TSHIENA-BUALU TSHINENE | BUKALENGE BUA NZAMBI—BUDI NE MUSHINGA KAYI KUUDI?

Bukalenge bua Nzambi—Mmunyi muakuambuluishabu?

Imue misangu biena-bualu bia kumpala mbikuambuluishe bua kujingulula ne: Bukalenge bua Nzambi budi ne mushinga wa bungi kudi Bantemu ba Yehowa. Pamuapa amue mabenesha atshilualua a Bukalenge bua Nzambi atuvua bakonkonone avua mua kuikala makusankishe. Kadi udi mua kudiebeja bua kumanya bikala milayi eyi milelela.

Mbia meji bua muudi kuyi musue kuitaba tshianana tshianana bualu buonso buudi umvua to. (Nsumuinu 14:15) Mu mushindu kampanda, tudi mua kufuanyikija ngelelu webe wa meji ne wa bena Beloya ba kale.a Pavua bena Beloya bumvue lumu luimpe lua Bukalenge bua musangu wa kumpala, bavua baluitabe, kadi kabivua anu bualu bavua bela meji ne: ke bulelela. Kadi, bavua bakonkonone Mifundu bimpe menemene “bua kumanya bikala malu aa avua malelela.” (Bienzedi 17:11) Mu mêyi makuabu tudi mua kuamba ne: bena Beloya bavua bafuanyikije lumu luimpe luvuabu bateleje ne tshivua Bible wamba. Mu kupita kua matuku, bakalua kutuishibua ne: lumu luimpe elu luvua luimanyine bikole mu Dîyi dia Nzambi.

Bantemu ba Yehowa badi bakulomba ne muoyo mujima bua kuenza pebe bia muomumue. Ku diambuluisha dia programe wetu wa dilongesha bantu Bible tshianana kabayi bafuta makuta, tudi tukupesha mpunga wa kufuanyikija malu adi Bantemu ba Yehowa bitabuja bua Bukalenge bua Nzambi ne tshidi Bible ulongesha.

Pa kumbusha dilonga diebe dia malu a Bukalenge bua Nzambi, dilonga diebe dia Bible didi mua kukuambuluisha bua kupeta mandamuna a nkonko minene ya mu nsombelu bu eyi:

Tudi bafume kuepi?
Bua tshinyi tudi ne muoyo?
Bua tshinyi Nzambi mmulekele makenga?
Ntshinyi tshidi tshitufikila patudi tufua?
Nebabutule buloba ebu anyi?
Ntshinyi tshidi mua kufila disanka mu dîku?

Dilonga dia Bible nedikuambuluishe kabidi bua “kusemena pabuipi ne Nzambi.” (Yakobo 4:8) Paudi wenda usemena pabuipi ne Nzambi, neumone mudi Bukalenge bua Nzambi ne mushinga kuudi mpindieu ne kashidi. Pavua Yezu usambila Tatuende, wakamba ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.”—Yone 17:3.

Bantemu ba Yehowa badi mua kulonga nebe Bible ne mukanda eu.

Bua kulomba dilonga dia Bible kuyi ufuta makuta, lomba Ntemu yonso wa Yehowa anyi uuja formilere udi mu www.jw.org. (Tangila mu tshiena-bualu tshia ne: LOMBA BUA KULONGA BIBLE)

a Beloya ntshimenga tshia kale tshia mu Makedoniya.

Bukalenge bua Nzambi budi ne mushinga kudiye

Matuku mashale aa, bavua bapeshe Folake muana wa bakaji wa bidimu dikumi mudimu wa kuenza mu kalasa bua kufundaye malu kampanda pa tshiena-bualu tshia ne: “Tshindi munange bikole pa buloba ebu.” Folake uvua musungule bua kufunda bua tshinyi utu munange kuambila bakuabu bua Bukalenge bua Nzambi.

Folake wakumvuija ne: “Bukalenge bua Nzambi mbulamatadi mulelela udi kayi umueneka, nunku kuena mua kumumona nansha wewe muvuale manete.”

Folake wakafunda kabidi bua masanka a Bukalenge adiye muindile ne muoyo kuulu kuulu. Wakafunda bua amue malu ikala Bukalenge bua Nzambi mua kujikija wamba ne: “Bidi binsama ku muoyo bua kumona bantu kabayi nzubu balala mu njila ne mudi bana bafua ne nzala mu bitupa bia maloba bishilashilangane.” Kusakidilaye kabidi ne: “ntu ngumvua disanka pandi mbala Yeshaya 65:21.” Mvese eu mmulaye bua bantu bonso bikala ku bukokeshi bua Bukalenge bua Nzambi ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi.’

Folake wakamba ne: mmuindile kabidi ne muoyo kuulu kuulu tshikondo tshikala Nzambi mua kumbusha masama onso ku butuangaji bua Bukalenge buende. Mu bivuaye mufunde wakatela mêyi a mu Buakabuiluibua 21:4, udi wamba ne: Nzambi “neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi.” Mu mêyi ende a ndekelu wakaleja ne: “Mmunange Yehowa ne Bukalenge buende bikole kupita bintu bionso bia pa buloba.” Bushuwa, Bukalenge bua Nzambi budi ne muaba munene mu muoyo wa nsongakaji eu!