Mua kusomba bimpe mu dibaka diebe dibidi

Linda uvua mushipe dibaka diende ne bayende wa kumpala. Yeye ne Herman “badi ne disanka bua mudibu baselangane.” Kadi anu mudibu baleje, dibaka dibidi didi mua kulua ne ntatu ivua kayiyi mu dibaka dia kumpala to.b

Biwikale udi mubuelulule tshiakabidi mu dibaka, mmunyi muudi wangata dibaka diebe dibidi? Mamu mukuabu diende Tamara udi musedibue kukadi bidimu bisatu panyima pa dibaka diende dimane kufua, udi wamba ne: “Paudi ubuela mu dibaka bua musangu wa kumpala, udi udiumvua anu bu ne: dibaka diebe nedishale bua kashidi. Kadi, imue misangu kuena mua kudiumvua nanku mu dibaka dibidi to, bualu udi mumanye ne: dibaka diebe dia kumpala diakafua.”

Nansha nanku, bena mabaka ba bungi mbapete disanga dia bungi mu dibaka dibidi. Mabaka abu akenda bimpe, nansha diebe didi mua kuenda padi bimpe. Mushindu kayi? Tukonkonone ntatu isatu itu itamba kufikila bantu, ne mudi mibelu ya mu Bible mua kukuambuluisha.c

LUTATU 1: MBIKUKOLELE BUA KUPUA MUOYO DIBAKA DIEBE DIA KUMPALA BUA KUANGATA DIPIADIPIA NE MUSHINGA.

Ellen, udi musombele mu Afrique du Sud udi wamba ne: “Ndi ne lutatu lua kupua muoyo dibaka dianyi dia kumpala, nangananga tuetu baye mu muaba umvua nya ne bayanyi wa kumpala mu dikisha. Imue misangu bitu bimfikila bua kufuanyikija bayanyi undi nende mpindieu ne wa kale.” Ku lukuabu luseke, bikala muena dibaka nebe uvua mu dibaka dikuabu, udi mua kudiumvua mushindu wa muomumue bikalaye udi utamba kuakula bua dibaka diende dia kumpala.

TSHINUDI MUA KUENZA: Ikala mumanye ne: ki mbipepele bua wewe anyi muena dibaka nebe kupua muoyo dibaka dia kumpala, nangananga pikala umue wa kunudi uvua muenze bidimu bia bungi mu dibaka diende dia kumpala. Bulelela, bamue bantu badi bamba ne: bitu bibafikile mu mpukampuka bua kubikila muena dibaka udibu nende mu dîna dia muena dibaka uvuabu nende kale. Mmunyi muudi mua kupita ne bualu bua mushindu eu anyi budi busua kufuanangana ne ebu? Bible udi wamba ne: “Nuenu bonso nudienze tshintu tshimue.”​—1 Petelo 3:8, MMM.

Kubengi ne mukawu bua muena dibaka nebe kakudi bualu kampanda bua dibaka diende dia kumpala to. Muena dibaka nebe yeye mumvue mua kukuambila bualu kampanda bua dibaka diende dia kumpala, muteleje ne dinanga, ne lutulu luonso. Ne kabidi kuambi anu dia kamue ne: udi ukufuanyikija nende to. Ian udi musele mukaji mukuabu kukadi bidimu dikumi udi wamba ne: “Kabivua bitonda mukajanyi Kaitlyn dîba dionso dimvua ngakula bualu bua mukajanyi wa kumpala to. Kadi uvua umona bu mushindu wa kulonga bua kumanya tshidi tshienze bua ngikale tshindi etshi lelu.” Miyuki ya buena eyi idi mua kukuambuluisha bua wewe kutamba kushemeja bulunda buebe ne muena dibaka nebe mupiamupia.

Ikala utamba kuakula bua ngikadilu mimpe idi nayi muena dibaka nebe uudi nende mpindieu. Bushuwa, muena dibaka nebe udi mua kupanga kuikala ne imue ngikadilu ivua nayi muena dibaka nebe wa kumpala. Kadi muena dibaka nebe wa mpindieu udi ne amue malu mimpe adiye pende nawu. Nunku kolesha bulunda buudi nabu ne muena dibaka nebe ‘kuyi umufuanyikija ne muntu mukuabu,’ kadi umuleja muudi wanyisha imue ngikadilu idiye nayi. (Galatiya 6:4) Tatu mukuabu diende Edmond udi muselulule udi wamba ne: “Anu bu mudi malunda abidi kaayi mushindu umue ke mudi mabaka abidi kaayi pawu mushindu umue.”

Mmunyi muudi mua kuikala ne nkatshinkatshi paudi ukeba kuakula ne mukajebe uudi nende mpindieu malu a dibaka diebe dia kumpala? Jared udi wamba ne: “Dimue dituku ngakambila mukajanyi ne: dibaka dianyi dia kumpala divua bu mukanda muimpe utuvua bafunde ne mukajanyi wa kumpala. Misangu mikuabu ndi mua kuukangula ne kuubala ne kuelela meji pa malu mimpe atuvua benze pamue. Kadi muoyo wanyi kawena mu mukanda au to. Kadi, meme ne mukajanyi tudi tuenda tufunda wetu mukanda, ne mu wowu ewu ke mudi muoyo wanyi musombe ne disanka.”

LUTATU 2: MBIKUKOLELE BUA KUYUKILA NE BALUNDA BEBE BA KALE BADI KABAYI BIBIDILANGANE NE MUENA DIBAKA NEBE MUPIAMUPIA.

Javier udi mubuele mu dibaka bidimu bisambombo panyima pa dibaka diende dia kumpala dimane kufua, udi wamba ne: “Tshikondo kampanda, kunyima kua tuetu bamane kuselangana, mukajanyi uvua umona ne: bamue balunda banyi bavua bamueluluila anyi bakula bibi buende.” Tatu mukuabu diende Leo, uvua yeye mutuilangane ne bualu bushilangane. Udi wamba ne: “Bamue bantu bavua bambila mukajanyi mushindu uvuabu banange bayende wa kumpala mu mêsu muanyi, ne muvuabi bibatonda bikole mudibu kabatshiyi bamumona!”

TSHINUDI MUA KUENZA: Dienzeja bua kuditeka pa muaba wa mukuebe. Ian utudi bakuile bualu buende ku ntuadijilu, udi wamba ne: “Ndi ngela meji ne: imue misangu balunda ba kale batu ne lutatu lua kuibidilangana ne muena dibaka mupiamupia bu muvuabu bibidilangane ne wa kumpala.” Nunku ‘kuikadi muena malu makole, kadi ikala ne meji mapole kudi bantu bonso.’ (Tito 3:2) Shila balunda bebe anyi bena mu dîku diebe tshikondo tshia kushintulukabu. Bu mudi dibaka diebe dishintuluke, bulunda buebe ne bantu budi mua kushintuluka pabu. Javier utuvua bakuile kuulu eku, udi wamba ne: pavua bikondo bienda bipita yeye ne mukajende bakashintulula balunda babu ba kale. Udi wamba kabidi ne: “Kadi tuakakeba balunda bapiabapia tuetu bonso, ne kuenza nunku kuakatuambuluisha.”

Ikala utabalela muena dibaka nebe panudi nuyukila ne balunda bebe ba kale. Tshilejilu, nuenu babuele mu muyuki wa muena dibaka nebe wa kumpala, ikala ne busunguluji buimpe bua muena dibaka uudi nende mpindieu kadiumvu bu nudi bamumbushe mu muyuki au to. Bible udi wamba ne: “Muena biakulakula udi utapa bantu ne meyi bu mudi muele wa nkanza, kadi meyi a bantu ba meji adi atalaja muntu.”​—Nsumuinu 12:18, MMM.

LUTATU 3: MBIKUKOLELE BUA KUEYEMENA MUENA DIBAKA NEBE MUPIAMUPIA BUALU UUVUA NENDE KUMPALA KAVUA WA KUEYEMENA TO.

Andrew uvuabu banyeme kudi mukajende wa kumpala udi wamba ne: “Mvua ne buôwa bua kabalu kabidi kungela mâyi ku makasa to.” Pashishe wakaselangana ne Riley mukaji udiye nende mpindieu. “Mvua ngelakana misangu ya bungi ni mvua mua kuikala bu bayende wa Riley wa kumpala. Mvua kabidi ndiambakena bua kalu kuamba ne: tshiena nkumbana to, ne pashishe alua kundekela bua kuya kudi mulume mukuabu.”

TSHINUDI MUA KUENZA: Kumvu buôwa bua kuambila muena dibaka nebe malu adi makutonde. Bible udi wamba ne: ‘Bikalaku kakuyi bulombodi bua meji, malu adi bantu bapangadija adi apumbishibua.’ (Nsumuinu 15:22) Kuyukila malu mudiwu kuakambuluisha Andrew ne Riley bua kueyemenangana. Andrew udi wamba ne: “Mvua muambile Riley ne: tshiakumona dishipa dibaka bu mushindu mupepele wa kujikija bilumbu to, ne Riley pende wakangambila mêyi a momumue. Ku kakese ku kakese ngakalua kumueyemena ne muoyo wanyi mujima.”

Pikalabu bavua bele muena dibaka nebe mâyi ku makasa mu dibaka diende dia kumpala, enza muebe monso bua muena dibaka nebe akueyemene. Tshilejilu, Michel ne Sabine bavua mabaka abu mafue balue kuselangana bakumvuangana ne: dîba dionso didi umue wa kudibu uyukila ne muena dibaka nende wa kale udi ne bua kuambila mukuabu. Sabine udi wamba ne: “Diumvuangana dia mushindu eu divua dienza bua tuikale mu bukubi.”​—Efeso 4:25.

Bantu ba bungi badi babuelulule mu dibaka mbatute dikasa dimpe, ne wewe pebe udi mua kututa dikasa dimpe. Mu kuamba kuimpe, uvua mudimanye bimpe pauvua mubuele mu dibaka dia kumpala. Andrew utudi bakuile kuulu eku udi wamba ne: “Ndi mupete dikankamika dia bungi mu dibaka dianyi ne Riley. Panyima pa tuetu bamane kusomba bidimu 13 mu dibaka, malanda etu akakola bikole, katuvua basue bua ajimine nansha kakese.”