Mutudi mua kuambuluisha bua kukumbaja majinga a bakuabu

MUANETU mukuabu diende François udi mukulu ne udi mu ditunga didi ne malu a mpetu mashadile udi wamba ne: “Kuvua tshimvundu mu ditunga panyima pa masungulangana bualu tshisumbu tshivua tshipangile katshivua tshisanke bua bipeta bivua bipatuke to. Biakudia ne manga biakakola ne bintu bikese bivua bishale biakabanda mushinga bikole. Banke yakakanga ne mashinyi a dipatula nawu makuta akimanyika kuenza mudimu.”

Bana betu ba ku Betele bakatuadija kufila ne lukasa makuta ne bintu kudi Bantemu bavua kabayi ne muaba wa kusomba bavua badisangishe ku Nzubu ya Bukalenge ya mu ditunga. Bisumbu bivua biluishangana biakakanga njila, kadi bionso bibidi bivua bimanye ne: Bantemu kabatu babuelakana mu malu a tshididi to, nunku bavua bapitshisha mashinyi a Betele misangu ya bungi.

François udi wamba ne: “Musangu mukuabu patuvua tuya ku Nzubu wa Bukalenge kampanda, bangondavi bakasa mashinyi etu bingoma. Kadi masashi avua anu atupita. Patuakamona musalayi unyema mutangile kutudi muikale ne tshingoma, tuakapingaja mashinyi tshianyima, kuakudimuna ne kupingana lubilu ku Betele. Tuakela Yehowa tuasakidila bua mutuvua bashale ne muoyo. Dituku diakalonda, bana betu 130 bavua mu Nzubu wa Bukalenge au bakafika muaba wa bukubi. Bamue bakalua ku Betele ne tuetu kubakumbajila majinga a mu nyuma ne a ku mubidi too ne muakajika nsombelu mukole au.”

François udi wamba ne: “Betele wakalua kupeta mikanda ya bungi ya kudi bana betu ba mu ditunga dijima muvuabu bele tuasakidila ne muoyo mujima. Mushindu uvuabu bamone muvua bana betu ba miaba mikuabu babambuluishe, wakakolesha dieyemena diabu kudi Yehowa.”

Mu bipupu bitu bidienzekela anyi bitu bantu bakebesha, katutu tuambila bana betu batu dijinga ne diambuluisha bua ‘kuota kapia ne kudia bimpe to.’ (Yak. 2:15, 16) Kadi tutu tukeba bua kubakumbanjila majinga abu a ku mubidi. Bia muomumue, pavua bana betu ba mu bidimu lukama bia kumpala bapete didimuija bua tshiyole tshivua ne bua kulua, “bayidi bakadisuika, muntu ne muntu bilondeshile dimona diende, bua kutumina bana betu bavua basombele mu Yudaya diambuluisha.”—Bien. 11:28-30.

Bu mutudi batendeledi ba Yehowa, tutu ne dijinga dikole dia kuambuluisha bantu ne bintu bia ku mubidi. Kadi bantu batu kabidi ne dijinga dia bintu bia mu nyuma. (Mat. 5:3) Bua kubambuluisha bua kumanya dijinga diabu edi ne kuenza malu bua kudikumbaja, Yezu wakapesha bayidi bende mudimu wa kuvuija bantu bayidi. (Mat. 28:19, 20) Tutu tufila dîba dietu, bukole buetu ne bintu bietu bua kukumbaja mudimu eu. Bu mutudi mu bulongolodi, tutu tuenza mudimu ne amue mapa bua kuambuluisha bantu ku mubidi, kadi mudimu munene wa mapa aa ngua kutuma malu a Bukalenge kumpala ne kumuangalaja lumu luimpe. Nunku tudi tuleja mutudi banange Nzambi ne bantu netu.—Mat. 22:37-39.

Bantu badi batua mudimu wa Bantemu ba Yehowa wa pa buloba bujima nyama ku mikolo badi ne bua kuikala batuishibue ne: badi benza mudimu ne mapa abu mu mushindu muimpe. Udiku mua kuambuluisha bena Kristo nebe badi dijinga ne diambuluisha anyi? Udiku ne dijinga dia kutua mudimu wa kuvuija bantu bayidi nyama ku mikolo anyi? Bikalabi nanku, ‘kupadi bantu tshintu tshimpe, badi bakumbane bua kuikala natshi, pawikala ne bukole bua kubapatshi.’—Nsu. 3:27.

MUSHINDU UDI BAMUE BAFILA MAPA BUA MUDIMU WA PA BULOBA BUJIMA

Anu bu mu tshikondo tshia Paulo, bantu bavule lelu batu ‘bateka tshintu ku luseke’ anyi balama makuta bungi kampanda bua kuela mu tushete tua mapa a “Mudimu wa pa buloba bujima.” (1 Kol. 16:2) Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Nudi mua kutuma kabidi makuta aa buludiludi ku biro bia Bantemu ba Yehowa bidi bitangila mudimu mu ditunga dienu. Bua kumanya bulongolodi budi Bantemu ba Yehowa benza nabu mudimu mu ditunga dienu budi bumanyike kua mbulamatadi, suaku webeje Betele udi utangila midimu mu ditunga dienu. Udi mua kupeta adrese wa Betele eu ku Enternete mu site wa www.jw.org. Mapa anudi mua kutuma buludiludi ngowu aa:

DIFILA BINTU BITUDI NABI
- Nudi mua kufila makuta, bilengejilu bu mudi mpeta ne bikanu bia or peshi bintu bikuabu bia mushinga mukole.
- Nutume makuta anyi bintu ebi ne mukanda muipi udi uleja ne: nudi babitume bua kashidi.
DILAMISHA MAKUTA
- Muntu udi mua kufila bintu biende nansha makuta bua balue kumupingajila pikalaye nawu dijinga.
- Muntu udi mua kufunda mukanda udi uleja ne: bintu ebi mbia kupingaja.
MAPA MALONGOLOLA

Pa kumbusha mapa a makuta ne bintu bietu bia mushinga mukole, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Mbaleje mishindu eyi kuinshi eku. Nansha wewe musungule mushindu kayi bua kufila mapa aa, suaku wanji kuebeja Betele udi utangila midimu ya mu ditunga dienu bua kumanya mishindu idiku idibu bakuata nayi mudimu mu ditunga dienu. Bu mutu mikenji ne bitadi bishintuluka, mbimpe kuebeja bantu badi bamanye bimpe malu a bitadi ne mikenji kumpala kua wewe kusungula mushindu muimpe wa kufila mapa.

Makuta a tshieya: Mmapa adi muntu mua kupesha bumue bua ku malongolodi budi Bantemu ba Yehowa benza nabu mudimu ne kuleja mudi bulongolodi ebu ne bukenji bua kuangata makuta ende a tshieya anyi a pansio.

Konte ya ku banke: Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia bumue bua ku malongolodi budi Bantemu ba Yehowa benza nabu mudimu bilondeshile mikenji ya banke ya muaba udiye.

Bukenji bua kupeta bintu ne makuta masombesha: Muntu udi mua kupesha bumue bua ku malongolodi budi Bantemu ba Yehowa benza nabu mudimu bukenji bua kupeta bintu ne makuta masombesha anyi bukenji bua kuangata bua kashidi padiye ufua.

Mpangu ne nzubu: Muntu udi mua kufila lupangu anyi nzubu wende kudi bumue bua ku malongolodi budi Bantemu ba Yehowa benza nabu mudimu bua kashidi, kadi bikalaye musombele mu lupangu elu, udi mua kutungunuka ne kusombelamu too ne muafuaye.

Dipa dia kufuta ku tshidimu: Mmakuta anyi mikanda bidibu bapesha bumue bua ku malongolodi budi Bantemu ba Yehowa benza nabu mudimu, bumvuangana ne muntu udi ubifila anyi muntu udiye musungule bua kutuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila bumue bua ku malongolodi budi Bantemu ba Yehowa benza nabu mudimu bintu anyi makuta ende, peshi kubupa bukenji bua kuangata bintu bidiye mulamishe. Kuenza nunku kudi mua kukepeshisha mushinga wa bitadi.

Anu mudi tshiambilu “mapa malongolola” tshileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Mbenze kakanda aka bua kuleja mishindu mishilashilangane idi bantu mua kufila mapa ne bintu bia bumpianyi mpindieu nansha padibu bafua. Malu adibu baleje mu kakanda aka kaena anu mua kuikala akutangila wewe bilondeshile bitadi ne mikenji idi mu ditunga dienu to. Nunku, paudi ubala kakanda aka, udi kabidi ne bua kuebeja bantu badi bamanye mikenji ne malu a bitadi bia mu ditunga dienu. Bantu ba bungi badi benze mudimu ne mishindu ya difila mapa eyi mbafike ku dikuatshisha mudimu wa Nzambi ne kuambuluisha mudimu wa pa buloba bujima, ne mbabakepeshile bungi bua makuta a bitadi avuabu bafuta. Bikala kakanda aka mu ditunga dienu, udi mua kukalombesha kudi sekretere wa mu tshisumbu tshienu.

Bua kumanya malu makuabu, udi mua kubikila biro bia mapa malongolola anyi kubifundila ku adrese udi kuinshi eku, peshi udi mua kubikila anyi kufundila Betele udi utangila mudimu mu ditunga dienu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707