MANDAMUNA A NKONKO YA MALU A MU BIBLE
Banjelu badiku mua kutuambuluisha anyi?
Anu bu muvua banjelu bambuluishe Danyele musadidi wa Nzambi wa lulamatu mu bikondo bia kale, badi bambuluisha bantu lelu bua bumvue lumu luimpe
Yehowa Nzambi wakafuka miliyo ne miliyo ya banjelu kumpala kua kufukaye bantu. (Yobo 38:4, 7) Banjelu aba mbifukibua bia mu nyuma bia bukole bidi bienzela Nzambi mudimu; imue misangu Nzambi utu ubatuma bua kulombola ne kukuba basadidi bende pa buloba. (Musambu 91:10, 11) Lelu eu banjelu badi bambuluisha bantu bua kumvua lumu luimpe ludi bayidi ba Yezu bayisha.—Bala Buakabuluibua 14:6, 7.
Tudiku mua kusambila banjelu bua kutuambuluishabu anyi? Tòo. Kusambila nkutendelela, anu Nzambi yeye nkayende ke utudi ne bua kutendelela. (Buakabuluibua 19:10) Bu mudi banjelu bena mudimu ba Nzambi, badi batumikila mikenji ya Nzambi pamutu pa ya bantu. Ke bualu kayi, tudi ne bua kutuma masambila etu misangu yonso anu kudi Nzambi mu dîna dia Yezu.—Bala Musambu 103:20, 21; Matayi 26:53.
Kudiku banjelu babi anyi?
Banjelu bavua bafukibue ne budikadidi bua kudisunguila malu anu bu bantu, badi mua kusungula bua kuenza tshidi tshimpe anyi tshidi tshibi. Bia dibungama, banjelu ba bungi bakatombokela Nzambi. (2 Petelo 2:4) Satana ke uvua mutombokele Nzambi kumpala, pashishe banjelu bakuabu bakamulonda ne kuluabu bademon. Mu bidimu bishale ebi, bakipata Satana ne bademon mu diulu, kubimanshabu pa buloba.—Bala Buakabuluibua 12:7-9.
Divulangana dia malu mabi ne tshikisu katshia ku 1914 ntshijadiki tshidi tshileja ne: mu katupa kîpi emu, Nzambi neabutule Satana ne bademon. Pashishe, Nzambi neapingaje buloba muvuabu kumpala.—Bala Buakabuluibua 12:12; 21:3, 4.