” (Matayo 19:28, NW) Nansha mukadi Yezu mpindieu Mukalenge wa Bukalenge, mudimu wakuataye pashishe udi mufunda mu Matayo 19:28 neukonge disomba mu nkuasa wa bumfumu bua kulumbuluisha munkatshi mua Bidimu Tshinunu. Tshikondo atshi nealumbuluishe bantu buonso, bakane ne bakena bakane. (Bienzedi 24:15) Bidi ne diambuluisha bua kulama bualu ebu mu lungenyi patudi tutangija ntema yetu ku umue wa ku mifuanu ya Yezu udi utangila tshikondo tshietu etshi ne nsombelu yetu.

Mufuanu udi wamba tshinyi?

20, 21. Ntshinyi tshiakebeja bapostolo ba Yezu tshivua tshitangila tshikondo tshietu etshi, ne bidi bifikisha ku lukonko kayi?

²⁰ Katupa kîpi kumpala kua Yezu kufuaye, bapostolo bende bakamuebeja ne: “Ndîba kayi dienzeka malu aa, ne ntshinyi tshikala tshimanyinu tshia dikalaku diebe ne tshia nkomenu wa ndongoluelu eu wa malu?” (Matayo 24:3, NW) Yezu wakadianjila kumanyisha malu manene [avua ne bua kuenzeka] pa buloba kumpala ‘kua nshikidilu kuluaye.’ Katupa kîpi kumpala kua nshikidilu au, bisamba “nebimone Muan’a muntu ulua pa matutu a mu diulu ne bukole ne butumbi bunene.”​—Matayo 24:14, 29, 30, NW.

²¹ Kadi, mmunyi muikala nsombelu wa bantu ba mu matunga au padi Muan’a muntu ufika mu butumbi buende? Tuanji kukonkonona mufuanu wa mikoko ne bibujibuji, udi utuadija ne miaku eyi: “Palua Muan’a muntu mu butumbi buende, ne banjelu buonso nende, neasombe mu nkuasa wende wa bumfumu wa butumbi. Matunga wonso neasangishibue kumpala kuende.”​—Matayo 25:31, 32, NW.

22, 23. Mmalu kayi adi aleja ne: mufuanu wa mikoko ne bibujibuji kawakatuadija dikumbana diawu mu 1914?

²² Mufuanu eu udi utangila tshikondo tshiakasomba Yezu mu bukokeshi bua bukalenge mu 1914, bu mutu ngumvuilu katshia kuonso aku anyi? Eyo, Matayo 25:34 udi wakula buende bu Mukalenge, nunku mufuanu eu udi mu mushindu mukumbanyine utangila tshikondo tshibala kumbukila mu 1914 pakalua Yezu Mukalenge. Kadi ndilumbuluisha kayi diakenzaye katupa kakese pashishe? Kadivua dilumbuluisha dia “matunga wonso” nansha. Bishilangane, wakatuma ntema yende kudi aba bavua badiamba muvuabu benze ‘nzubu wa Nzambi.’ (1 Petelo 4:17) Mu diumvuangana ne Malaki 3:1-3, Yezu, bu mutumibue wa Yehowa, wakakontolola bu mulumbuluishi bena nkristo bela manyi batshivua pa buloba. Bivua kabidi tshikondo tshia dilumbuluisha Bukua-buena-nkristo, buvua ne dishima dionso budiamba mudibu ‘nzubu wa Nzambi.’c (Buakabuluibua 17:1, 2; 18:4-8) Pabi kakuena tshintu tshidi tshileja ne: tshikondo atshi, anyi kutuadija apu, Yezu wakasomba bua kulumbuluisha bantu ba matunga wonso bua kubasunguluja ndekelu wa bionso bu mikoko anyi bibujibuji.

²³ Bituakonkonona mudimu wa Yezu mu mufuanu eu, tudi tumumona ulumbuluisha bua kashidi matunga wonso. Mufuanu eu kawena uleja ne: dilumbuluisha dia nunku divua mua kutungunuka mu lupolo lule lua bidimu bia bungi, bienze bu se: muntu yonso udi mufue munkatshi mua makumi a bidimu bishale ebi mmulumbuluishibue muakanyine lufu lua tshiendelele anyi muoyo wa tshiendelele. Mbimueneke se: bavule ba ku aba badi bafue mu makumi a bidimu bishale ebi mbaye mu lukita lua bantu buonso. (Buakabuluibua 6:8; 20:13) Nunku, mufuanu eu udi uleja tshikondo tshialumbuluisha Yezu bantu ba “matunga wonso” bikala ne muoyo tshikondo atshi ne bapetangana ne dikumbajibua dia dilumbuluisha diende.

24. Ntshikondo kayi tshiakumbana mufuanu wa mikoko ne bibujibuji?

²⁴ Mu mêyi makuabu, mufuanu eu udi ufunkuna matuku atshilualua palua Muan’a muntu mu butumbi buende. Neasombe bua kulumbuluisha bantu bikala tshikondo atshi ne muoyo. Dilumbuluisha diende nedishindamene pa didisokolola dia tshikalabo. Tshikondo atshi “dishilangana pankatshi pa muntu muakane ne muntu mubi” nedikale dijadikibue patoke. (Malaki 3:18, NW) Dikosa dilelela [dia nsambu] ne dikumbajibua dia dilumbuluisha nebienjibue mu tshikondo tshijadika. Yezu neamanyishe mapangadika makane mashila pa tshikala muntu ne muntu mudisokolole.​—Tangila kabidi 2 Kolinto 5:10.

25. Ntshinyi tshidi Matayo 25:31 uleja pa kuakula bua Muan’a muntu udi musombe mu nkuasa wa bumfumu wa butumbi?

²⁵ Nunku, ebi bidi biumvuija ne: ‘disomba dia Yezu mu nkuasa wende wa bumfumu wa butumbi’ bua dilumbuluisha, didi difunda mu Matayo 25:31, ndia matuku atshilualua palua Mukalenge wa bukole kusomba bua kukosa [nsambu] ne kukumbaja dilumbuluisha pa matunga. Eyowa, tshimuenekelu tshia dilumbuluisha tshidi tshitangila Yezu mu Matayo 25:31-33, 46 ntshifuanangane ne etshi tshia mu Danyele nshapita wa 7, muvua Mukalenge udi ukokesha, Wa Kale wa Matuku a Bungi, musombe bua kukumbaja mudimu wende bu Mulumbuluishi.

26. Ndiumvuija kayi dipiadipia dia mufuanu didi dilue kusokolodibua?

²⁶ Dijingulula mufuanu wa mikoko ne bibujibuji mu mushindu eu didi dileja se: dikosa tshilumbu tshia mikoko ne bibujibuji ndia matuku atshilualua. Nedienzeke kunyima kua “dikenga” didi ditela mu Matayo 24:29, 30 dimana kubudika ne Muan’a muntu mumane ‘kufika mu butumbi buende.’ (Fuanyikija ne Mâko 13:24-26.) Pashishe, patua ndongoluelu eu mujima mubi ku ndekelu wende, Yezu neakungije bena mu tshilumbuluidi bua kukosa nsambu ne kukumbaja dilumbuluisha.​—Yone 5:30; 2 Tesalonike 1:7-10.

27. Ntshinyi tshitudi ne bua kutabalela bua kumanya pa bidi bitangila mufuanu wa ndekelu wa Yezu?

²⁷ Ebi bidi bitokesha ngumvuilu wetu wa tshikondo tshia dikumbana dia mufuanu wa Yezu, udi uleja dîba dialumbuluishabu mikoko ne bibujibuji. Kadi mmunyi mudibi ne buenzeji kutudi tuetu badi bamanyisha ne mitalu lumu luimpe lua Bukalenge? (Matayo 24:14) Bidi bikepesha mushinga wa mudimu wetu, peshi bidi bitutuadila majitu a mudimu mapite kunema bujitu? Tukonkononayi mu tshiena-bualu tshidi tshilonda mushindu udibi ne buenzeji kutudi.

[Mêyi adi kuinshi]

Udi muvuluke anyi?

◻ Mmunyi mudi Yehowa ukuata mudimu bu Mukalenge ne Mulumbuluishi?

◻ Nngumvuilu kayi ibidi idi mua kuikalaku bua ‘dishikama mu nkuasa wa bukalenge’?

◻ Ntshinyi tshituvua tuamba kumpala pa bidi bitangila tshikondo tshia dikumbana dia Matayo 25:31, kadi tshishimikidi kayi tshidiku bua ngumvuilu muakajulula?

◻ Ndîba kayi didi Muan’a muntu usomba mu nkuasa wende wa bumfumu, bu mudibi bileja mu Matayo 25:31?

Ntshinyi tshienzekela mikoko ne bibujibuji mu matuku atshilualua?

“Yeye neatapulule bantu, bamue ku bakuabo, anu bu mudi mulami utapulula mikoko ku bibujibuji.”​—MATAYO 25:32, NW.

1, 2. Bua tshinyi mufuanu wa mikoko ne bibujibuji udi ne bua kukoka ntema yetu?

YEZU KRISTO uvua bushuwa Mulongeshi mutambe bunene wa katshia ne katshia pa buloba. (Yone 7:46) Umue wa ku ndongeshilu yende uvua ditumika ne mifuanu, anyi bimfuanyi. (Matayo 13:34, 35) Bionso ebi bivua bipepele kadi bikale ne bukole bua kumvuija bimpe malelela muondoke a mu nyuma ne a bu-profete.

² Mu mufuanu wa mikoko ne bibujibuji, Yezu wakafunkuna tshikondo kampanda tshivuaye ne bua kuenza mudimu kansanga wa pa buawu: ‘Palua Muana wa muntu mu butumbi buende, ne . . .’ (Matayo 25:31) Ebi bidi ne bua kukoka ntema yetu bualu eu ke mufuanu udi Yezu ukomesha nau diandamuna diende ku lukonko lua ne: “Ntshinyi tshikala tshimanyinu tshia dikalaku diebe ne tshia nkomenu wa ndongoluelu eu wa malu?” (Matayo 24:3, NW) Kadi ebi bidi biumvuija tshinyi buetu?

3. Ku ntuadijilu wa muyuki wende, ntshinyi tshiakamba Yezu tshivua ne bua kuenzeka diakamue kunyima kua dikenga dinene dimane kutuadija?

³ Yezu wakadianjila kumanyisha malu manene avua ne bua kulua “diakamue kunyima” kua dibudika dia dikenga dinene, malu atutshidi bindile. Wakamba ne: pashishe “tshimanyinu tshia Muana wa muntu” netshimueneke. Ebi nebikale ne buenzeji bunene pa ‘bisamba bionso bia pa buloba’ bikala ne bua ‘kumona Muana wa muntu ulua pa matutu a mu diulu ne bukole buende ne butumbi buende bunene.’ Muana wa muntu nealue pamue ne ‘banjelu bende.’ (Matayo 24:21, 29-31)a Netuambe tshinyi bua mufuanu wa mikoko ne bibujibuji? Bible ya buena lelu mmiwuteke mu nshapita wa 25, kadi udi tshitupa tshia diandamuna dia Yezu, tshidi tshifila mumvuija a pa mutu pa bidi bitangila dilua diende mu butumbi ne tshishindamena pa dilumbuluisha diende dia “bisamba bionso.”​—Matayo 25:32.

Badi bazangikibue mu mufuanu

4. Ndîna kayi didi ditedibue ku ntuadijilu wa mufuanu wa mikoko ne bibujibuji pa bidi bitangila Yezu, ne mbanganyi bakuabu badi batedibue pashishe?

⁴ Yezu udi utuadija mufuanu pa kuamba ne: ‘Palua Muana wa muntu.’ Udi mua kuikala mumanye eu udi “Muana wa muntu.” Bafundi ba Evanjeliyo bavua misangu mivule batumika ne tshiambilu atshi bua Yezu. Nansha Yezu yeye muine wakenza nunku kabidi, pa kuikala kabiyi mpata ne tshikena-kumona tshia Danyele mu tshieledi tshiende tshia lungenyi, etshi tshia “mukuabo mufuane muana wa muntu” wakafika kudi Wa Kale wa Matuku a Bungi bua kupeta “bukokeshi, butumbi ne buk[a]lenge.” (Danyele 7:13, 14; Matayo 26:63, 64; Mâko 14:61, 62) Nansha mudi Yezu muzangikibue mu mufuanu eu, kêna nkayende to. Kumpalampala mu muyuki wende, anu bu mudiwu mufunda mu Matayo 24:30, 31, wakamba ne: padi Muana wa muntu ‘ulua ne bukole ne butumbi bunene,’ banjelu bende nebakuate mudimu wa mushinga mukole. Bia muomumue, mufuanu wa mikoko ne bibujibuji udi uleja banjelu bikale pamue ne Yezu tshikondo tshidiye ‘usomba mu nkuasa wende wa butumbi’ bua kulumbuluisha. (Fuanyikija ne Matayo 16:27.) Kadi Mulumbuluishi ne banjelu bende badi mu diulu, nunku mbakule bua bantu mu mufuanu eu anyi?

5. Mmunyi mutudi mua kusunguluja “bana babu” ne Yezu?

⁵ Ditapa dîsu ku mufuanu didi disokolola tusumbu tusatu tutudi ne bua kusunguluja. Pa kumbusha mikoko ne bibujibuji, Muan’a muntu udi usakidila kasumbu kisatu kadi dimanyibua diaku dikale ne mushinga bua kusunguluja mikoko ne bibujibuji. Yezu udi ubikila kasumbu kisatu aka ne: bana babu ba mu nyuma. (Matayo 25:40, 45) Badi ne bua kuikala batendeledi balelela, bualu Yezu wakamba ne: “Muntu udi wenza mudi Tatuanyi . . . musue, ke muanetu wa balume nansha wa bakaji, kabidi ke wanyi mamu.” (Matewuse 12:50, MMM; Yone 20:17) Tshidi tshitambe mushinga, Paulo wakafunda pa bidi bitangila bena nkristo badi benza tshitupa tshia “dimiinu dia Abrahama” ne badi bikale bana ba Nzambi. Wakababikila ne: “bana babo” ne Yezu ne “babanyanganyi [nende, NW] ba dibikila dia mu diulu.”​—Ebelu 2:9–3:1; Galatia 3:26, 29, NW.

6. Bana babu ne Yezu ‘badi batambe kupuekela’ mbanganyi?

⁶ Bua tshinyi Yezu wakatela bana babu ‘badi batambe kupuekela?’ Mêyi au akambulula tshikavua bapostolo bamumvue wamba kumpala. Pa kufuanyikija Yone Mubatiji, eu wakafua kumpala kua Yezu ne uvua pa nanku ne ditekemena dia pa buloba, ne aba bavua batekemena muoyo wa mu diulu, Yezu wakamba ne: “Kakutu kuanji kupatuka udi mutambe Yone Mubatiji nansha; kadi eu udi mutambe bukese mu bukalenge bua mu diulu mmumutambe yeye.” (Matayo 11:11, NW) Bamue ba ku bavua ne bua kuya mu diulu bavua pamu’apa bantu batumbe mu tshisumbu, bu mudi bapostolo, ne bakuabu bapuekele, kadi buonso badi bana babu ne Yezu ba mu nyuma. (Luka 16:10; 1 Kolinto 15:9; Efeso 3:8; Ebelu 8:11) Nunku, nansha muvua bamue bamueneka pa buloba bu bantu ba patupu, bavua bana babu ne bavua ne bua kuangatshibua bilondeshile malanda aa.

Mikoko ne bibujibuji mbanganyi?

7, 8. Ntshinyi tshiakamba Yezu pa bidi bitangila mikoko, nunku tudi mua kukoma munyi pa bidi biyitangila?

⁷ Tudi tubala pa bidi bitangila dilumbuluisha dia mikoko ne: “[Yezu] neambile badi ku diende dia balume ne: ‘Nuenu badi Tatu wanyi munange, luayi, nuangate bumpianyi bua Bukalenge buvuabo banulongoluele [katshia ku ntuadijilu wa bukua-bantu, NW]. Bualu mvua ne nzala, nuenu kumpa tshiakudia, mvua ne nyota, nuenu kumpa tshiakunua, mvua muenyi, nuenu kumbueja mu nzubu muenu; mvua butaka, nuenu kumvuadika, mvua nsama, nuenu kunkumbula, mvua mu lukanu, nuenu kuvua kummona.’ Bakane pabo nebamuandamune ne: ‘Mukalenge, ndiba kayi dituvua bakumone wewe ne nzala, tuetu kukupesha tshiakudia? Wewe ne nyota, tuetu kukupesha tshiakunua? Wewe muenyi, tuetu kukubueja mu nzubu? Wewe butaka, tuetu kukuvuadika? Wewe usama, nansha muikale mu nzubu wa lukanu, tuetu kuvua kukukumbula?’ Mukalenge neabandamune ne: ‘Bulelela ndi nnuambila ne: misangu yonso inuvua benzele umue wa ku bana betu bakese aba, nuvua bangenzele meme.’” (Disendamija miaku ndietu.)​—Matewuse 25:34-40, MMM.

⁸ Mbimueneke patoke se: mikoko idi milumbuluishibue bu miakanyine bua kuikala ku dia balume dia Yezu dia bunême ne dia dianyishibua idi ileja kasumbu kampanda ka bantu. (Efeso 1:20; Ebelu 1:3) Ntshinyi tshiakenzabu ne mmu tshikondo kayi? Yezu udi wamba ne: bavua ne bulenga buonso, ne kanemu kuonso, ne kalolo kuonso bamupesha biakudia, biakunua, ne bivualu, bamuambuluisha pavuaye usama anyi mu buloko. Padi mikoko yamba ne: kayivua mienzele Yezu bine ebi, udi wamba ne: bavua bambuluishe bana babu ba mu nyuma, bashadile ba ku bena nkristo bela manyi, nunku mu ngumvuilu eu bavua bamuenzele yeye.

9. Bua tshinyi mufuanu eu kawena ukumbana mu bule bua Bidimu Tshinunu?

⁹ Mufuanu kawena ukumbana munkatshi mua Bidimu Tshinunu, bualu bela manyi kabakuikala tshikondo atshi bantu badi bakenga bua nzala, nyota, masama, anyi diedibua mu buloko. Kadi, bavule ba kudibu mbamone malu a mushindu’eu munkatshi mua nkomenu wa ndongoluelu eu wa malu. Katshia Satana wimanshibua pa buloba, mmuvuije bashadile tshintu tshia pa buatshi tshia kujikijila tshiji tshiende, pa kubakebela disekibua, kanyawu, ne lufu.​—Buakabuluibua 12:17.

10, 11. (a) Bua tshinyi ki mbikumbanyine bua kuela meji ne: mikoko idi ikonga muntu yonso udi wenzela bana babu ne Yezu bualu kampanda buimpe? (b) Mikoko idi ileja nganyi mu mushindu muakanyine?

¹⁰ Yezu udi wamba ne: yonso udi uleja umue wa ku bana babu bulenga kampanda bukese, bu mudi dibapesha tshitupa tshia diampa anyi dikopo dia mâyi, mmukumbane bua kuikala umue wa ku mikoko eyi anyi? Bidi mua kuikala se: dienza malu mimpe a mushindu’eu pamu’apa ntshimanyinu tshia bulenga bua muntu, kadi bulelela, mbimueneke se: malu mapitshidile mmalombibue bua mikoko ya mu mufuanu eu. Yezu kavua bushuwa utela, tshilejilu, bavidi ba dikalaku dia Nzambi anyi bamfumu ba bitendelelu badi mua kuenzela bana babu tshienzedi kampanda tshia bulenga. Bishilangane, Yezu wakabikila misangu ibidi mikoko ne: “bantu bakane.” (Matayo 25:37, 46) Nunku mikoko idi ne bua kuikala aba badi mu kupita kua tshikondo kampanda bambuluishe​—bakuatshishe mu mushindu mulelela—​bana babu ne Kristo ne benze midimu ya ditabuja mu mushindu udibu bangatshibue bu bakane kumpala kua Nzambi.

¹¹ Mu kupita kua siekele, bantu ba bungi bu mudi Abrahama, bakangatshibua bu bakane. (Yakobo 2:21-23) Nowa, Abrahama, ne bakuabu bena lulamatu mbakongibue munkatshi mua “mikoko mikuabo” yapiana muoyo mu Mparadizu muinshi mua Bukalenge bua Nzambi. Mu bikondo bishale ebi miliyo mikuabu ya bantu mbavue kukumbaja ntendelelu mulelela bu mikoko mikuabo ne mbalue “tshisumbu tshimue” pamue ne bela manyi. (Yone 10:16; Buakabuluibua 7:9) Aba badi ne ditekemena dia pa buloba badi banyisha bana babu ne Yezu bu bena-mpala ba Bukalenge ne bua kabingila aka mbabambuluishe​—ku mubidi ne mu nyuma. Yezu udi wangata bu bimuenzela yeye muine ebi bidi mikoko mikuabo yenzela bana babu batshidi pa buloba. Bantu ba mushindu’eu bikala ne muoyo tshikondo tshidiye ulua bua kulumbuluisha bisamba nebangatshibue bu mikoko.

12. Bua tshinyi mikoko neyebeje mushindu uvuayi mileje Yezu bulenga?

¹² Bikala mpindieu mikoko mikuabo imanyisha lumu luimpe pamue ne bela manyi ne babambuluisha, bua tshinyi nebamuebeje ne: “Mukalenge, ndiba kayi dituvua bakumone wewe ne nzala, tuetu kukupesha tshiakudia? Wewe ne nyota, tuetu kukupesha tshiakunua?” (Matewuse 25:37, MMM) Kudi mua kuikala tubingila kabukabu. Eu mmufuanu. Ku diambuluisha diawu, Yezu udi uleja diditatshisha diende diondoke bua bana babu ba mu nyuma; udi umvua nyanji ya muomumue nabu, ukenga nabu. Yezu wakadianjila kuamba kumpala ne: “Muntu udi unuakidila, udi ungakidila meme; kabidi udi ungakidila, udi wakidila Udi muntume.” (Matewuse 10:40, MMM) Mu mufuanu eu, Yezu udi walabaja dîyi-diludiki edi, pa kuleja se: tshionso tshidibu benzela bana babu (tshimpe anyi tshibi) tshidi tshifika too ne mu diulu; tshidi amu bu tshimuenzela yeye udi mu diulu. Kabidi, apa Yezu udi uzangika dîyi-dikulu dia Yehowa bua dilumbuluisha, pa kutokesha ne: dilumbuluisha dia Nzambi, dia dibingisha anyi dia dipiisha, ndikumbanyine ne ndiakane. Bibujibuji kabiena ne pa kudibingisha ne: ‘Ee, bu tuetu bakumone wewe muine buludiludi.’

13. Bua tshinyi bantu badi bu bibujibuji nebabikile Yezu bu “Muk[a]lenge”?

¹³ Bamana kujingulula tshikondo tshikala dilumbuluisha didi dileja mu mufuanu eu ne bua kuenjibua, tudi tupeta mmuenenu mutambe kutoka wa tshidi bibujibuji. Dikumbana nedikala palua ‘tshimanyinu tshia Muana wa muntu [kumueneka] mu diulu; bisamba bionso bia pa buloba nebidile, nebimone Muana wa muntu ulua . . . ne bukole buende ne butumbi buende bunene.’ (Matayo 24:29, 30) Bapanduki ba ku dikenga dialua pa Babilone Munene bavua bangata ne kadiwu kuonso bana babu ne Mukalenge nebabikile pamu’apa Mulumbuluishi kabayi ne ditekemena bu “Muk[a]lenge,” pa kutekemena dipandisha mioyo yabu.​—Matayo 7:22, 23; fuanyikija ne Buakabuluibua 6:15-17.

14. Mpa tshishimikidi kayi palua Yezu kulumbuluisha mikoko ne bibujibuji?

¹⁴ Kadi, dilumbuluisha dia Yezu kadiakuikala diashila pa midiabakenu ikena ditekemena ya batantshidi ba kale ba nzubu ya Nzambi, bavidi ba dikalaku dia Nzambi, anyi bakuabu. (2 Tesalonike 1:8) Pamutu pa nanku, mulumbuluishi eu neakonkonone nsombelu wa mutshima ne bienzedi bia kale bia bantu bienzela nansha ‘umue wa mu bana [babu] batambe kupuekela.’ Tudi mua kuamba ne: bungi bua bena nkristo bela manyi batshidi pa buloba budi buenda bukepela. Kadi, bu mutshidi bela manyi, badi benza “mupika wa lulamatu ne wa budimu,” batungunuka ne kupetesha biakudia bia mu nyuma ne buludiki, aba badi bu mikoko badi bapeta mushindu wa kuenzela kasumbu ka mupika malu mimpe, anu bu mudi ‘musumba munene wa mu matunga wonso ne bisa ne bisamba’ muenze.​—Buakabuluibua 7:9, 14, NW.

15. (a) Mmunyi mudi bavule badileje nkayabu mudibu bu bibujibuji? (b) Bua tshinyi tudi ne bua kuepuka bua kujadika bikala muntu kampanda mukoko anyi tshibujibuji?

¹⁵ Mmushindu kayi udi bana babu ne Kristo ne miliyo ya mikoko mikuabo idi midisange nabu pamue bu tshisumbu tshimue bangatshibue? Bantu ba bungi badi mua kuikala kabayi buobu bine babunde bena-mpala ba Kristo, kadi nansha nanku ki mbenzele bantu bende malu ne dinanga nansha. Pa kusungula bulongolodi ebu bubi, bantu badi bu bibujibuji badi bimansha mukenji wa Bukalenge, pa kuwumvua buludiludi anyi ku butuangaji bua bantu bakuabu. (1 Yone 2:15-17) Bushuwa, ndekelu wa bionso, Yezu ke eu udi mutekibue bua kukosa tshilumbu [tshia muntu ne muntu]. Ki mbualu buetu tuetu bua kusunguluja aba badi mikoko ne aba badi bibujibuji.​—Mâko 2:8; Luka 5:22; Yone 2:24, 25; Lomo 14:10-12; 1 Kolinto 4:5.

Ntshinyi tshienzekela tshisumbu ne tshisumbu mu matuku atshilualua?

16, 17. Ntshinyi tshienzekela mikoko mu matuku atshilualua?

¹⁶ Yezu wakamanyisha dilumbuluisha diende dia mikoko: “Nuenu badi Tatu wanyi munange, luayi, nuangate bumpianyi bua Bukalenge buvuabo banulongoluele [katshia ku ntuadijilu wa bukua-bantu, NW].” Ndibikila kayipu dia musangelu​—“Luayi”! Ku tshinyi? Ku muoyo wa tshiendelele, anu bu mudiye umvuija mu tshikoso ne: “Bakane pabo nebapete muoyo wa tshiendelele.”​—Matewuse 25:34, 46, MMM.

¹⁷ Mu mufuanu wa ntalenta, Yezu wakaleja tshidi tshilombibue bua aba bakokesha pamue nende mu diulu, kadi mu mufuanu eu udi uleja tshidi tshitekemenyibue bua bakokedi ba Bukalenge. (Matayo 25:14-23) Mu mushindu muakanyine, bua dikuatshisha bana babu ne Yezu ne mutshima wonso, mikoko neyipiane buloba bukokesha kudi Bukalenge buende. Nebapete muoyo mu mparadizu pa buloba​—ditekemena divua Nzambi mubalongoluele “[ku ntuadijilu wa bukua-bantu, NW]” bua bantu badi mua kupandishibua.​—Luka 11:50, 51.

18, 19. (a) Yezu neamanyishe dilumbuluisha kayi bua bibujibuji? (b) Mmunyi mutudi mua kujadika se: bibujibuji kabiakuakama dikenga dia kashidi?

¹⁸ Ndishilangana kayipu ne dilumbuluisha dikumbaja pa bibujibuji! “Badi ku diende dia bakaji, Mukalenge neabambile ne: ‘Umbukayi muaba undi, nuenu batshipa, buelayi mu kapia ka kashidi, kavuabo balongoluele [Diabolo ne banjelu, NW] bende. Bualu mvua ne nzala, nuenu nansha kumpa tshiakudia; mvua ne nyota, nuenu nansha kungambika tshiakunua; meme muenyi, nuenu nansha kumbueja mu nzubu muenu; meme butaka, nuenu nansha kumvuadika; meme nsama, muikale kabidi mu nzubu wa lukanu, nuenu nansha kuvua kunkumbula.’ Bobo nebamukonke pabo ne: ‘Mukalenge, ndituku kayi dituvua bakumone wewe ne nzala, ne nyota, [muenyi, NW], muikale butaka, usama, muikale mu lukanu, tuetu kubenga kukuambuluisha?’ Mukalenge neabandamune ne: ‘Bulelela ndi nnuambila ne: misangu yonso inuvua babenge kuenzela umue wa ku bakese aba, nuvua babenge kungenzela meme.’”​—Matewuse 25:41-45, MMM.

¹⁹ Balongi ba Bible mbamanye se: ebi kabiena mua kumvuija ne: anyima ikena ifua ya bantu bafuane bibujibuji neikenge mu kapia ka kashidi. Tòo, bualu bantu badi anyima mene, kabena ne anyima ikena ifua to. (Genese 2:7; Muambi 9:5, 10; Yehezekele 18:4) Pa kufundila bibujibuji tshibawu tshia “kapia ka kashidi,” Mulumbuluishi udi usua kumvuija kabutu kakena ne ditekemena bua matuku atshilualua, kikala kabidi nshikidilu wa kashidi ne kashidi bua Diabolo ne ba-demon bende. (Buakabuluibua 20:10, 14) Nunku, Mulumbuluishi wa Yehowa udi wenza malumbuluisha mashilangane. Udi wambila mikoko ne: “Luayi”; bibujibuji ne: “Umbukayi muaba undi.” Mikoko neyipiane “muoyo wa tshiendelele.” Bibujibuji nebipete “dikenga dia kashidi.”​—Matewuse 25:46, MMM.b

Bidi ne diumvuija kayi buetu?

20, 21. (a) Bena nkristo badi ne mudimu kayi wa mushinga mukole wa kuenza? (b) Ndiabulula kayi didi dienzeka mpindieu? (c) Nnsombelu kayi wikalaku bua bantu patuadija mufuanu wa mikoko ne bibujibuji kukumbajibua?

²⁰ Bapostolo banayi bakumvua diandamuna dia Yezu pa bidi bitangila tshimanyinu tshia dikalaku diende ne nkomenu wa ndongoluelu eu bavua ne bia bungi bia kutabalela. Bavua bakengela bua kushala batabale ne badimuke. (Matayo 24:42) Bavua kabidi bakengela bua kuenza mudimu wa bumanyishi udi mutela mu Mâko 13:10. Bantemu ba Yehowa mbadifile ne bukole buonso mu mudimu au lelu’eu.

²¹ Nunku, ntshinyi tshidi ngumvuilu eu mupiamupia wa mufuanu wa mikoko ne bibujibuji umvuija buetu? Eyo, bantu badi benda baleja luseke ludibu. Bamue badi bayila ‘mu njila munene udi ufikisha ku kabutu,’ padi bakuabu benza madikolela bua kushala mu ‘njila mukese udi ufikisha ku muoyo.’ (Matewuse 7:13, 14, MMM) Kadi tshikondo tshialua Yezu kumanyisha dilumbuluisha dia ndekelu pa mikoko ne bibujibuji didi ditela mu mufuanu tshitshidi kumpala. Palua Muana wa muntu mu muanzu wa Mulumbuluishi, neajadike se: bena nkristo balelela ba bungi​—bushuwa “musumba munene” wa mikoko miditshipe—​nebakumbane bua kusambuka tshitupa tshia ndekelu tshia “dikenga dinene” ne kubuela mu bulongolodi bupiabupia. Ditekemena edi didi ne bua kuikala mpindieu mpokolo wa disanka. (Buakabuluibua 7:9, 14, NW) Ku luseke lukuabu, bavule ba “mu bisamba bionso” nebadisokolole mudibu bibujibuji bia mutu mukole. “Nebabuele mu dikenga dia kashidi.” Ndisulakana kayipu bua buloba!

22, 23. Bu mudi dikumbana dia mufuanu ditshikale bua matuku atshilualua, bua tshinyi mudimu wetu wa buambi udi ne mushinga mukole lelu?

²² Bu mudi dilumbuluisha diumvuijibua mu mufuanu eu dikale bua matuku atshilualua akadi pabuipi, nansha mpindieu bualu kampanda bua mushinga mukole budi buenda buenzeka. Tuetu bena nkristo tudi badifile mu mudimu wa dipandisha mioyo wa dimanyisha mukenji udi wabulula bantu. (Matayo 10:32-39) Paulo wakafunda ne: “Bualu, ‘yonso wabila dîna dia Yehowa neapandishibue.’ Kadi, mmunyi muabilabu eu udibu kabayi ne ditabuja kudiye? Ne mmunyi muitabujabu eu udibu kabayi bumvue bakula bualu buende? Ne mmunyi mumvuabu bakula bualu buende pikalaku kakuyi muntu udi ulongesha?” (Lomo 10:13, 14, NW) Mudimu wetu wa patoke mmumanyishe bantu mu matunga mapite pa 230 dîna dia Nzambi ne mukenji wende wa lupandu. Bana babu ne Kristo bela manyi batshidi amu baludika mudimu eu. Miliyo mitue ku itanu ya mikoko mikuabo mbadisangishe kudibu mpindieu. Ne bantu pa buloba bujima badi benda bandamuna bimpe ku mukenji udi umanyishibua kudi bana babu ne Yezu.

²³ Bavule badi bateleja mukenji wetu patudi tuyisha ku nzubu ne ku nzubu anyi mu mpukapuka. Bakuabu badi mua kumanya Bantemu ba Yehowa ne tshitudi mu mishindu itudi katuyi bamanye. Padi tshikondo tshia dilumbuluisha tshikumbana, mmu bualabale kayi muikala Yezu ne bua kutangila bumpunda bua tshinsanga ne lumu lua dîku? Katuena bamanye, ne kabiena ne dikuatshisha pa kueleelapu meji. (Fuanyikija ne 1 Kolinto 7:14.) Bavule badi mpindieu bajika matshi, baseka, anyi badifila mu dikengesha buludiludi tshisamba tshia Nzambi. Nunku, etshi ntshikondo tshia mushinga mukole; bamue bantu badi mua kuikala badisunguluja bu aba balua Yezu kuangata bu bibujibuji.​—Matayo 10:22; Yone 15:20; 16:2, 3; Lomo 2:5, 6.

24. (a) Bua tshinyi mbia mushinga bua muntu ne muntu kuandamuna bimpe ku buambi buetu? (b) Dilonga edi ndikuambuluishe wewe muine bua kuikala ne mmuenenu kayi pa mudimu webe?

²⁴ Kadi, diakalenga, bavule badi bandamuna bimpe, balonga Dîyi dia Nzambi, ne balua Bantemu ba Yehowa. Bamue bàdì bamueneka mpindieu bu bibujibuji badi mua kushintuluka ne kulua bu mikoko. Bualu budiku mbua se: aba badi bandamuna bimpe ne bakuatshisha ne mitalu yonso bashadile ba ku bana babu ne Kristo badi mu mushindu’eu bafila tshijadiki bituadije ku mpindieu tshiafila tshishimikidi bua buobu kutekibua ku tshianza tshia balume tshia Yezu padiye, mu matuku makese atshilualua, usomba mu nkuasa wende wa bumfumu bua kukosa nsambu. Badi benda babeneshibua ne nebatungunuke ne kubeneshibua. Nunku, mufuanu eu udi ne bua kutusaka ku mudimu mupitshidile muenza ne mitalu mu mudimu wa bena nkristo. Patshidiku dîba, tudi basue kuenza bionso bitudi mua kuenza bua kumanyisha lumu luimpe lua Bukalenge ne nunku’eu kupetesha bakuabu mushindu wa kuandamunabu bimpe. Pashishe nebitangile anu Yezu bua kumanyisha nkoselu wa tshilumbu [tshia muntu ne muntu], dipiishibua anyi dibingishibua.​—Matayo 25:46.

[Mêyi adi kuinshi]

Udi muvuluke anyi?

◻ Mmafuanangana kayi pankatshi pa Matayo 24:29-31 ne Matayo 25:31-33 adi aleja se: mufuanu wa mikoko ne bibujibuji neukumbajibue mu matuku atshilualua, ne nebikale tshikondo kayi atshi?

◻ Bana babu ne Yezu ‘badi batambe kupuekela’ mbanganyi?

◻ Mmunyi mudi ditumika dia Yezu ne miaku “bantu bakane” dituambuluisha bua kusunguluja aba badi bine aba baleja ne aba badibu kabayi baleja?

◻ Nansha muakumbajibua mufuanu mu matuku atshilualua, bua tshinyi buambi buetu budi mpindieu ne mushinga mukole ne bua kuenza kakuyi dijanguluka?

[Kazubu/​Tshimfuanyi mu dibeji 24]

BAMBISHA DIFUANANGANA

Matayo 24:29-31

Kunyima kua dikenga dinene dimane kutuadija, Muana wa muntu udi ufika

Udi ulua ne butumbi bunene

Banjelu badi nende pamue

Bisa bionso bia pa buloba bidi bimumona

Matayo 25:31-33

Muana wa muntu udi ulua

Udi ufika mu butumbi ne usomba mu nkuasa wende wa butumbi

Banjelu badi bafika nende pamue

Matunga wonso adi asangishibua; bibujibuji bidi ndekelu wa bionso bilumbuluishibua (dikenga dinene didi ditua ku ndekelu)

[Mêyi a dianyisha]

Garo Nalbandian