Udiku mua kuvudija didifila diebe bua kudimuija bantu anyi?

Filme kampanda muimpe bikole uvua ne bimfuanyi kabiyi mêyi uvua ukoka ntema ya bantu bavua bamumona bualu uvua uleja nsombelu uvua nende bantu mu San Francisco, mu États-Unis ku ntuadijilu kua bidimu bia 1900 (bavua babikila filme eu ne: A Trip Down Market Street). Benji ba filme eu bavua basuike tshiamu tshia kamera kumpala kua kamashinyi kasuikila ku nshinga muulu ne bakatangije mu njila muvua bantu. Bavua baleje mu filme au malu avua enzeka dituku dionso bu mudi: tubalu tukoka matempu, mashinyi a pa kale pamue ne bangenda mushinga ne bana batu benda basumbisha bikandakanda.

Bualu budi bulenga ku muoyo bua filme eu budi ne: bavua pamuapa bamukuate mu ngondo 4 mu 1906 matuku makese kumpala kua dikanka dia buloba ne dikuata kapia dia tshimenga bivua bienzeke mu dia 18 ngondo 4, bishipe bantu binunu bia bungi ne bibutule tshimenga atshi pabuipi ne tshionso. Pamuapa kuvua kushadile bamue bantu bavua mu filme eu anu matuku makese bua bobu kufua. Scott Miles, munkana wa umue wa benji ba filme eu udi wamba ne: “Ndi mmona anu bantu, ne bobu pabu ki mbamanye tshikadi pa kubafikila to. Ndi mbumvuila luse, kadi tshiena ne mushindu wa kubambuluisha to.”

Kudi dipetangana pankatshi pa bualu buvua buenzeke ebu ne matuku atudi aa. Tuetu petu katuena ne mushindu wa kubambuluisha to, kadi tutu tumvuila bantu luse. Mbaditue mu midimu yabu ya ku dituku ku dituku kabayi bamanye tshikala ne bua kubafikila matuku makese kumpala eku, mmumue ne: kabutu ka ndongoluelu wa malu eu ne ka muoyo wabu. Kadi bishilangane ne dikanka dia buloba divua bantu kabayi batekemene, kutshidi tshikondo tshîpi tshidi tshishale bua tuetu kudimuija bantu netu bua dituku dia dilumbuluisha dia Yehowa. Pamuapa utu ulongolola dîba lumingu luonso bua kuyisha ku nzubu ne ku nzubu, kadi udiku mua kuvudija didifila diebe bua kudimuija bantu anyi?

YEZU UVUA ANU MUDIAKAJE NE MUIKALE PABUIPI BUA KUYISHA

Tshilejilu tshia Yezu tshidi ne mushinga bualu uvua anu mudiakaje ne muikale pabuipi bua kuyisha. Uvua muyishe muntu yonso uvuaye mupetangane nende, bu mudi mulambuishi wa bitadi pavuaye upita mu njila, nansha mukaji wakapetaye ku tshina tshia mâyi pavuaye muikishe munda munya. (Luka 19:1-5; Yone 4:5-10, 21-24) Nansha pavua Yezu musombe bua kuikisha, wakitaba bua kulekela bua kuenza malu avuaye mulongolole bua kuyishaye bantu bakuabu. Luse luvuaye umvuila bantu ke luvua lumusake bua kuyisha bikole. (Mâko 6:30-34) Mmushindu kayi utudi tuidikija lungenyi lua kuenza malu ne mitalu luvua nalu Yezu?

BADI BALONDAKAJA MPUNGA YONSO UDI UMUENEKA

Melika mmusombele mu tshibambalu kampanda mu nzubu munene wa tshilala kuulu udi mukuba bimpe. Ba bungi ba ku bantu bavua mu bimbalu bikuabu mu nzubu amu bavua balongi bavua bafumine mu matunga makuabu bavua ne telefone ya ku bianza ne bena mêna abu avua kaayi ku liste uvua ne mêna a bantu bavua mu nzubu amu. Udi wanyisha bikole mpunga wa pa buende udiye upeta bua kutuadija miyuki ya malu a Nzambi ne bantu abu ku tshibuelelu ne pa tshiamu tshidi tshibandisha bantu ne tshibapuekesha. Udi wamba ne: “Mu mushindu kampanda, ndi mmona miaba eyi bu teritware wanyi.” Melika utu wambula mikanda ya miakulu mishilashilangane ne bantu ba bungi batu bitaba bua kuangata trakte ne bibejibeji. Utu kabidi ubaleja mua kubuela mu site wetu wa jw.org. Mmutuadije kulonga Bible ne bantu ba bungi.

Sonia mmusue pende kuyisha muntu yonso udiye upetangana nende. Udi wenza mudimu ku lupitadi ne mmudifundile tshipatshila tshia kuyisha bena mudimu nende bonso. Tshia kumpala, uvua wanji kukeba dîba dia kumanya majinga a muntu ne muntu ne malu atu amusankisha. Pashishe, uvua uyukila ne muntu pa nkayende malu a mu nyuma dîba diende dia dikisha. Kuenza nunku nkuambuluishe Sonia bua kulonga Bible ne bantu babidi. Mmulongolole kabidi bua kupitshisha mêba ende a dikisha ku tshibuelelu tshia lupitadi bua kuyukila ne bantu badi bindile munganga.

ENZA MUDIMU NE MPUNGA UUDI UPETA

Umue wa ku bantu bavua bapanduke ku dikanka dia buloba dia mu 1906 wakamba bua dikanka edi ne: divua “tshipupu tshibi menemene tshivua katshiyi tshianji kuenzeka mu tshimenga.” Kadi, bipupu bionso ebi mbikese menemene patudi tubifuanyikija ne dituku dia disombuela diafika kudi bantu bonso “badi kabayi bamanye Nzambi.” (2 Tes. 1:8) Yehowa udi ujinga ne muoyo mujima bua bantu bashintulule lungenyi luabu ne muoyo wabu ne bitabe mukenji wa didimuija udi Bantemu bende bamanyisha.​—2 Pet. 3:9; Buak. 14:6, 7.

Udi ne diakalenga dia kukangula mêsu a bantu mu tshikondo tshikole etshi ne kubambuluisha bua kulekelabu dikeba anu malu abu nkayabu bua bakebe Yehowa. (Sef. 2:2, 3) Udiku mua kukuata mudimu ne mpunga yonso udi umueneka bua kuyisha bena mudimu nebe, bena mutumba bebe ne bantu baudi upetangana nabu paudi uya mu midimu yebe ya ku dituku ne dituku anyi? Neudifilaku bikole bua kudimuija bantu bakuabu anyi?