Bible udi mua kungambuluisha mu disama dia dibungama dikole anyi?
Diandamuna dia mu Bible
Eyowa, bualu diambuluisha ditambe buimpe ndidi difumina kudi “Nzambi utu usamba badi ne kusama kua dibungama dikole, ubakankamija, ubakolesha, ne ubasanguluja.”—2 Kolinto 7:6, The Amplified Bible.
Muntu yeye mu dibungama dikole, Nzambi utu umupesha:
Bukole. Bua Nzambi “kukukolesha ne kukusanguluja paudi mu disama dia dibungama dikole,” kakumbusha malu onso adi akutatshisha to, kadi udi ukupesha bukole, bua umone mua kupita nadi paudi umulombabu mu disambila. (Filipoyi 4:13) Ikala mushindika ne: udi pabuipi bua kukuteleja, bualu Bible udi wamba ne: “Yehowa udi pabuipi ne badi ne muoyo musunsuke; udi upandisha badi bazajibue mu lungenyi luabu.” (Misambu 34:18) Manya ne: Nzambi udi mua kukuteleja nansha wewe mupange mua kumuambila muudi udiumvua menemene.—Lomo 8:26, 27.
Bilejilu bimpe. Mufundi mukuabu wa Bible wakasambila ne: ‘Ndi ndila kûdi, Yehowa, mu dijimba dia kanyinganyinga mundi.’ Muimbi wa musambu eu wakapeta busambi mu dibungama dikole divuaye nadi pakajingululaye ne: Nzambi katu utulamina munda bua bilema bietu to. Kadi wakambila Nzambi ne: ‘Wewe mubale dipambuka dia bantu, mmuntu kayi wakadi mua kuimana? Kadi dibuikila dia mibi didi kûdi, bua wewe unemekibue.’—Misambu 130:1, 3, 4, Mukanda wa Nzambi.
Ditekemena. Pakumbusha busambi buende lelu, Nzambi mmulaye bua kujikija malu onso adi afikisha bantu ku dibungama dikole. Pakumbajaye mulayi eu, “malu a kale [ne adi afikisha ku dibungama dikole] kaakubavuila kabidi mu lungenyi, anyi kubabanda kabidi ku muoyo to.”—Yeshaya 65:17.
Dimanyisha: Nansha mudi Bantemu ba Yehowa batuishibue ne: Nzambi udi ubambuluisha, batu kabidi bakeba luondapu padibu basama masama a dibungama dikole. (Mâko 2:17) Kadi kabatu babela bantu ne: balonde anu luondapu lua mushindu kampanda anyi kansanga to. Badi bamona ne: disungula dia mushindu wa kuondopibua mbualu bua muntu nkanyende.